“Nimiri malia uropne ya'ag kom talul,” aro Kristus ik nhonog tebaogha
10
Allahri Musa pere agha aruksirop yubu enekona,
walinge amik uro yabiropneag tol pina yame sunumna sunuro ambatsiog.
Amik uro yabiropneri ulamnepne nenekona,
aruksirop yubu enekori uanep kom.
Ane sembe sindi samenag pham sapiap kambingap oro Allah sembe palilamekne saog uro amik nimiri babe hengkun taibuka taubuka ulamogha abeneko Allah sembe palilamek.
Aghana sop-sop palilamekne toman agha malinge lupto sin poa yingkirop nimi wali nembahinep kom.
2 Ot ik nhon sum agha ni komopto wali nembahinep tanena,
malinge sinag wamogne ni lupto lambahinep.
Lupto lambahinep tanena,
sin Allah omeklamek nimiri wanaag,
“Malinge uanne tam kom nembal,”
aro seneraglamekne wana aingnibahiso.
Wana aingnibahiso tanena,
nen amik Allah sembe pham poa oro palilamseng kom.
3-4 Aghana hengkun taibuka taubuka ulamogha sindi pham sapi yemneap,
pham kambing yemneap oro Allah sembe palilamek.
Ot pham eneng anekori nimiri malia uropne lupto lanalomnep kom.
Ane sembe pham oro palilamekne nenekona,
ot sindi malia ulamekne sembe mo el nenelamsiog.
5 Ane sembe Kristus mog so'oag yaogne sembe Allahag lelamog nena,
“Nimiri pham oroba paliro tatnepneap,
yogne paliro tatnepneap sembe andi,
‘Topsene,’
sembalam kom.
Aghana nong nhon na sembe andi wero pipnelam.
6 Nimiri aukag tamnepneap,
malia uroba lunuro tatnepneap nimiri an sembe pimnepne nenekori
andi wana yeng nenelangkel kom.
7 Tanena nari yubu lelamsingena,
‘Na tane wamnange kembanohom.
Mome wa'amogtoba nhonag na sembe mome top taog.
Nani Allah,
andi yeng senelamlamne,
“Ul palamnun,”
aro yahi,’
sehi,”
aro lebogne mome top taog.a
8 Yubu eneag agha samenag lebog nena,
“Nimiri pham oroba paliro tatnepneap,
aukag tamnepneap,
malia uroba lunuro tatnepneap,
nimiri yogne an sembe pimnepneap sembe andi wanaag,
‘Topsene,’
sembalam komba,
pimnepne nenekori yeng nenelangkel kom,”
seog.
Wene seog aghana,
Musari arukahiog yubu sunsunum uro nimiri pimnepneog wamla.
9 Amikag lebog nena,
“Na tane wamnange kembanohom.
Andi yeng senelamlamne,
‘Ul palamnun,’
aro yahi,”
seog.
“Phendepne neneko ya'ag sekamlul,”
aro samenag nena kom nembaog.
10 Allahri seneropne enekoag agha Yesus Kristus eldamneri nong ik nhonog Allah sembe paip tangka tebaogneag agha malinge nunag wamnepne lubatsiogti,
nu Allah whingag yanep nimi nembahiog.
11 Ni memnang Allah sembe palirop nangdi sop-sop sekel pina,
“Yepsinun,”
aro samenag lebe aroba oro palilamek saog uro sap sarikto Allah sembe palilamang.
Ot lebe aroba oro palilamangne eneri nimiri malia uroba ik nhon babe lupto lanalomnep kom.
12 Aghana Yesusna,
el memne ponekori nimiri malia uroba ya'ag uro lupnepne nhonog Allah sembe pibogti,
Allah sae sirik sip pulinkiog.
13 Pulingkiogti nang-nangaro ulamla kekman Allahri el aisa nenerop nimi eldi yan mombolag pipsilul.b
14 Nang-nangaro pulingkiogti wamlangena,
eldi Allah sembe nhonog pibogne toman agha sin Allah whingag yanep nimi nembamsiog nimi taneko sembe malinge ni ya'ag uro lupto lambahiog.
15 Allah Eldamneri Yame Walingeri tam nene sembe nunag sikne lag nenero ambatsiog.
16 Allahri yubu ambarelamsiog nena,
“Amik sum nari sin nimiap yubu nikne nhon
salag pimnun nena lemnuan,”
seogti,
nu Saelba Uhiropneri yubu lelamogti,
“Nari aruksirop yubu tatsinenge sindi wanaag ambatsineri,
sindi seneragnangeag mome toro paibatsinun,”
seog.c
17 Apna,
“Sindi malia uropneap,
sindi irikna philamekneap
nen whingag nenero seneraglamnun kom,”
seog.d
18 Wene seogpa,
tam ni aneko wailag nembatsirop tanena,
nimiri malia uroba Allahag lunuro pimnepne nen teko urop kom.
Wenehirop yubu ambatsiogha
19 Nangkabo,
wene Yesusti enengag agha yarebatsiog ina toman nu log kom uro Memneri Memag wa'inep.
