Mog so'oag urop mem aeag ulameka
9
Samenag yubu nikne lebekne toman agha Allah sembe awe toro omekanepneap,
mog so'oag mem ae o'oro sobanepneap abeneko sembe irikto ambatsiog.
2 Ambatsiogne sunsunum uro kalun ae nhon sobaek.
Ae lom nhonag meja nhonap,
auk pog tiniro iktoba yan nhonap,
Allah sembe pairop kwaneng rotiap pibek.
Ae lom ane Memag alamang.
3 Ae lom wilnirop ag siliplengeroba phendepne wailag ae lomagna,
“Memneri Memag,”
alamang.
4 Kalun ae lom ane phendepneag pibek nena,
song walia Allah sembe aukag tamnep hao sin emas agha sunurop hao sin pibek.
Apna Allahap yubu nikne lebek yubu Allahri kirik alibag mome toro pibog kirik pimnep ae kal agha soroba nhon kalun ae lom aneag pibek.
Kirik pimnep ae kal agha sobaekne aneko emas agha paiag sip ma'abek.
Kirik pimnep ae kal agha sobaekne lomag sip libaek nena,
mome tobog kirik nenekoap,
Harundi kame mog pongop taog kameap,
Allahri imag agha tatsirop kwaneng,
“Manna,”
aro engeropneap pibek.
Kwaneng manna pibekne nenekona,
emas agha sunurop mag ma'i sunuroba lomag tobongkibekti,
kirik pimnep ae kal agha soroba lomag ma'aro pibek.a
5 Yubu nikne mome tobog kirik pimnep ae kal agha soroba alibag sip serekto niknibaogne tanekoag Allahri arukna malaikat kerub phende yame sunumna sumbaeka pibek.
Kerub pibekne anekoag Allah imang wareroba lag tanep.b
Tam eneko sembe nuri wene kop-kop tagto lemnep kom saog wamla.
Memne Allah sembe palirop nang sikini nubungeri yubu nikne mome tobog kirik pimnep ae serekto niknibaogne alibag pham domba oroba eneng yamoro Israel nimi sembe Allahag molbarelamsiog. (9:5-7)
6 Ni aneko wali o'oro pibekpa,
memnang Allah sembe palirop nang ae lom abolag wamlange sop-sop wa'ilamekti,
Allah sembe awe toro omeklamekne ni tobililamek.
7 Ot ae lom phendepne anekoag memne Allah sembe palirop nang sikini nubunge poneko mo hengkun nhonag ik nhonog wa'inep.
El wa'inep nena,
ot pham domba oroba eneng poa yingkirop taneogna wa'inep.
Eneng aneko poa eldamneri malia uropneap,
Israel nimiri ekonne agha malia ulamekneap sembe,
“Allahri opsileag,”
aro eneng aneko poa palilamog.c
8 Hengkun nhonag ik nhonog wa'inepne nenekoag agha Allah Eldamne Yame Walingeri keknebarelamsiog nena,
kalun ae samenag sobaek ae wamog li anekoag Memneri Memag wa'inep ina taptopne anam lag tangtop kom aro keknebarelamsiog.d
9 Aneag tol pina nu wene ko'oag wamap nimi sembe sunumna sumbatsiog.
Allahag tattopneap,
oro aukag tamnepneap Allah sembe palilamekne nenekori sin Allah omeklamek nimiri wanaag seneragnange ni wali aingniro nembahinep kom.
10 Ni ulamekne aneko ot kwanengap maghap tenepne sembe babe,
magti yogne-yogne a'elbanepne sembe babe mo o'olamekti ul palamek.
Ane mog so'oag nimi nong iriksiropne ulameka kekman wendog nenehirop sum amik lag tanep.
Kristus Memneri Memag wa'ina nu yeplamsila
11 Kristus lag taogne ponekona,
memne Allah sembe paliropne nubunge taog andarina,
Allahri walia tarelamsilne nunag tanep.
Eldi wa'ina yeplamsil ae mem aena,
Allahri sumbaog mog so'o eneag nimiri saeri sobaek ae kalun aeag yeplamsil kom.
Ot ni wali phelektop mem ae nubu sirik mem aeag wa'ina Allah sembe paliro yeplamsil.
12 Mem ae anekoag wa'iog nena,
pham kambingap,
pham sapi meap oro eneng poa wa'iropne toman wa'iog kom.
Aghana eldamneri eneng toman agha Memneri Memag ik nhonog wa'iogti,
nimiri malia uropne sembe ya'ag uro kamna top taogti,
sae lopsiog.
13 Pham oropne toman wa'alamekne nene sembe,
pham kambing oroba enengap,
pham sapi yemne oroba enengap,
pham sapi sarenne aukag taropne haoap nimiag yamoropne toman agha sin sembenga kaolbahiog nimi nong malinge lupto a'elbahiloa saog uro Allah whingag tanep nimi nenelamsiek.e
14 Pham eneng toman agha malinge a'alero wali nenelamsiek tanena,
wenena Kristusti eneng toman agha wali phelekto wamnepneog wamla.
