Allah Yameri yubu tatsinepne sembe ambatsiogha
14
1 O'ona senehiropne ul palamlulom. Allah Yameri tatsiropne sembe, “Nanag taho,” senelapmunne nenena wali. Ot wali sirikne “Nanag taho,” senelamlulom nena, “Allah Yameri nari wanaag yubu tatnehoba, nimiag Eldi yubu silimu tipto ambatsisene,” senelapmunne nenena wali sirik. 2 “Allah yubu silimu tipto ambatsisene,” senelamlulom sennena tam nene sembe. Allah Yameri ora nimi ekon yubu ka'eptanep kom yubu nimi nhonag tatlaba, lelamla tanena, ora nimiag lelamla komdi, ot Allahag mo lelamla. Yubu lelamla yubu eneko Allah Yameri tognorop yubu nimi enekoag mo tattop yubu agha ora nimiri ka'ero seneragnep kom yubu lelamla. 3 Aghana nimi etneri Allah yubu silimu tiplamlari ambarelamsil tanena, wana aingnibahinep yubuap, wana khabahinep yubuap, mikip nembahinep yubuap nimiag ambarelamsil. 4 Allah Yameri ora nimi ekon yubu ka'eptanep kom yubu nimi nhonag tatlaba lelamla tanena, nimi eneko eldamne mo mikip neneldalamla. Aghana nimi nhondi Allah yubu silimu tiplamlari, nimiag ambarelamsil tanena, Kristusag wana paliro winiptangtop nimi mikip nenelamsil. 5 Na yeng uanepnena, “Allah Yameri a'un nimi niag ora nimi ekon yubu ka'eptanep kom yubu tatsisoba, Allahag yubu lelamseng,” senelamna. Aghana na yeng maikno sirik uanepnena, “Allah Yameri a'undi wanaag yubu tatsisoba, nimiag Eldi yubu silimu tipto ambatsiseng,” senelamna. Undo uro yabinep tanena, na yeng maikno uaneho. Allah Yameri ora nimi ekon yubu ka'eptanep kom yubu nimi nhonag tatlaba, ora nimiag tipna koma ora nimiri seneragnep kom yubu lilim lelamlange nenena olog wali. Aghana Allah Yameri nimiri wanaag tatlaba, ora nimiag Allah yubu silimu tipto seneragnep yubu lilim lelamla tanena, Kristusag wana paliro winiptangtop nimi mikip nembahinep yubu ambarelamsilba, ka'elamangne nene wali sirik.6 Nangkabo, nari wene a'unag lelamnangena undo. Allah Yameri a'un ekon yubu ka'ebanep kom yubu nanag tatnehoba, a'unag ambarelahiseneri, a'undi yubuag tipna koma lelamsene tanena, a'un yepsinep kom yubu mo wamnep. Ot Allah Yameri nanag ambarelamneleri, tognoroba lag nenerop yubu to, el nenehirop yubu to, Allah yubu silimu nimiag tipnep yubu to, nimi amoro ambatsinep yubu to tatneleba, nari a'undi yubuag tipto ambarelamsine taneogna, a'un yepsinep yubu talul. 7 Tam nene sembe lebe arop komneag sunumna tol pina sumbatnuahin. Nimiri lebe arop koma agha ma'i lom pho alamnari, yubu lilim lambanep. Lebe arop komne pingpong yubu neneroba kecapi babe kerekandi olamnari, yubu lilim lag nembanep. Nimiri wali uro o'obandi, ma'i lom pho alamna to, pingpong yubu neneroba kecapi kerekandi olamna to, taneogna ora nimiri wali uro ka'ero seneragnepti sepnep. 8 Ma'i trompet lom pho alamnari, yubu lilim lero la'imbanepne babe, mal tangtop nimiri, “Mal tabukapti, wero wamlulom,” aro trompet pho aro sikinkabo el nembahinep. Pho aro el nembahinep aghana, salik-malik pho alamnari, yubu lilim lero la'imbanepne tibin kom tanena elkabori, “Sa'a sembe pho alamla,” aro wanaag ekon uro wamnepti, mal tabanepne sembe weamna koma saog wamnep. 9 A'undi pamag agha lanarop yubu babe, Allah Yameri ora nimi ekon yubu ka'ebanep kom yubu a'unag tatsileba, nimi yubuag tipna koma lelapmun tanena, ora nimiri ka'elobi agha seneragnep komdi, mo ekon uro wamnep. Undop pagha tanena, a'undi yubu lilim lelapmun yubu eneko phoanari pabiloa saog uro kom tanepneog wamnep. 