Mema pharopne sembe wenero ambatsiogha
10
1 Nangkabo, wene aro lemnaba, a'un Yesusag wana palirop nimi wamlomba, nu Israel nimi nunisangyabori ulamekpa, sinag uro yabiogne sembe ekon uro wamnep kom sembamna. Nunisangyabo ni toa sektopne menangalamogpa nelepto palamek. Palameka mag longorop mag laut abolag piekti, mag longorop mag aneko tara-tara karepto marukaogpa, nusam toman ni kauro piek. 2 Toa anekoap mag longorop mag lautap abenekoag pelengelamsiloa saog uaogne pere agha Musari yubu sik senelamekti nunisangyabo niri elag nelepto palamek. 3-4 Allahri tatsiog kwanengap maghap sin nimi ni tanekori telamek. Mag telameknena, Allahri mag tebatsinun aro uaogpa, kirikag agha mag la'imbaogpa telamek. Kirik agha mag la'imbaog kirik enekona, sinap nhon yabalamogne eneko Kristus wamogti, mag tebatsiogpa telamek. 5 Mag tebatsiogpa, sin ni tanekori telamek aghana, nimi ni taneko sembe Allahri wali sembahiog kom, ot nimi ologha sembe wali sembahiog. Wali sembahiog kom ane sembe sin nimi maikno pai aldesag teplalaghek.6 Sin nimi tanekori, “Allahri nunag, ‘Uaheng kom,’ seogne uahabe,” aro wanaag seneraglamekti tebaek. Sinag uro yabiogne nu sembe sunumna taogpa, nu el tanep nena, “Sindi malia ulamekne saog uro ulamukap kom,” aro el talamukap. 7 Sin nimi nhon-nhondi Allah wail ibare agha mema phalamek. Tam nene sembe mome toro palilamogti, “Sin nimi tanekori, ‘Kwanengap maghap tukap,’ aro pul kanelamekti, ‘Mema phabaukap,’ aro septo sekel pina phalamek,” aro mome toro pibog. Sindi Allah wail ibare agha mema phalamek saog uro ulamseng kom. 8 Sin nimi nhon-nhondi nengaboap kelaboap salik-malik waleptangto ulamekpa, nimi teng-tengne (23.000) ik nhon sum agha tebaek. Sindi salik-malik waleptangto ulamekne saog uro ulamseng kom. 9-10 Sin nimi nhon-nhondi, nu Saelba Uhiropne poneko miplamekpa, pagheri si saplamsiekne agha tebaek. Orangeri Elap yubu toraplamekpa, imagnang malaikat nhon poghogpa opsiog. Sindi nu Saelba Uhiropne poneko yubu torapto miplamek saog uro nuri yubu torapto mipseng kom. 11 Sinag uro yabalamogne pere agha, “Undo unuaheng kom,” aro nu el nenero sunumna sumbarelamsiogti, mome toro pibog. Samenag sindi, “Amik uro yabilul,” aro nang-nang aro ulamekne nu wene wamap li ko'o enekoag lag tangto yabiog.
12 Nu sembe sunumna sumbarelamsiogti, mome toro pibog ane sembe, a'undam nimi sembe, “Mikip uro sekamna,” aro seneptangkamlom tanena, “Eba timbaneag,” aro yae uptangkamlulom. 13 Sa'a-sa'ari a'unag uro yabalamlangeri miplamsil tanena, tam nene ot mog so'oag nimiag uro yabinepne mo wamla. Allah Elmo Sikne wamlaba, nimiri Elag wana piamnepne poneko wamla ane sembe, tam ikinne a'un mori sa'obanep komne a'unag timbaleba, sae lipsilul kom. Sa'a-sa'ari a'unag uro yabalamlangeri miplamsil tanena, Allahri yeplamsil andarina, a'un la'imbanep ina yarebarelamsilba, a'undi wana palingkina ulapmundi, miplamsilne nenekoag agha la'imbalulom.
14 Ane sembe, nangkabo wanaag nimi wamlomne, mema pharopne neneag agha koloptangto elem uro laplobi agha weag nembalulom. 15 A'un wanaag wali uro seneragnep nimi wamlom ane sembe, nari a'unag ambarelamsinne seneragto wali uro tam karebalulom. 16 Nu poloro winiptangtop aeag mag tero, “Wali tatsilam,” aro kipto telamap mag enekona, Kristus eneng lanaro tebaogne nunag ma'aptalne sembe mag telamap. Apna, nu poloro winiptangtop aeag kwaneng roti khepto telamap kwaneng anekona, Kristus nong obekne nunag ma'aptalne sembe kwaneng telamap. 17 Kwaneng roti anena ot nong nhonog wamla ane sembe, kwaneng nong eneko khepto nun nimi niri pogtangto telamapne toman agha nu nimi maikno nong nhonog nenelamsil.
