O'ona senehinne sembe ambatsiogha
13
1 Nari yubu lelamnep nena, ora nimiri yubu na ekonne ka'eptanep kom yubuag nari lemneba babe, Allah arukna imagne malaikatti yubuag lepneba babe, o'ona sembamsin koma yubu lepsene tanena, mo ao kwe ahirop yubu lilim saog tanep.a Nari o'ona sembamsin koma yubu lepsene tanena, nimiri lonceng kwengelamnaba ao kwe ahirop yubu lilim saog tanepba, nimiri ka'elopnep. 2 O'ona senehinne paliag wamnepne sembe sunumna sumbatsinun. Allah Yameri nanag tarelamnehori, “Nari yubu silimu tiplulam,” aro nari wanaag ambatnep. Tognoroba nia mangkina kop-kop tagto el tangtopne babe nanag wamnep. Apna nari wanaag sik senenne agha yim nhonag aruklamnari, “Nhonag agha nhonag ko'oro pi,” aro nari arukahaneba ko'oro pinep. Ni undo Allah Yameri tatnehoba unulamsene aghana, nari nimi o'ona sembahin koma undo unulamna tanena, na mo laplopnepne wamnep. 3 Nari uanepnena, nari saeag wamlange ni ora nimi sae agha orog nimiag pogto tarelamsinep. Nandamne nong seneragtan koma, “Omneika babe tebanun,” aro tol tongolamnep.b Undo unuanep aghana, “Omektanun,” aro o'ona sembahin koma undo unulamna tanena, na Allah whingag wamne sumeneko na yepnenep kom.4 O'ona senehinneri wana palingkina ulamla. O'ona senehinneri ora nimiag win-win aro walia ulamsil. O'ona senehinneri ora nimi sembe mon sek senenne agha luknubahane sembanep kom. O'ona senehinneri eldamne maiptangto, “Paliagne wamna,” seneptanep kom. 5 O'ona senehinneri arikala uropne ulamla kom. Eldamne mo sembe seneldalamla kom. Ora nimi elem uro walamsil kom. Ora nimiri elag malia uropne sembe wanaag seneraglamla kom. 6 O'ona senehinena, sengkwanektopne sembe awi semban koma, ot sikne mo sembe awi senelamla. 7 O'ona senehinneri sop-sop yae paiamsildi, sik senelamsildi, nang-nang aro tilamsildi, wana palingkina papna koma tipto ulamla.
8-10 O'ona senehinne neneko ik nhon babe kom tanep kom. Ot el tangtopne neneko sembe, nu wene wamap ko'oag ni el uro wamap kom. Ot pogtopne agha tara sip wene el talamap. Ane sembe Allahri yubu silimu tiptopne babe ot pogtopne agha tara sip ambatsinep. Aghana amik ni sunsunuptanep sum yaleba, nhin el tabe sumeneko Allahri yubu nen yubu silimu tiptop nimi pere agha ambatsilul kom. Nhin el tabe sumeneko ora nimiri yubu nimi ekon yubu ka'eptanep kom yubuag lero ambatsiropne babe amik wamlul kom. Tognoroba sembe Allah Yameri nimiag el nenelamsilne babe amik wamlul kom. Wene pogtopne agha el talamap aghana, ni sunuptale sum eneko yaleba, pogtopne wamnep komdi, ni ningki taleba, ni el taukap.
11 Amik sum el taukapne sembe sunumna sumbatsinun. Na olog me wamsiri, olog meri seneropne senelamsiri, olog meri seneragnepne agha seneraglamsiri, olog meri yubu lelamsi. Aghana kaubuni tahiri, olog meri lero uropne lipsi. 12 Ane saog uro wene wamap ko'oag pogtopne agha kemero el talamap nena, nimi inibinag wamnari, “Na yame kemeptanun,” aro cerminag kemelamloa saog uro kemelamnaba, imnep kom saog wamap. Wene Allahri na sembe ni tibin uro kemelamneldi el wamla, aghana amik sum Elap haiptaberi, El whingag wamebe sum eneko ni tibin taleba, na babe ni el tanun.
13 Wene wamlangena, sik senenneap, “Amik uro yabilul,” aro nang-nang aro tiropneap, o'ona senehinneap wamla. Ot wilindi wamlange neneag agha, o'ona senehiropne nubu sirikne wamle paghabog wamlul.