10 Mog so'oag nimi tala-tala wamang nimiri sik uro yubu maikno a'ero-a'ero lelamang. Yubu lerop nimi tala-tala wamang nimi niri, “Nari seneropne agha el taukang,” aro yubu lelamangne nhonne babe seneragnep kom yubu mo mipto salik-malik yubu lelamang kom. 11 Ane sembe, nimiri nanag yubu ambarelamnel yubu ka'ebanep komdi, seneragna kom tanena, nimi eneko na sembe nimi ekonne ka'ebanep komne mo wamnep. Apna nimi eneko sembe na babe nimi ekonne ka'ebanep komne mo wamnep. 12 Ane saog uro, a'un mamun ekon yubu ka'eptanep kom yubu lelapmunagti, seneragto lero ulamlulom. A'un wali ulamlomnena, Allah Yameri a'unag tatsinepne sembe, “Topsebe,” aro yeng senelamlom. Ane sembe, a'un Kristusag wana paliro winiptangtop nimi mamun mikip neneptanepne o'omne nenero, “Tatsiso,” aro sarekareplamlulom.
13 Ane sembe, Allah Yameri a'un ekon yubu ka'eptanep kom yubu tarelamsilba, Allahag mololapmundi, “Ora nimi mikip nembahinep yubu tipto ambatsinep yubu tatnululam,” aro mololamlulom. 14 Allah Yameri na ekon yubu ka'eptanep kom yubu nanag tarelamnelba, Allahag yubu lero mololamna. Nari wanaag agha Allahag moloro lelamna aghana, nari seneragnep kom yubu agha mololamna. 15 Wene aro lemna pagha tanena, nari uanun senelamnangena, nari wanaag babe, nari seneragnangeag agha babe Allahag mololamnun. Apna nari Allah omektopne seplamnunne, nari wanaag babe, nari seneragnangeag agha babe omekto seplamnun. 16 A'un winildalapmundi, Allah Yameri tatsirop yubuag agha Allah omeklapmunba, ekon urop nimi a'un nusamag wamnep. A'un ekon yubuag agha Allah kipto omeklapmunba, ekon nimi a'un nusamag wamnep nimi tanekori a'undi yubu lelapmunne ka'ero seneragnep komdi, “Sikne agha lelamang,” aro seneragnep komdi, saekag lemnep kom. 17 A'undi sik uro wali uro Allah omeklamnep aghana, a'un nusamag wamnep nimi eneko seneragnep kom tanena, mikip tan koma ekon uro mo wamnep.
18 Allah Yameri ora nimi ekon yubu ka'ebanep kom yubu tarelamsilne neneko, a'unag olog tarelamsilba yubu lelamlom. Ot nan agha maikno sirik uro tarelamnelba, yubu lelamna. Tarelamnelne nene sembe “Wali tatnelam,” aro Allah omekto kiplamna. 19 “Wali tatnelam,” aro omekto kiplamna aghana, Kristusag wana palirop nimiap winildalamapti lelamna tanena, ot nimiri ka'ebanep yubu mo lemnun senelamnari lero amberelamsin. Allah Yameri ora nimi ekon yubu ka'ebanep kom yubu tarelamnelne agha yubu tam teng-tengne ambatsinep. Aghana nimi winiptangtobag wamna tanena, ka'ebanep kom yubu lilim teng-tengne ora nimi yepsinep kom yubu laplopneri, sin ka'ebanep yubu ologha wamnep yubu agha amoro ambatsisene taneogna wali senelamna.
20 Nangkabo, a'undi seneraglamlulom nena, me ologneri seneraglamangne saog uro seneraglamseng kom, aghana nong nimiri seneraglamang saog uro wali uro seneraglamlulom. Ot olog mabori malinge uan koma ulamang saog uro olog mabo saog wamlulom. 21 Mog so'oag nimi tala-tala wamang nimiri yubu leropne sembe Imap So'oap Ngainge ponekori Yahudi nimiag yubu lelamogti,
“Nimi tanekoag yubu ambarelamsineri,
Sin ekon nimiri yubuag agha babe,
ora nimiri pamag agha babe ambarelamsinun aghana,
Nari yubu ka'ero ulamukang kom,”
aro lebogpa, Yahudi nimi aruksirop yubuag mome toro pibog.
