11
1 Nari undo Kristusag nelepto ul palamna saog uro a'undi babe nanag nelepto ulamlulom.Allah omekto winiptangtobag ulamnepne sembe
2 Nari samenag a'un yubu ambarelamsisinge wali ka'elamlum. Wene babe nari ambatsirop yubu ni ekon tan koma salero ul palamlomne sembe, “Wali ulamlom,” aro kiplamsin. 3-9 (3-4a) Aghana, “Allah yubu lero winiptangtobag ulamapne sembe el talulom,” aro wene ambatnuahin.a Nengabo ni sembe Kristus poneko usog wamla. Apna kelabo ni sembe nengabo usog wamla. Tanena Kristus poneko sembe Allah usog wamla. (7b-8) Allahri nengabo sam sunulamogti, “Na nong yameap seneragnaap sunsunum uro nimi sumbanun,” seogti sumbaogpa, nengabo sumbaogne ponekori Allah paliag nembanepneog wamla. Aghana kelabo enekona, nengaboag agha tobogti, kelabo sumbaogpa, nengabo yepto paliag nembanepne wamla. (8-9) Nengabo sumbaognena, “Kelabo yeplul,” aro kelabo lagto tobogneag agha nengabo sumbaog kom aghana, “Nengabo yeplul,” aro nengabo lagto tobogneag agha kelabo sumbaog. (7a) Ane sembe nengabori nimi whingag Allahag mololamna to, Allah yubu silimu tipto lelamna to, tanena nimi enekona usog kaluptangka yubu lepseng kom. (4) Nengabo etneri el usog kaluptangka nimi whingag Allahag mololamna to, Allah silimu yubu tipto lelamna to tanena, el usog Kristus poneko paliag nemban koma umag nenerop. (5a) Apna kelabo etneri el usog kaluptan koma nimi whingag Allahag molorop to, Allah silimu yubu tipto lerop to tanena, el usog ela'ange poneko paliag nemban koma umag nenerop. (5b-6) Kelabo nhon usog hong kereptangtop to, usog hong kareptangtop tanena, keleneko eldangkel ali neneptanep. Undop pagha tanena, kelenekori usog kaluptanep. Nimi whingag kelabo usog kaluptangtop kom kelna, usog hong kereptangtop saog urop kel wamla ane sembe, usog kaluptangtop kom tanena, usog hong kerebale.b 10 Ane sembe imagnang malaikat Allah whingag sindam nimi kaluptangto wamang saog uro, kelabo babe sikina'ange umag wamangne sembe sindam nimi usog kaluptaheng. 11 Undop aghana, nu Saelba Uhiropneap ma'aptangkamap tanena, nengabo kelabo a'eptangkom agha nhon mo wamnep kom. 12 A'eptangkom agha nhon mo wamnep kom sennena, Allahri nengaboag agha tobogti, kelabo sumbaog saog uro, nengabo ot kelabori mangaropne pere agha wamnep. Aghana ni Allahri saeag agha wamla.
13 A'undam nimi sembe seneraglapmundi, tam karebalulom. A'undi seneraglapmunneag agha, “Kelabori usog kaluptan koma nimi whingag Allahag molorop tanena, sunsunum to kom to,” aro seneraglamlom? 14 Nimiri sop-sop ul piropne kembi agha nu el tanep. Nengabo usog hong wea laplolorop tanena, ali neneptangtop. 15 Aghana kelabo sembe Allahri usog hong we uro wamnepne kelaboag tatsiog andarina kelabo usog kaluptanep. Kelabo usog hong wea laploro siriktop tanena, nimiri keleneko sembe kemerop kel sembanep. 16 Nimi nhondi tam nene sembe, “Undo seneraglamna kom,” sembanep aghana, nuri ul palamapne babe, Allahri weplamsilba winildalamang nimiri ul palamangne babe ot nari lemnange sunsunum uro ul palamap. Orange ul pirop kom.
