Memne Allah sembe paliropne Melkisedek sembe
7
Wene Melkisedek aro lemnange ponekona,
Salem nimi sembe yubu sia leropne wamogti,
memne Allah Paliag Sirik wamlange poneko sembe paliropne wamog.
Abrahamdi ora yubu sia lerop nang oro luknubahiogti,
samoro yalamogpa,
Melkisedek ponekoap haiptarek.
Haiptarekti,
“Allahri wali yeplangkelul,”
aro Abraham kibog.
2 Abrahamdi saeagha wamogne taneko ni palu sa'obare wimbaogti,
Melkisedek palu nhon tarog.a
Melkisedek poneko el sina,
“Yubu sia lenne wana porogne,”
aro engero yabiog.
Nen nhonna,
“Salem nimi sembe yubu sia lenne,”
aro engero yabiog.
“Salem,”
aro lemnepne anekona,
ma'asinne sembe lerop ane sembe elna,
“Ma'asinne sembe yubu sia leropne,”
aro seneragnep.
3 Ili ilinap sembe ekon uro wamap.
Etneri likna piropne agha mangap taogne babe nu ekon.
El mangap taog sum babe,
tebaog sum babe nu ekon.
Allah Elme komobanep kom wamla saog uro Melkisedek ponekona,
papna koma ya'ag uro memne Allah sembe paliropne wamla.
4 Melkisedek nubu sirik wamlange seneragto el tahut!
Nuni nubu sirikne Abraham ponekori babe taluro tobogne palu sa'obare wimbi agha palu paliagne nhon elag tarog.
5 Musari aruksirop yubu sunsunum uro sin memnang Lewiri mangaroba mangarobari mangkahiek nimiri babe sikinkabo saeag agha tolamangdi,
Allah sembe pogto palilamang.
Sikinkabo Abrahamdi likna piogne agha mangap tangtop nimi wamang aghana,
sikinkabori saeag uropne palu sa'obare wimbi agha palu nhon Lewi nimiri saeag nembanepneog wamla.
6 Ot Melkisedek ponekona Lewiri mangaroba mangarobari mangkaekne wamog kom.
Lewi nimi kom aghana,
Abrahamdi saeag uropne palu sa'obare wimbaogti,
palu nhon elag tarogpa tobog.
Apna Allahri samenag Abrahamag nubu nenero salag pibog aghana,
Melkisedekti amik sum Abrahamag,
“Allahri mikip nembaghelul,”
aro kibog.
7 “Allahri mikip nembaghelul,”
aro yubu lebog nena,
ot paliag urop nimiri umag urop nimiag lemnep yubu lebog.
Tam nenena,
saekag lemnepneog wamla.
8 Wene yog nimiri saeag uropne palu sa'obare wimbi agha Lewi nimi tebanep nimi tanekori palu nhon tolamang.
Aghana Melkisedekna,
el tebanepne sembe lemna koma ot el kamag uropne mo sembe lag nenero mome toro paibatsiog.
9-10 Nen nhon lemnep nena,
Lewi anam mangap tan komag ilisag Abrahamdi Melkisedekag tarog sum eneko Lewi Abrahamdi eneng agha mangap tanepne mo wamog.
Aghana ilisag Abrahamdi tarogne toman agha ilisag Lewi eldamneri babe palu sa'obare wimbi agha nhon tatloa saog uro Melkisedek ponekoag tarog senep.
Yesusna memne Allah sembe paliropne paliagne taogha
11 Musari samenag Ibrani nimiag aruksirop yubu ambatsiog nena,
“Lewi nimi Harun eldi maboap memnang taikti,
nimiri saeagha Allah sembe paibarelamsukang,”
aro o'omne nenero aruktop yubu ambatsiog.b
Lewi nimiri pairo yeplamsiekne toman agha nia mangkina komopto wali nembahinep tanena,
nen nhon lag talulne sembe teko wamnep kom.
Teko orog tanena,
“Amikag nen nhon Melkisedek urop saogne memne Allah sembe paliropne nhon lag talul,”
aro ambatsinep kom.c
12 “Lewi nimi mo memnang taukang,”
aro aruksirop yubu ambatsiog ane sembe,
ora nimi Lewi kom nimi memne Allah sembe paliropne tanep tanena,
aruksirop yubu orange babe umag tanepneog wamla.
13-14 Wene aro lemnangena tam nene sembe.
Allahri Yubu sunsunum uro lag taogne ponekona,
nimi sisa Lewinge agha mangap taog kom.