Allah Yame ya'ag uropne pere agha Kristus malia urop komne ponekori eldamne Allah sembe paip tangkamog.
Nuri malia ulamubunge sembe nuri wanaag,
“Nu teplopsinep,”
aro seneraglamubu.
Aghana Kristusti eneng toman agha malinge nunag wamlange mag a'elbahiloa saog uro lubatsileri,
nuri wanaag seneragnange aingnibahile andarina,
Allah kamag uropne poneko omekto awe tolamukap.
15 Kristusti undo unuaogne toman agha Allah anabi nimi anabiag urop yubu nikne wendogne sembe ma'asinne wamla.
El tebaog nena,
sin samenag yubu nikne phiro ulamek nimi sembe,
“Kamna top taneri,
sae lopsinun,”
aro tebaog.
Tebaog nena ma'asinne taog andarina,
Allahri yoplamsil nimiag,
“Tatsinun,”
aro salag pibogne neneko sin saeag taleri,
ya'ag uro wamlul.
16-17 Sunumna sumbatsinun.
Nimi nhondi nhonag,
“Tebane sum naringe anag talul,”
aro salag lero yubu nikne mome toro pimnep.
Salag lerop nimi eneko amik tebanep taneogna,
“Tatkenun,”
aro mome toro pairop yubu nikne sunsunum uro nimi enekoag tanep.
Salag pairop nimi eneko kamag wamnaag nimi enekoag tanep kom.
18 Ane saog uro Allahri samenag Israel nimiap yubu nikne salag paip tangkamek yubu babe lebe aroba eneng timbaogne toman agha mikip nenero alnibaog.
Eneng lamban koma alnibanep kom ane sembe,
19 Musari nimi niag Allahri aruksirop yubu ni ambatsiogti,
pham sapi me enengap,
pham kambing yemne enengap tobog.
Enengap maghap ma'abi agha,
pham domba hong uwongneap,
hisop ma'alap pelengkaog.
Pelengkaogti keloplamogpa,
yubu nikne mome wa'amogtopneag babe,
nimi ni tanekoag babe yamoro iksiog.
20 Yamoro iklamsiogti,
“Eneng ane iklamsin nena,
Allahri a'unag,
‘Salelamlulom,’
aro aruksirop yubu nikne ene enengag agha kaubul dalamap,”
seog.f
21 Ane saog uro kalun ae mem ae anekoap,
ni Allah omekto awe tomnep ae lomag palilamekneap eneng neneag agha yamoro ikog.
22 Sik lemnange,
Musari aruksirop yubu sunsunum uro Allah whingag tanepne sembe nia mangkina wamloa saog uropne lebe arobari eneng tiniropneag agha malinge a'elbahinepneog wamla.
Apna eneng timban komag nimiri malia uropne tam wailag tanep kom.
23 Imag uropne wamlange nelepto mem ae mog so'oag sobaek ane sembe,
ae anekoag pham taneko oroba eneng iknangeag agha malinge a'elbahinepneog wamla.
Aghana malinge Imagne ponekori whingag wa'ileag aro ot Allah sembe pimnepne nen wali phelektopneag agha malinge a'elbahinepneog wamla.
24 Imagne ponekori whingag Kristus wa'iog nena,
mog so'oag nimi saeri mem ae sobaek memag wa'ina el whingag lag taog kom.
Mog so'oag mem aena,
ot sikne anekoag nelepto sunumna sobaek.
Aghana Imagne poneko sik uro ua urobag Kristus,
“Allah whingag lag nenep tanun,”
aro nu sembe waelbaog.
25 Mog so'oag urop memnang Allah sembe palirop nang sikini yabori hengkun nhonag ik nhon sum mo Memneri Memag wa'alamek.
Nimi lumbanep pham eneng saelbi agha hengkun yalamogha palamogha ik nhon wa'alamekne saog uro Kristus imag walero,
“Nimi sembe tebaneri,
nadamne Allah sembe paip tanun,”
aro sap sarikto ulamog kom.
26 Sindi sap sarikto wa'alamek saog uro nu yeplamsiso tanena,
Allahri imap so'oap sumbaog sum imbahori,
sap sarikto ik maikno seklero teplamsongeog wamla.
Aghana wene wamap nena Allahri,
“Amik uro yabilul,”
aro salag lelamogne sunsunup taogpa,
ik nhonog lag taog.
Lag taog nena,
eldamne Allah sembe paip tangkamogne pere agha,
“Nimiri malia uropne kom talul,”
aro lag taog.
27 Mog so'oag nimi wamap nena,
ik nhonog teban tanena,
tam karebalenge poneko saramag tanepneog wamla.
28 Ane saog uro Kristus ik nhonog Allah sembe paip tangka,
“Nimi maiknori malia uropne sa'obanun,”
aro tebaog.
Ik phendep sum lag taleba,
awi uro nang-nangalamang nimiri elag tilamikpa,
malia uropne nen sa'oban koma taulbahilulne ibukang.