Allahag sikne aro seneragtopne toman agha ulameka
11
Sikne aro wana paliro seneragtop nena,
“Uro yabilul,”
aro nang-nangaro uropne khaplamla.
“Haingdi imnep komne ulamla,”
aro el tangtop nena,
sikne aro wana paliro seneragtopne wamla.
2 Nunisag yabo samenag wamek nimiri undo sikne aro seneraglamekne sembe,
“Sin wali nimi,”
aro sik yubu ambatto piog yubu ka'elamap.
3 Sikne aro seneragtopne toman agha el uro wamap nena,
Allahri yubu lebogneag agha nia mangkina wene wamlange o'oro sumbaog.
O'oro sunulamog nena,
“Haingdi imnep komne keknep talul,”
aro o'oro sumbaog.
4 Habel ponekona,
sikne aro seneraghogne toman agha elkae Kaindi pibogha phelekto palilamogti,
Allah sembe wali phelektopne pibog.
Sikne aro seneragtopneag agha Habeldi tarogne sembe Allahri wali seogpa,
“El wana porogne,”
aro sik yubu ambatto yabiog.
Habel tebaog aghana,
eldi sikne aro seneraghogne neneri yubu lelamloa saog uro el nenelamsil.a
5 Henokh ponekona,
sikne aro seneraglamogne toman agha teban koma Allahri kiliro tobog.
Amik nimiri el sembe sik yubu ambarelamsiek nena,
“Anam toro kilban komag Henokh ponekona Allah wana yeng neneropne wamog,”
aro ambatto yabiog.
Ane sembe Allahri toro kilbaogneag agha el nen ibek kom.b
6 Allah wana yeng nenelamog aghana,
sikne aro seneragtopne orog pagha tanena,
nimiri Allah wana yeng nembanep kom.
El wana yeng nenerop nena,
elag yanep nimiri seneragtopneag agha,
“Allah sik uro wamlaba,
elag ero neleplamang nimiag kamna tatsilul tiog,”
aro elag wana paliro seneragnepneog wamla.
7 Nuh ponekona,
sikne aro seneraglamogne toman agha wembaog yubu wali ka'ebaogti,
eldi ae lom nimi taulbahinep kabong nubunge sobaog.
Nimiag tam pelengero opsinepne sembe nimiri haingdi anam imnep komne Allahri Nuh ponekoag yubu wenero ambarog.
Wenero ambarogpa,
sikne aro seneraghogne pere elag timbanepne wa'epna agha mog so'oag nimiag timbaog.
Nuh ponekona sikne aro seneraghogne pere wana porog nenehiropne elag taog.c
8 Abraham ponekona,
sikne aro seneraghogne toman agha Allahri elag,
“Amik tatkenun mog so'oag pululam,”
aro yobogne ka'ebi agha eldi so'o laplobi agha piog.
Allahri el saeag tatnep mog so'o,
“Tala pinun,”
anena ekonag palamog.
9 Sikne aro seneraglamogne toman agha,
“Amik tatkenun,”
aro salag lebog mog so'oag yananne saog uro sekelaogti,
ora nimiri so'oag kalun ae sobi agha ua ulamog.d
Allahri elag tatnep so'o nenekona,
elme Ishakap,
ilisag Yakubap amik so'o ngai nimi tanep aghana,
sin abeneko babe so'o aneko anam tomna koma kalun aeag ua ulamdek.
10 Abraham yananne saog uro sekelaogti,
mog so'o enekoag wamog nena,
“Allahri sobanep as yangan kirik mebi agha o'oro sobalul as nubungeag wamnun,”
sembaogti nang-nangaro tilamog.
11 Elap elkel Sara ibili wamog kel enekoap sabal tarekti,
me mangaro anep kom saog wamdek.
Aghana Abrahamdi sikne aro seneraglamogti,
“Salag lero ambatneogne poneko sikne wamla,”
senelamogne toman agha Allahri nong mikip nembahiogpa,
sin abenekoag agha nimi likna palamog.
12 Ane sembe el teptop nimi saog nhonog wamoghag agha nimi likna palamog.
Elag agha likto palamog nimina,
imberea nimiri a'ilbahinep kom saog uro,
kirik a'angkea mag laut longorop mag abolag lalaptoba a'ilbanep kom saog talamekpa,
nimiri a'ilbahinep kom wamang.