Nu Saelba Uhiropne poneko tibin uro nimi sisa Yehuda nimi agha mangap taog.
Musari samenag,
“Yehuda nimiri Allah sembe aukag taro pairobag yepsinep,”
aro lebog kom ane sembe,
Yehuda nimi nhon babe memne Allah sembe paliropne wamog kom.
15-16 Wene nimi nhon wamla aghana,
“Nimi sisa eneko memne Allah sembe paliropne talul,”
aro Musari aruksirop yubu sunsunum uro nimi eneko sekitnep kom.
Aruksirop yubu sunsunum uro sekitnep kom aghana,
Allahri nimi eneko,
“Memne Allah sembe paliropne Melkisedek wamog saogne waelbalul,”
aro sekirog.
Allahri mikipneag agha ya'ag tebanep komne nembaogti,
sekirog tanena,
aruksirop yubu yogne umag tanepne nene tibin sirik taog.
17 Tam nene sembe sik uro ambarog nena,
“Melkisedekti samenag ulamog saog uro
an memne Allah sembe paliropne ya'ag uropne wamlam,”
aro ambarog.d
18 Wene aro ambarog aghana,
samenag aruksirop yubu ene mikip komdi,
nimi yepsinep kom.
Ane sembe,
aruksirop yubu ene abolag nembaog.
19 Samenag aruksirop yubu neneri ni wali nembahinep kom aghana,
nimiri nang-nangaro tilamnepne wali phelektopne aruksirop yubu neneri nunag el nenero ambatsiog.
Wali phelektop ina ane toman nu Allah peramag yalamap.
20 Yog nimi memnang Allah sembe palirop nang talamek nimi tanekona,
Allahri sin sembe salag pimna kom aghana,
memnang talamek.
Ot Yesus memne Allah sembe paliropne taogne ponekona,
Allahri yubu mikip nenero salag lebogneag agha memne taog.
21 Allahri yubu mikip nenero salag pibogne toman agha yubu lelamogti,
“Imap so'oap Saelba Uhiropne ponekori yubu mikip nenero salag pibogti,
seneragna wendogne seneraglamlul kom.
‘An memne Allah sembe paliropne ya'ag uropne wamlam,’
seog,”
aro mome toro pibog.e
22 Salag pibogne sunsunum uro Yesus ponekona,
“Allahap nimiap saekag yubu nikne wali phelektopne sik uro yabalamlul,”
senenne kekneba taog.
23 Sin samenag memnang Allah sembe palirop nang taek nimina,
tebanep nimi ya'ag wamnep kom nimi wamek.
Ane sembe nimi maikno memnang Allah sembe palirop nang taek.
24 Aghana Yesus ya'ag uro wamle paghabog wamlul ane sembe,
ya'ag uro memne wamleri,
eldi Allah sembe paia uro ulamogha ulamla aneko komobalul kom.
25 El ya'ag uro kamag wamle andarina,
elag yalamang nimi sembe Allahag molbarelamsilul.
Ane sembe el mikipti,
el pere agha Allahag yalamang nimi ya'ag uro nhin wali nembahinepne wamla.
26 El memne Allah sembe paliropne nubunge ponekori nunag teko ulamsilne sunsunum uro yeplamsinep.
Elna Allahringe sol wali uro toropne,
malinge orogne,
sembenga kaolban komne wamla.
Malia urop nimiag agha a'eptangka el mo imag paliagne taog.
27 Ora memnang Allah sembe palirop nang sikini yabo saog wamla kom.
Sin ora memnang sikini yabori sop-sop ulamnepneog wamlangena,
sindam nimiri malia uropne,
“Wailag nembalul,”
aro Allah sembe samenag pimna taneogna,
ora nimiri malia uropne sembe amik Allah sembe pimnep.
Aghana Yesusna,
malia uaog komdi,
teko orogti,
eldamne sembe pimna koma ora nimiri malia uropne,
“Kom talul,”
aro ik nhonog eldamne Allah sembe paip taog.
28 Musari samenag aruksirop yubu ambatsiogne toman mog so'oag nimi haing pesa uro wamap nimi nusamag agha wepto,
“Memnang Allah sembe palirop nang sikini talul,”
aro sekililamsiog.
Aghana aruksirop yubu ambatsiogpa,
amik sum Allahri yubu mikip nenero salag pibogne toman Elme sekirogpa,
el ya'ag uro wali sunsunup taog.