Yesus tebaogne seneragto kwaneng rotiap maghap telamekne sembe
17 Nen tipto tam nhon sembe a'unag yubu ambatnuahin nena, “Walinge ulamlom,” aro omekahinep komdi lemnuan. A'un nikag winildalamlomdi, nimi wali yepsinepne ulamsom aghana, olog malinge ulamlomne sembe lemnuan. 18 Alnirobagna, nimiri yubu ambarelamneangag ka'elamnaba, a'un winildalamlomdi, a'un mamun waptangto mombolag neneldalamlomne sembe nimiri ambarelamneangba ka'elamna. A'un waptangto mombolag neneldalamlomne sembe ka'elamna yubu enekona, “Sik to kom to,” aro wana phende nenelamnel aghana, “Sikne lelamang diog,” aro seneraglamna. 19 Yo sik, na el wamnangena, a'undi seneragnaag a'ero-a'ero mibildalamnepneog wamla andarina, “A'un mamun agha nimi etne agha sik nimi,” aro el tangtopne lag tahilul. 20-21 Undo wamnep aghana a'un mamun waptangto ulamlomne sembe ka'elamnoba a'un, “Kwaneng nhon tukap,” aro winildalamlomag agha, a'un nimi niri, “Na sam tel pineba, orangeri amik kwaneng tukang,” aropne agha ulamlom. Nimi nhon kwaneng yo wamnepba, orangeri mag yonge aboap sembe teropneag agha nenek salerop nimi saog tanep. Ane sembe nu Saelba Uhiropne ponekori samenag, “Undo nanag seneraglapmundi, kwaneng pogto telamlulom,” aro aruksiropne sunsunum uro telamlom kom. 22 A'un kwaneng yo, mag yo uahinba, a'undi ae lomag kwaneng mag tenep kom te? Sae agha orog nimi sembe ali nenelamsilomdi, Allah Eldi kelmabo me winiptangtop nimi sembe teba'en nenelamsiloa saog uro ulamlom. Undo unulamlomne sembe nari a'un omekahinep senelamlom te? Undo unulamlomne agha nari a'un omekahinun kom.
23 Nari a'un omekahinep komne tam nene sembe. Nu Saelba Uhiropne ponekori yubu nanag ambatneogpa, a'unag babe ambarelamsino. Yubu tipto ambarelamsinori, “Nu Saelba Uhiropne Yesus pan khelamog sumeneko ae imbaogpa, kwaneng roti tobogti, 24 ‘Wali tatsilam,’ aro Yesusti Allah omeklamogti, roti khebaog. Kwaneng roti kheplamogti, “Nari nong ane a'un sembe tarelamsin. Wene kwaneng roti telamap saog uro a'undi amik telapmun sum babe Na sembe ekon tan koma seneraglamnumundi telamlulom,” aro ambatsiog. 25 Kwaneng roti tatsiogpa teekpa, roti tatsiogne saog uro mag anggur lolterop mag ma'i babe tobogti ambarelamsiogti, “Anggur mag lolterop mag ma'i ane salag wendogne Nari eneng agha yubu lero palilamnange sembe tarelamsin. Mag ene amik telapmun sum babe Na sembe ekon tan koma seneraglamnumundi telamlulom,” aro ambatsiog. 26 “Seneraglamnumundi telamlulom,” seogne sunsunum uro kwaneng eneap mag eneap telamlomne pere agha nu Saelba Uhiropne poneko tebaogne lag nenero ambarelamsilom. El tebaogne lag nenero ambarelamsilomne neneko el anam samoro yan komag tipto seneragto telamsut.
27 Nu Saelba Uhiropne ponekori, “Undo nanag seneragto kwanengap magap telamlulom,” seog ane sembe, nimi etneri kwaneng ene to, mag ene to Elag wali uro seneragna koma salik-malik terop tanena, nu Saelba Uhiropne nongap eneng lambaogneap taba'en senero malia urop. 28 Anam ten komag nimi nhon eldam nimi wali uro kemeldalamleri, “Sikne ulamna to, kom to,” aro seneraglamle taneogna, kwaneng roti kheptobaap magap telamlul. 29 Undo seneragto telamlulom nena tam nene sembe. Nimi etneri kwaneng rotiap magap tero, “Nu Saelba Uhiropneri nong seneragto telamap,” aro seneragna koma terop tanena, kwaneng rotiap magap teropne pere agha eldamneag tam piptangtop. 30 A'undi seneragna koma telamlom ina agha a'un nimi maikno nong pesa talamlomdi, naikna naiklamlom. A'un nimi yogne babe olog maikno teplamong. 31 Aghana nundam nimi wali uro kemeldalamseberi, “Sikne ulamna to, kom to,” aro seneraglamsebe tanena, Allahri nunag tam pipsiso kom. 32 Aghana nu Saelba Uhiropne ponekori nu sembe tam kemero karebarelamsilne pere agha nu el nenero wenelamsil. Nu el nenero wenelamsil, andarina amik tam kemero karebatsileri, tam paliro opsinep sumeneko mog so'oag urop nimiap nhon ma'aro nu opsilul kom.
33 Ane sembe, nangkabo, nu Saelba Uhiropneag seneragto, “Kwaneng nhon tukap,” aro winildalapmundi, a'un mamun ora nimi tiro kwaneng nhon nikag telamlulom. 34 “Tam a'unag pelengkatsileag,” aro wembanuahin. Wenelamsin nena, a'un nikag winiptangtop sumeneko taleba, nimi nhon kwaneng yo ulamleba, eldi aeag sam kwaneng telamle andarina, a'un winiptangtobag aneko salik-malik uro aboap sembe kwaneng telamlul kom. Amik a'unag yaneri, yogne babe nen tipto o'obahineri, yubu ambatsinun.