Wendog yubu nikne wali phelektopne sunsunum uro Yesusti yeplamsila
8
Nuri lebap yubu sirikag nena,
memne Allah sembe palirop nimi sikini ponekori nu tiro yeplamsil.
El imag waelbaogti,
Nubu Wali Sirikne ponekori sae sirik sip saelba uhirobag pulingkiog.
2 Eldi Allah sembe awe torobagna,
nimiri mem ae sobaek kalun aeag yeplamsil kom aghana,
nu Saelba Uhiropne ponekori sobaog mem ae taptopneag wa'ina yeplamsil.
3 Samenag memnang Allah sembe palirop nang sikini nhon sekitna tanena,
memnang sikini ponekori Allahag tatnepneap,
oro aukag tamnepneap Allah sembe pimnepneog wamog.
Ane sembe el imag wamlari,
yeplamsilne ponekori babe Allahag tatnepneog wamla.
4 El anam mog so'o eneag wamso tanena,
Musari aruksirop yubu mome toro pibogne sunsunum uro el memne Allah sembe paliropne wamnep kom.
Ot Musari aruksirop yubu sunsunum uro urop nimi sisa wamang nimi mori mog so'oag eneag agha Allahag tatnepne pimnep.a
5 Sindi mem ae kalun aeag Allah sembe awe toro yeplamsiekag anekona,
mem ae imag wamlangeag nelepto ot yame sunumna sobaek aeag agha yeplamsiek.
Nelepto sobaekne sembe,
Musari mem ae kalun ae sobanep ulamogpa,
Allahri elag wenero ambarelamogti,
“Wali uro kembalulam!
An yimag wamomba,
sunumna lag nembatkenonge sunsunum uro ni sunuro o'obamendi sobalulam,”
seog.b
6 Nelepto sunsunum uro sobaek aghana,
wenena Allahri nimiag wali phelektop yubu salag pibog yubu yangaropne alibag wendog yubu nikne wali phelektopne ikto sekirogpa,
Yesus Allah anabi nimi anabiag wamlari ma'alamsil.
Wendog yubu nikne wali phelektopne wamla saog uro Yesusti nu sembe awe toro yeplamsilne babe wali phelektopne wamla.
7 Allahap Israel nimiap samenag yubu nikne lebek yubu eneko ni wali uro sunsunup tanep tanena,
Allahri nen amik phendep sum,
“Yubu nikne nhon sekitnun,”
seogne wene senep kom.
8 Aghana sin Israel nimi sembe tam paliro ambarelamsiogti,
“Ka'ebahut!
Nu Saelba Uhiropne ponekori lelamog nena,
‘Amik sum nari wendog yubu nikne nhon
Israel ponekori liksirop nimiap
Yehuda ponekori liksirop nimiap sembe
salag lero kaupnun alamna.
9 Nari samenag sikinisang yaboap
yubu nikne nembabu saogne nen nembanun kom.
Samenag nari sin sae kiliro Mesir so'oag agha
enero poa yag lambahisi sum eneko yubu nikne nembabuba,
salag pipsi.
Salag pipsi aghana,
nari sinap yubu nikne lebubunge neleplamek komba,
nari babe sin lipsisi,’
aro nu Saelba Uhiropneri lebog.
10 ‘Lipsisi aghana,
amik sum nari wendog yubu nikne
Israel ponekori liksiog nimiap salag pimnun nena lemnuan.
Nari aruksirop yubu tatsinenge sindi seneragnangeag ambatsineri,
sindi wanaag mome toro paibatsinun,’
aro nu Saelba Uhiropneri yubu lelamog.
Na Allah sindi omeklamnukangne wamneba,
sinna nari nimi wamukang.
11 Sin nimi ni ologneap nubungeap na sembe el uro wamukang.
Ane sembe sin nimi a'ero-a'ero eldi asag nimiag babe,
elkaeag babe,
‘Nu Saelba Uhiropne el talulam,’
aro ambarel dalamnepne sembe teko orog.
12 Na sembe el wamukang nena,
sindi sengkwanekto uropne sembe yareag sembahinenge toman
sindi malia uropne nen whingag nenero seneraglamnun kom,”
seogne mome toro pibog.c
13 Wene,
“Nari wendog yubu nikne pimnun,”
seogne agha samenag pibogne neneko,
“Lumbanepne wamla,”
aro lag nembatsiog.
Lumbanep tanena,
samenagne tangtopne agha kom tanep.