Allah Yame Walingeri nimiag tatsinepne sembe
12
1 Nangkabo, a'un Yesusag wana palirop nimi wamlom ane sembe, Allah Yame Walingeri tarelamsilne sembe a'un ekon uro wamnep kom sembamnari ambatnuahin. 2 Wene a'un el uro wamlomne, samen Allah sembe ekon uro ulamlumag phiari a'un sae kiliro mema pharop ina selepne toman poa palamsiekpa, ul palamlum. Ina selepne toman ul palamlumdi, mema yubu lerop kom mema phalamlum. 3 Ane sembe wene Allah Yameri nimiag yubu tarelamsilne sembe ambatnuahin. Allah Yameri yubu tarelamsilne pere agha nimiri Yesusag yo'orop yubu lemnep kom. Apna “Yesus nu Saelba Uhiropne wamla,” aro yubu lemnepna, ot Allah Eldamne Yame Walingeri yubu tarelamsilne agha lemnep.4 Wene aro lemnaba, Allah Yameri nimiag tatsinepne a'ero-a'ero tarelamsil aghana, Allah Yame ot nhonog wamla. 5 Nuri awe a'ero-a'ero wero anep aghana, awe ngainge poneko nu Saelba Uhiropne ot nhonog wamla. 6 Nuri toro poa tongkanepne a'ero-a'ero tol tongkanep aghana, Nuni Allah ot nhonog wamlange ponekori nimi niag nia mangkina awe tolamla. 7 Allah Yameri nimi a'ero-a'ero tarelamsilne, “Sin mamun mikip neneldalamukang,” aro tarelamsildi, lag neneldalamla. 8 Allah Yameri tarelamsilne pere agha nimi nhonag wana toro heksirop yubu elag tatnepba, yubu lemnep. Yame nikne enekori ora nimiag el nenelamsilne pere agha ora nimi enekori el nenero yubu ambatsinep. 9 Ora nimiag Yame nikne enekori wana khaptopne tarelamsilne sunsunum uro nimi enekori ul palamnep. Ora nimiag Allah Yame ot nhonog wamlange enekori tarelamsilne pere agha nimi enekori nimi nong whelamsinep. 10 Allah Yameri tarelamsilne pere agha ot Allahri uanepne nimi nhondi kekneba “Yaghe, mane agha ual,” senen kekneba ulamnepba, nimi nhondi Allah silimu yubu tipto ambarelamsinep. Allah Yameri ora nimi el nenelamsilba, yog nimiri lero uropne ka'ebi agha nimi enekori el wamnepnena, “Allah Yameri lero ulamla to, phiari lero ulamla to,” aro seneragto tam karebi agha el wamnep. Allah Yameri tarelamsilne pere agha nimi nhondi el ekon yubu ora nimiri yubu ka'eptanep kom yubuag lelognep. Yame enekori ora nimiag tarelamsilba, nimi enekori el ekon yubu ka'eptanep kom yubu ka'ebi agha seneragnepti, yubu tipto ambarelamsinep. 11 Ni lemnange aneko ot Allah Yame nhonogne enekori ulamlari, Eldi wanaag, “Tatsisene,” seneropne agha a'ero-a'erop nimiag pogto tarelamsil.
Nong nhonag yan sae nia wamlange a'ero-a'ero tiptangkamnepne sembe
12 Tam nene sembe sunumna nhon sumbatsinun. Nimi nong anena, ot nhonog wamla aghana, yan sae nia mangkina nongag wamlange maikno wamlari, tiptangkamlangena nimi nong nhonag tiptangkamla. Ane saog uro Kristus nongag tiptangtop nimi wamap. 13 Kristus nongag tiptabungena, Allahri Yame ot nhonog wamlange eneko nunag pelengkatsiogne pere agha nong nhonag ma'abahiog. Yahudi nimiap, Yunani nimiap, nimi arukna tangtop nimiap, nimi arukna tangtop kom nimiap nunag mag tebatsiloa saog uro Yame nikne nunag tatsiogneag agha nong nhonag ma'abahiog.