20 Eldamne nongag agha kamag urop ina wendogne ae lom wilniro siliplengerop ag phiro wa'inep ina nu sembe yarebatsiog.
21 Elna nu Allahri ae lom nimi wamap nimi alibag wamlari,
memne Allah sembe palirop nimi nubu sirikneri nu yeplamsil.
22 Ane sembe wana sikneag agha elag wana paliropne toman wana khapto wa'alamukap.
Nuri wanaag malinge seneraglamubunge eldi lubatsioba,
nong whi mag a'aleptaloa saog nimi tabori,
Allah whingag yanep.
23 Eldi salag lero pibogne poneko sikne wamla ane sembe,
nuri tiro nang-nangalamapti,
lag phoro salelamap yubu eneko mikip uro tipto saelbamukap.
24 Apna nu mamun seneraghal dalamebe andarina,
o'ona senehirop inaap,
walinge ul palamnep inaap abenekoag poa yalamsukap.
25 Ot nu mamun winil dalamap nimi nhon-nhondi nu laploa la'alilamang saog uro la'alilamukap kom.
Winil dalamapne libukap kom aghana,
winip tangto wana mikip nenel dalamukap.
Nu Saelba Uhiropne yalul sum peram tanepne ililapmun abeneko nen ma'aro a'un mamun wana mikip nenel dalamlulom.
26 Sikne saelbamap aghana,
nuri wanaag nen,
“Sikne laploamnun,”
aro seneragtopneag agha tipto malia ulamebe tanena,
Allah sembe pimnepne nhondi babe nuri malia uroba lupnepne wamla kom.
27 “Undop nimiag log nenehinne uro yabilul,”
aro seneragnep nena,
ot tam ikinne undop nimiag pelengkatsinepne yalul tiog.
Allah yubu toraptop nimi harep terop auk nubunge saogneri tehilul.e
28 Samenag nimi etneri Musari arukahiog yubu teba'en nembanba,
nimi phenderi to,
wilindiri to yubu lelamikti,
“Nimi enekori malia uaoba ibobo,”
aro yubu ambatsinne toman agha irikna phirop nimi eneko yareag semban koma omnepba tebanep.
29 Undop pagha tanena,
Allah Elmeri Eldamne enengag agha Allahap yubu nikne kaubatsiogti,
malinge lupsiogti,
nu Allah whingag yanep nimi nembahiog.
Undo uaog aghana,
Allahag yanep nimi nembaogne nhondi eneng eneko teba'en sembom agha wana yorolamsilne ponekori Yame san tiliplamleri,
Allah Elme yan ingisaploa saog uro wail ibarelamle tanena,
elag sunsunum uro huanep senelamlom?
Musari yubu irikna phirop nimiag ikinne pelengkanep aghana,
Yesusti eneng ingisaplorop nimiag Allahri pelengkanepne nen ma'aro ikin sirik wamnepneog wamla.
30 Tam nene sembe Allahri yubu lebogne poneko nu el wamap.
Yubu lelamog nena,
“Na mori nimiri malia uropne lunuro opsinun.
Tam nene naringe wamla,”
seog.f
Nen nimi nhondi yubu lelamog nena,
“Nu Saelba Uhiropne ponekori nimi eldinge tam karebatsilul,”
seog.g
31 Sik yubu lilomna pagha tanena,
eba timbom agha Allah kamag uropne ponekori saeag tanepne log sirik wamla.
32 Samenag a'un alniro tibin warebahinep yubu saelbalumba,
ora nimiri a'un,
“Seklebaukang,”
aro ulamekpa,
kilim weanga seklenne maikno wana khapto seklelamlumne seneraglamlulom.
33 Ik nhon-nhon nimi whingag ora nimiri a'un san tiliplamsiekti,
“Seklebaik,”
aro ulamsiek.
Ora sum yog nimiag undo malia ulamsiekpa,
sin seklelamek nimi a'undi ma'alamsilumdi yeplamsilum.
34 Apna haing sae kaupto kop aeag wamek nimi sembe,
“Nangkae,”
aro yareag senelamsilum.
Ora nimiri a'undinge taluro topsiek nimi sembe babe wana ikin tan koma seneraglamlumdi,
“Nuri saeag tanep nena,
ya'ag uropne wali sirikne amik tobukap,”
aro wana khapto awi senelamlum.
35-36 Ane sembe a'undi wana khapto seneraglamlomne neneko sae liro tobogaheng kom.
Wana khapto seneraglamlom nena,
kamna nubunge salelamlom.h
A'un wana khapto ulapmunneog andarina,
Allahri wana yeng seneropne ulapmunneag agha eldi salag pibogne a'undi saeag tatsilul.
37 Tam nene sembe ik we uro wamna komag,
“El yanepne poneko ko'o phelekan koma yalul.
38 Nari nimi wana porog nimi enekori na Allahag sikne aro wana paliropneag agha kamag ua ulamlul.
Apna el wail ibare agha saombale tanena,
nari wana yeng nembanelul kom,”
seog.i
39 Aghana nuna,
wail ibare agha saombanep nimi loba nembahilul nimi wamap kom.
Nu wana khapto elag wana palilamap nimi wamap andarina,
kamag uropne ya'ag uro nunag wamlul.