22 Yubu ene agha el talamapnena, Allah Yameri ora nimi ekon yubu ka'eptanep kom yubu tatsiropba lelamnep nena, Kristusag wana palirop nimiag yubu ambatsinepne sembe tatsirop kom. Ot wana palirop kom nimiri ka'elamnepti, “Yaghe, Allahri ulamlange agha lelamang,” aro seneraglamnepne sembe Allah Yameri sin ekon yubu tarelamsilba lelamang. Aghana Allah Yameri nimi wanaag yubu tarelamsilba, nimiag Allah yubu silimu tipto ambatsinep yubu eneko Kristusag wana palirop nimi mikip taukang aro tarelamsil. Wanaag yubu tarelamsilba, nimiag Allah yubu silimu tipto ambatsinep yubu eneko Kristusag wana palirop kom nimi sembe tarelamsil kom. 23 Ane sembe a'un Kristusag wana palirop nimi ni nikag winildalapmunba, nimi nhon Kristus sembe ekondi elag wana palirop kom nimi a'un nusamag wa'inep. A'un nimi niri lelapmundi, el ekon yubu ka'ebanep kom yubu lelapmunba, nusamag wa'ile tanena, eldi a'un sembe nenek salehirop nimi sembahinepne wamla. 24-25 Aghana a'un Kristusag wana palirop nimi winildalapmundi, a'un nimi niri Allah Yameri yubu tarelamsilenge sunsunum uro tipto ambareldalapmun tanena, nimi nhon Kristus sembe ekondi elag wana palirop kom nimi wa'inep. Allah Yameri a'un nhinag yubu tarelamsil yubu ambareldalapmun yubu ka'ebaleba, eldi wanaag tognoro seneropne lag taleba, nimi enekori, “Yaghe, malinge seneragto ulamnoa sembe Allahri na omneleag,” aro sikne agha seneragnep. Undo seneraglamleri, yan sanukto u amupto Allah omeklamleri, “Allah a'un nusamag tapto ua ulamla,” aro lag phoro lemnep.
Kristusag wana palirop nimiri winiptangtobag agha lero ulamnepne sembe
26 Nangkabo, wene aro lemna tanena, “Nu winildalameberi hulamukap,” aro haiptanep. A'un mamun winildalapmundi, nimi nhondi, “Sepna nhon sebaukap,” sembanep. Nhondi, “Yubu amohinne ambatsinun,” sembanep. Nhondi, “Tognorop yubu Allah Yameri lag nembatnelba ambatsinun,” sembanep. Nhondi, “Allah Yameri ora nimi ekon yubu ka'eptanep kom yubu tatnelba lemnun,” sembanepba, nen nhondi, “Ora nimi ekon yubu leplange eneko Allah Yameri el nembatnelba, tipto ambatsinun,” sembanep. A'un nimiri, “Uaukap,” senelapmunne ni eneko, “Ot Kristusag wana palirop nimi mikip nembahinepne agha ulamukap,” aro ulamlulom. 27 A'un winiptangkapmunag agha Allah Yameri ora nimi ekon yubu ka'eptanep kom yubu a'un nimi nenneag tatsileba, “Lemnun,” aro ulamik tanena, nik sum salik-malik uro lemnep komdi, a'ero-a'ero lelamukang. Nhondinge komopto lepleba, nen nhondinge lunuro lemnep, aghana ot nimi phenderi to, wilindiri to mo lemnep. Tomne lemnep kom. Apna Allah Yameri tatsin yubu ora nimi ekon yubu sin ka'ebanep kom yubuag, “Lemnun,” aro ulamik tanena, winiptangkamna nimiag Allah Yameri ora nimiag mikip nembalengeag agha yubu tipto ambatsinep taneogna, Allah Yameri tatsin yubu ora nimi ka'ebanep kom yubu enekoag lemnep. 28 Winiptangto wamang nimi tanekoag yubu tipto ambatsinep nimi wamna kom tanena, Allah Yameri ora nimi ekon yubu ka'eptanep kom yubu tatle yubu eneko leplul kom. Allah Yameri nimi ka'eptanep kom yubu tatle yubu eneko ot nimi enekori wanaag Allahag mo leplul. 