14 Nimi nong wamnepnena, yan sae nia mangkina nongag uropne maikno wamna taneogna nimi nong nhon wali wamnep. Nimi nongag uropne nhonog wamnaba, nimi nong wamnep kom. 15 Sununma sumbatsinun. Nimi yan nhon nongag tiptandi, yubu lelamnari, “Na wamnange na sae wamna kom ane sembe, nongag ma'aptangkamna kom,” aro lemnep. Undo lepso, tanena yan eneko nongag agha a'eptanep to, kom to? 16 Nen nhonna, ao nhon nimiag usoghag tiptangkamnari, yubu lelamnari, “Na wamnange na haing wana kom ane sembe, nongag meptangkamna kom,” senep tanena, ao eneko nongag agha a'eptanep to, kom to? 17 Ao eneko nongag agha a'eptandi, nimi nongag ot haing wana mo wamla tanena, nimi eneko yubu lilim ka'ebanep kom. Nimi nongag ot ao mo wamla tanena, nimiri ulomag song uropne wamnep kom. 18 Aghana Allahri nimi nongag wamlange a'ero-a'ero o'obaognena, Eldi wanaag, “Undo sumbahisene,” sembaogne sunsunum uro o'obaog. 19 Nimi nongag uropne nhon mo wamnaagna, nimi nong wamnep kom. 20 Ane sembe yan sae nia mangkina nongag wamlange maikno wamnep aghana, nong nhonoghag tiptangkamla.
21 Nimi nong nhonag haing wana wamnangeri saeag yubu lelamnari, “Na saeri saelbanep kom aghana na an sembe teko kom,” aro sae enekoag yubu lemnep kom. Usogti babe yanag yubu lelamnari, “Na yan pinep kom aghana na an sembe teko kom,” aro yan enekoag yubu lemnep kom. 22 Nhondi nhonag, “An sembe teko kom,” aro yubu lemnep kom aghana, seneraglamsut. Nu mog so'oag nimiri nongag wamlange nhon-nhon sembe pesange senelamap aghana, pesange senelamapne neneko nongag wamna koma nu kamag wamnep kom. 23 Nuri nongag wamlange sembe, “O'omne kom, ot sop-sop uropne wamla,” senen nongag uropne kwiria elekanep andarina, wali sirik saogne kemeptanep. Apna nuri nongag uropne nu ali neneptanepnena, wali uro seneragto kaluldalamap. 24-25 Ot nuri nongag wali kemerop wamlange sembe wali uro o'oban koma mo liamnep. Aghana nimi nongag wamlange nimiri haing sek uro kemeropne sembe Allahri, “Wali uro o'omne nenelamukang,” aro nimi nongag ma'aro o'obaog. Undo nimi nongag uropne o'oro ma'alamsiog andarina, yan sae nia mangkina nongag wamlange aneko a'eptan koma wali uro sin mamun o'ona seneldalamukang. 26 Nimi nongag uroba nhon seklenne seklelamla tanena, nimi nong eneko ni seklenne seklelamla. Nimi nongag uroba nhon paliag nenero kiptopne tal tanena, nimi nong eneko ni kiptopne nene sembe awi senelamla.
27 Wene aro sunumna sumbatsinne eneko sembe, a'un Kristus nongag ma'aptangtop nimi wamlomdi, a'ero-a'ero yan sae nia mangkina nongag tiptangtopne saog wamlom. 28 A'un Kristusag wana paliro winiptangtop nimi sembe Kristusti nu wepto pogsiog nimi sam sekililamsiog. Phendepne Allah yubu silimu tiptop nimi sekililamsiog. Wilindipne Allah yubu amoro ambatsirop nimi sekililamsil. Amiknena, ot Allahri uanepne saog uro kekneba ulamnep nimiap, Allah Yameri tarelamsilne agha nimi nong whesirop nimiap, yepsirop nimiap, tam lelekto kop-kop tagto kareptop nimiap, sin ekon yubu ka'eptanep kom yubuag lero ambatsinep nimiap Allahri toro sekililamsil. 29 Nhin nimi Kristusti wepto pogsiog nimi wamang kom. Nhin nimi Allah silimu yubu tipto lerop nimi wamang kom. Nhin nimi Allah yubu amoro ambatsirop nimi wamang kom. Allah Elmori uanepne saog uro nimi niri sae pere agha kekneba ulamang kom. 30 Allahri nimi niag, “Nimi nong whelamsukang,” aro mikipne tarelamsil kom. Sin ekon yubu ka'eptanep kom yubuag nimi niri lero ambarelamsiang kom. Sin ekon yubu ka'eptanep kom yubu ka'ebi agha nimi niri seneragto yubu tipto ambarelamsiang kom. 31 Aghana a'undi wana yengag agha, “Allahri nubu uro tarelamsilne nanag taho,” aro seneraglamlulom.
Ot wenena, ul pinep ina wali sirikne a'unag lag nembatsinun.