6
Ane sembe Kristus yubu samenag ambatsibu yubu enekona,
nimi wana khapsinne wamlaba,
me ologne sabatsilo saog uro nen sap sarikto ambatsukap kom.
Wenena sabatsin koma,
nimi wana whi nenehiropne sembe tipto lelamukap.
Weneog Kristus yubu ka'erop nimi sembe yubu yangaro,
“Malia seneragto uropneri nimi teplopsinep ane sembe liamlulom,”
aro ambatsinep aghana,
tam nene sembe sarikto amoro ambatsukap kom.
Allahag wana pimnepne sembe babe nen sap lemnun kom.
2 Maghag pelengero a'alehinneap,
nimiri nongag sae palihinneap,
teptop nimi kamag tanepneap,
ya'ag uro tam karebatsinepneap sembe ambatsirop yubu nen sap lemnun kom.
3 Allahri wali seleba,
wana whi nembahinep yubu tipto lelamukap.
4 Wana whi nembahinep yubu ka'eamnep nimina,
sin nimi taneko tibin nenero ambatsinepba,
el tanep.
Imagne ponekori tatsiropne mipna agha nimi tanekori salero wali senepti,
Allah Eldamne Yame Walingeag nelepto sae tiptangkamnep.
5 Allah yubu ka'ero mipna agha,
“Wali,”
aro seneraglamnaba,
amik ko'oag uro yabilulne mikibari uanepne babe sin wene whingag olog lag tanep.
6 Sin nimi taneko undo wamnep aghana,
ni aneko sae liro laplobik tanena,
sindam nimiri Allah Elme nen kalag sipto oploa saog uro nimi whingag ali nenelamukang.
Undo Kristus lilobi agha ulamik pagha tanena,
sin nimi tanekori nen sap Allahri seneropne samoro saelbanep komdi,
nen seneragna wendogne tanep kom.
7 Tam nene sembe sumbatsinun.
So'o nhonagna,
mag sop-sop tero sukuplamlaba,
nimiri meroba pongolamnaba,
wero merop nimi enekori babe yongoro tenep.
Allahri,
“So'o aneko wali sukuptale,”
seneropne agha nimiri yongoro tenep.
8 Aghana so'o nhonag ot werengkel alog kal agha pongkanep tanena,
nimiri loba aro so'o aneko yo'obanep.
Komoptobag amik aukti telul.
9 Wene aro lemna aghana,
nangkabo a'un nuri wanaag nimi wamlom.
A'un nimi sembe loba nimi sembahin koma nuri senelamsiap nena,
“Allahri taulbahiog nimi wali wamnepne sunsunum uro wali uro khapto wamlulom,”
aro sik senelamap.
10 A'undi samenag agha Allahri wepsiog kelmabo me wene babe yeplamsilomne sembe Allah wana sengkwanektop komne ponekori a'un ekon tahinep kom.
A'undi yepto ulamsilomne neneko,
“Allah si paliag nenelamukap,”
aro o'ona senelamlomne agha yeplamsilom.
11 A'un nimi a'erori ulamsom senelamap nena,
“A'undi wene sol wali uro ulamlom saog uro nen tipto ulapmuna kekman,
komobanep sum yale andarina,
nuri tiro nang-nangalamapne a'unag sik uro yabilul,”
senelamap.
12 A'undi tiro nang-nangalamlomne agha ulapmun tanena,
sol mali tahinep kom.
Ot sin Allahri,
“Tatsinun,”
aro salag pibogneag wana palirop nimiri wana khapto uropne toman,
“Tatsinun,”
seogne tolamang saog uro,
a'undi babe nelepto ul palamlulom.
Allahri salag pibogne sik uro yabinepneog wamlange sembe ambatsiogha
13 Tam nene sembe sunumna nhonna,
Allahri Abrahamag salag pibogne wamla.
Salag palilamogne toman Allahrina,
“Salag pairop yubu nene mikip nembanun aghana,
na phelektopne nen nhon babe wamla kom,”
sembamog.
Ane sembe eldamne siag yubu mikip nenero salag palilamogti,
14 “Nari an sik uro mikip nembagheneba,
andi mangarobari mangkahyikne maikno nembahinun,”
seog.a
15 Wene seogpa,
Abrahamdi wana khapto nang-nangaro Allahri salag pibogne neneko saelbamog.
16 Sunumna sumbatsinun.
Mog so'oag nimiri tam paip tangto lel dalamangneag nimi nhondi yubu so'opto nubu phelektopne siag salag palilamnari,
“Orolenange lemneba,
nubu phelektopneri na omnelul,”
aro lemnep.
Nimiri undo lerop tanena,
ka'erop nimiri,
“Sikne lepla,”
aro nen yubu nepnep kom.
17 Ane saog uro Allahri seneraglamogti,
“Nari kelmabo meag,
‘Tatsinun,’
aro salag palirop yubu ene angkanep komne lag taleba,
sik uro yabilulne el taukang,”
aro yubu mikip nenero salag pibog.
18 Allahri orolenange lemnep komne ponekori angkanep kom ina phende toman salag pibogneap,
yubu mikip neneropneap abeneag agha yubu ambarog.
Ane sembe eldi salag pibog yubu enekoag wana paliro tilamuburi,
“Taulbahilul,”
aro merero nelebaburi,
wana mikip nenehirop yubu ene salelamap.
19 Eldi salag pibogneag tiro wana palilamap yubu enekona,
“Nhondi nu nong ningki loba tanebag kilbahileag,”
aro kirik meptangto lebe senep kom kirikag kerektangkamloa saog uro yubu enekoag kerektangkamap.
Nuri tiro wana palilamap yubu enekona,
ag nubunge Allahri Mem Ae lom wilniro siliplengeropne phiro wa'ina Allah ua urop ae lomag kerektangkamla.
20 Nu sembe ina yarebatsiropne poneko Yesus Allah ua urobag wa'iog.
Melkisedekti samenag ulamog saog uro Yesus memne Allah sembe palirop nimi sikini ya'ag uropne taog.