29 Apna Allah Yameri nimiri wanaag yubu tatsileba, “Nimiag tipto ambatsinun,” aro ulamik tanena, ot nimi phenderi to, wilindiri to, nimi tanekoag yubu tipto ambatsinep. Allah Yameri tatsirop yubu tipto ambarelamsiikpa, a'un winildalamlom nimiri ka'elapmundi, wanaag seneragto tam kareplamlulom. 30 Allah Yameri tatle yubu eneko nimi nhondi yubu tipto ambarelamsileba, ora nimi nhon ka'ero pulamleba, Allah Yameri el pulamle nimi enekoag tognoropne nhon lag nembatnep. Allah Yameri pulamle nimiag lag nembatle tanena, el yubu lelamle nimi enekori yubu lero komobi agha yubu kom talul. Yubu kom taleba, el pulamle nimi enekori nen alniro yubu ambatsinep. 31 A'un nimi nhindi Allah Yameri tatsirop yubu tipto ambatsinep ane sembe, “Nhondi lepleba, nhondi leplul,” aro o'obi agha lelamlulom. Undo lelapmun andarina, nimi ni mamun ka'eldalapmundi, el neneldalapmundi, wana mikip neneldalamlulom. 32-33 Allahri salik-malik ulamlange kom aghana, Eldi wepsirop kelmabo me winiptangtop nimi tala-tala wamang nimi ni sembe wana aingniro ma'alamsil. Ane sembe Allah Yameri nimiri wanaag yubu tatsileba, “Yubu tipto ambatsinun,” senelamik tanena, Allah yubu silimu tipto ambatsinep nimi enekori sindam nimi wana aingniro umag neneptangkamnepti lemnep.
34-35 A'un winildalapmunag kelabo yubu koma wamnep. Musari aruksirop yubu sunsunum uro kelabo taneko sindam nimi umag neneptanepneog wamnep ane sembe, Kristusag wana palirop nimi winiro haiptangtobag yubu lag nenero lelamseng kom. Nimi winiro haiptangtop nimi whingag kelabori yubu lag nenero lemnepne sunsunum urop komdi ali neneptanep. Ane sembe kelabo nhondi wanaag, “El tahane,” senelamle tanena, ela'angeap ae lomag wamdikti, hailamleri el talul.
36 Allahri wepsirop kelmabo me winiptangtop nimi tala-tala wamang nimi sembe yubu lemnange nene sikne agha lemna to, ot a'un mori Allah Yubu sam seneraglamomdi, sikne agha ulamom to? Ot a'undam nimi sembe seneldalamlom nena, “Allah yubu nunag mo lag tangto yabio,” senelamlom te? 37 A'un nimi nhondi eldamne sembe seneragheldalamnari, “Allah Yameri nanag yubu tarelamnel,” seneptanep. Nen nhondi, “Allah Yameri sik yubu nari wanaag tarelamnelba, tipto ambarelamsin,” seneptanep. Undop pagha tanena nimi enekori el tanepneog wamlangena, na Paulusti wene aro mome toro piamna yubu ene, “Ot sik uro nu Saelba Uhiropne ponekori, ‘Ulamlulom,’ aro aruksirop yubu wamla,” aro nimi enekori el tanepneog wamla. 38 Nari yubu ene sik yubu wamla aghana, nimi enekori el tanep kom tanena, ora nimiri nimi eneko sembe el tanepnena, el sik sembanep kom nimi sembanep.
39 Ane sembe nangkabo a'undi, “Nanag taho,” senelamlulom nena, “Allah Yameri nari wanaag yubu tatnehoba, nimiag tipto ambatsisene,” aro wana yengneag agha senelamlulom. Apna Allah Yameri nimi ekon yubu ka'eptanep kom yubu tarelamsileba nimiri lemnepne sembe irikaheng kom. 40 Ot nia mangkina ulapmunne neneko wali uro wilniro o'olapmundi, sunsunum uro ulamlulom.