13 Sin si lepsin nimi tanekona Allahri,
“Tatsinun,”
aro sinag salag pibogne anam tomna koma sikne aro seneraglamekti,
“Uro yabilul,”
senelamekti ni tebaek.
Sin anam teban komag tilamekneag agha,
“Amik uro yabohoba topsebe,”
aro weag agha nang-nangaro ulamek.
Nang-nangaro mog so'oag wamek nena,
“Ora nimiri so'oag sekelanan nimi wamap,”
aro lag phoro yubu lelameka kekman tebaek.
14 “Sekelingilamap,”
arop nimiri seneragtop nena,
“Nu ngai tanep so'o nhon elamseberi wamsebe,”
aro seneragtopne lag nenero lerop.
15 Pa'asea sinag wamog nena,
sindi lambaek mog so'o sembe seneraglamseng tanena,
nen saombanep.
16 Aghana sindi elamek nena,
“Wene wamap so'o walinge phelektop so'oag wamsebe,”
senelamek.
Elamek so'ona,
imagne ponekori as soro kalurop as wero sobatsiog so'o elamek.
Ane sembe Allahri eldamne sembe lelamogti,
“Abrahamap Ishakap Yakubap paia uhiropne Allah wamna,”
aro si engep taogne sembe ali sembaog kom.e
17-18 Abraham mibog sum eneko sikne aro seneraghogne toman agha elme Ishak Allah sembe pibog.
Anam mipna komag Allahri Abrahamag salag palilamogti,
“Anme Ishak pere agha andi nimi yina likto pilul,”
aro salag pibog.f
Aghana el nimi yina likto pinep me nhonogne aneko,
“Allah sembe oro pimnun,”
aro uaog.g
19 Seneraglamogti,
“Allahri teptop nimi babe kamag nembahinepne wamla,”
aro seneraglamogti pibog.
Ishak tebanepne eneag tol pina sunumna nhon sumbatsinep nena,
teptopne anabiag agha elme Ishak kamag taogpa,
iliri kipto tobog.
20 Ishak ponekona,
sikne aro seneraghogne toman agha eldi mabo Yakubap Esauap amik wamnepne sembe,
“Wali wamturom,”
aro mikip nenehirop yubu ambatsiog.h
21 Yakub ponekona,
sikne aro seneraglamogne toman agha el tebanep sum peram taogpa,
el kame tunguna tunguro Allah omeklamogti,
Yusupti mabo a'ero-a'ero,
“Wali wamturom,”
aro mikip nenehirop yubu ambatsiog.i
22 Yusup ponekona,
el tebanep sum peram taogpa,
sikne aro seneraglamogne toman agha Israel nimi Mesirag agha lambanepne sembe nen yubu ambarelamsiogti,
“Tebaneba Allahri a'un enero poa pail palamsile sum eneko a'undi nari yo'o poa pululom,”
seog.j
23 Musa mangap tanep ko'o peramag talamogpa,
Mesir so'oag wamek nimi sembe yubu sia leropneri,
“Ibrani mabo opsululom,”
aro arukahiog aghana,
Musa ili ilinapti mangap taog me eneko kembi agha wali sirik me wamogha kembarek.
Sikne aro seneraglamdekne toman agha arukahiog yubu sembe log semban koma,
me eneko tognoro mo'olamdekpa,
wal wilindi taog.k
24 Musa ponekona,
Mesir nimi sembe yubu sia leropne Firaundi kelmeri mo'obaogpa,
nubu taog.
Musa nubu taogti,
sikne aro seneraglamogne toman agha,
“Firaundi kelmeri me,”
aro engkanepne kom seog.
25 Malia urop nimiap ma'ap tangka el sesog sembe wana yeng nenep tanep.
Wana yeng nenep tanep aghana,
tam kareplamogti,
“Mesir nimiri Allahri kelmabo me malia ulamsiang nimiap ma'aro seklebanun,”
aro webogne sembe seklebaog.
26 Eldi tiboglamog nena,
“Kamna wali phelektopne amik tomnun,”
senelamog.