18 Israel ponekori mangaroba mangarobari mangalamsiang nimi sembe seneraglamsut. Sin Israel nimiri sae agha memnang Allah sembe pairopnangdi pogtopne aukag taro palilamangpa, pogtopne telamang tanena, “Allahap ma'aptaukap,” aro pogto telamang. 19 Undop pagha tanena, ora nimiri phia pharo saeri sunuroba mema yogne sembe palirop kwaneng telamang tanena, “Mema anekoap ma'aptangto terop,” aro seneragnep. “Mema yogneag mikiba nubunge wamla,” aro lelamna kom. Apna mema yogne sembe kwaneng paliropne sembe babe, “Kwaneng nongag mikipne wamla,” alamna kom. 20 Mema yogneap, kwaneng anekoap tam o'omne senelamna kom aghana, nimiri mema yogne sembe palirop tanena, Allah sembe palilamang komdi ot, “Phia phabaukap,” aro palilamang. “Phia phabaukap,” aro kwaneng paliropti, pogto teropne sembe, “A'un phiaap ma'aptaheng kom,” aro seneraglamnari wenelamsin. 21 Nu Saelba Uhiropne poneko eneng lanaro tebaogne sembe a'undi seneragto mag terop tanena nimiri, “Phia phabaukap,” aro mag ikto paia urop mag babe a'undi tenep kom. Nu Saelba Uhiropne tebaogne sembe a'undi seneragto kwaneng nhon terop tanena nimiri, “Phia phabaukap,” aro kwaneng palirop kwaneng babe a'undi tenep kom. 22 Nuri wanaag log kom uro, “Nu Saelba Uhiropne poneko pesange wamlaba, nu mo mikip nimi wamap,” aro ulameberi, wana yongeag agha wabahinepne apto aukap te?
Yesusag wana palirop nimiri Allah paliag nenero kipto ulamnepne sembe
23 A'undi yubu lelamlomdi, “Nunag iriksin yubu orogti nia mangkina ulamnep,” alamlom. Sikne lelamlom aghana, nimiri nia ulamnepne neneko agha, ot nimiri uropne nhon-nhondi nimi yepsinep. “Nimiri nia mangkina ulamnep,” aghana ot nimiri uropne nhon-nhondi nimi mamun mikip neneptanep. 24 Nimi nhondi babe el mo tup neneptangtopne ero neleplamseng kom aghana, ora nimi yepsinepne elapmundi, ul palamlulom.
25-26 “Mog so'o ene babe, nia mangkina mog so'oag wamlange babe nu Saelba Uhiropne ponekoringe wamla.” Ane sembe nimiri teroba, “Kamna kapto tobaukang,” aro pail pirobag pailalamikpa tolapmun tanena, “Mema sembe pibom to, kom to,” aro haibahin koma toro tenep.
27 Yesusag seneragtop kom nimi nhondi an yoplangkeleri, “Nikag kwaneng tununam,” seleba an yeng tanena, wali tel pululam. Ni an whingag palilamleri, “Kwaneng nhon tununam,” aro tatkelenge sembe, “Mema sembe pibom to, kom to,” aro haiban koma tenep. 28-29 Aghana tatkelenge sembe nimi nhondi anag lag phoro, “Mema sembe pibori wene pogto tarelangkel,” sele tanena, teheng kom. “Teheng kom,” alamnangena, andamneri wanaag seneragtopne sembe, “Teheng kom,” aro lelamna kom. An mo wanaag agha, “Hae tenep,” aro seneraglapmen tanena, hae tenep. Aghana nimi nhondi anag lag phoro, “Mema sembe pibo,” aro ambatkele nimi sembe babe, ambatkele nimiri wanaag seneragnange sembe babe, “Teheng kom,” aro wenelangken. Nimi enekori an sembe tam karebi agha, “Malia ulamla,” aro wanaag seneraglangkeleagti, “Teheng kom,” aro wenelangken. 30 Nari tam nene sembe yubu lelamnangena, nari tenepne sembe Allahag, “Wali tatnelam,” aro kipnari wali tenep. Allah kipnari, wali tenep aghana nimiri, “Malia ulamla,” aro san tilibaneikagti, na hae ten koma wamnep.
31 Ane sembe a'undi kwaneng telapmunne babe, mag telapmunne babe, nia mangkina ulapmunne babe, “Allah kiplamneri, si paliag nembanun,” aro ulamlulom. 32-33 Yahudi nimi sembe babe, Yunani nimi sembe babe, Allahri kelmabo mabo Yesusag wana paliro winiptangtop nimi sembe babe, “Sin taulbahinep ina punpun tiptoba pimnun kom,” aro ulamlulom. Nari babe nia ulamnangeag agha na mo tup neneptanepne ero neleplamna kom aghana, nimi maikno yepsinepne elamnari, ul palamna. Nia mangkina ulamnangeag agha, nari yeng uro senelamnange, “Nimi niri wali sembaikti, nari yubu ka'ebaikpa, Allahri taulbahilul,” aro ulamna.