Ane sembe,
tup tananne Mesir nimiringe wail ibare agha seneraglamogti,
“Allahri wepto pognepne Kristus sembe san tiliplamneikpa,
kamna tomnun,”
aro ulamog.
27 Nimiri haingdi imnep komne ponekoag tiro wana khabamog.
Ane sembe yubu sia leropneri wana yo senehiropne sembe Musa log sembaog komdi,
sikne aro seneraglamogne toman Mesir so'oag agha lambaog.
28 Anam lamban komag,
“Me yandonge opsinepneri Israel nimiringe opsileag,”
aro Musari sikne aro seneraghogne toman agha ambarelamsiogti,
“Pham domba opsimundi,
pham eneng aneko ina siramag kelobalulom,”
aro Paskah sum sekirog.l
29 Sikne aro seneraglamekne toman agha Israel nimi tanekori laut longorop mag Uwong Mag Sin aneko kauro palamekti,
mektop so'oag pirop saog uro kauro piek.
Mesir nimiri,
“Sarekerepto kauro pukap,”
aro ulamek aghana,
magti nikniro opsiog.
30 Sikne aro seneraglamekne toman agha Israel nimiri as soro kalurop as Yerikho ik saekpare kanelamekpa,
as kanero leka solingkiropne ik saek sum eneko tel-telero mabog.
31 Rahab samenag kamna sembe nengaboap salik-malik walep tangtop kel wamog.
Aghana Israel nimi phenderi Yerikho nimi mipto kemero poa wa'irekpa,
kel enekori sikne aro seneraglamogne toman agha wali kipsiogti yepsiog.
Ane sembe Allahag sikne aro seneragtop kom nimi opsiek sum Rahab kel eneko obek kom.m
32 Nen ma'aro yubu lemnep aghana,
ko'o orog tanep ane sembe,
yubu sa'ange lepsene sembamna.
Nen ma'aro Gideonap,
Barakap,
Simsonap,
Yeftaap,
Daudap,
Samuelap,
Allahri yubu silimu tiplamek nimiap sembe yubu ma'aro lemnep aghana,
ko'o olog sunurop kom saog wamla.
33 Sin nimi tanekori sikne aro seneraglamekne toman agha yubu sia lerop nangdi saelba uhiroba luknulamsiekti,
sik uropne ulamekti,
sinag salag lero paibatsiogne saelbamek.
Sikne aro seneraglamekne neneri si yoaba singari opsileag aro waba arobi,
34 nimi tehinep auk pog sarangki,
nimi ohirop karogti opsinebag haing sebarelamsiogpa palamek.
Sin nimi taneko pesa urop nimi wamek aghana,
mikip nembarelamsiog.
Mal tarop nimi mikip nenelamsiogpa,
sinap aisa nenep tangto mal talamek nimi luknuro olamsiek.
35 Yog nimi babe tebaekne kamag taekpa,
sikinin yabori nen somoro kipsiek.
Aghana yog nimi ora nimiri oro saelbamsiekti,
“Allah wailag nembaukang,”
aro olamsiekpa seklelamek.
Seklelamek nimi tanekorina,
“Nu sae lopsiseng,”
sembamna koma ulamekti,
Allah wailag nemban koma,
“Kamag nembahileri,
nunag talulne ot wali phelektopne tatsilul,”
aro seklelamek.
36 Sin nimi taneko ulamsiek nena,
nhon-nhon san tilipto og solamsiekpa,
nhon-nhon taeplam-taeplam lolamsiek.
Nenne haing sae kauplamsiekti,
kop aeag tobongolamsiek.
37 Nenne kirikti olamsiekpa,
nenne gergajiri kelengero olamsiek.
Nenne nimi ohirop karog agha opsiek.
Nenne teko maikno ulamsiogpa,
nenne pham domba konap,
pham kambing konapn wangaro yabalamekpa,
nenne nimiri sin,
“Seklebaukang,”
aro malia ulamsiekti olamsiek.
38 Sin Allahag wana paliro sikne aro seneraglamekne sembe nubu sirik wamekpa,
mog so'oag uropne sinap sunsunum kom.
Sunsunum komdi,
ko'oro tero nimi oroghag pai aldesag babe,
yimag babe palamekti,
selenga lomag babe,
so'o lomag babe ua ulamek.