5
Memne Allah sembe palirop nimi sikini nhonna,
ni a'ero-a'ero samenag wamekneap,
wene wamlangeap ot mog so'oag nimi agha wepto sekitsiog.
Seki agha memnang sikini ponekori Yahudi nimi tilamsildi,
Yahudi nimiri saeagha mo tattopneap,
nimiri malia uropne sembe pimnepneap Allah whingag poa paibarelamsil.
2 El babe wana khaptop kom nimi tanep ane sembe,
sin ekon urop nimiap,
ekel ina pirop nimiap abeneko win-win aro ulamsinep.
3 El wana khaptop komne tanep ane sembe,
ora nimiri malia uropne tam orog nenero pimnepne Allah whingag paibarelamsil saog uro,
eldamneri malia uropne sembe babe pimnepneog wamla.
4 Nimi nhondi babe eldamne paliag nenep tangtopne agha awe nene tomnep kom.
Paliag nenep tanep kom aghana,
Harun yobog saog uro,
Allahri yoptop nimi agha awe nene tolamnep.a
5 Ane saog uro Kristus babe eldamne paliag nenep tangto memne Allah sembe palirop nimi sikini nenep taog kom.
Aghana Allahri elag lelamog nena,
“Anna Na Name.
Na sumene Andi Nai tan,”
“Melkisedekti samenag ulamog saog uro
an ya'ag memne Allah sembe paliropne wamlam,”c
aro anamag yubu lelamogne sunsunum uro amik elag uro yabiog.d
7 Yesus mog so'oag nimi nong wamog liag haum aro engero hail mag sapsabi Allahag molona mololamog.
El tebanebag agha wali nembanepne poneko Allahag Yesusti wana mombolag nenero mololamogne sembe Allahri ka'ebaog.
8 Allah Elme wamla aghana,
el seklelamogne toman agha aruktop yubuag nelepto ul piropne sembe el talamog.
9 Wana ningki whi uro talamogne ni wali uro sunsunup taogneag agha eldi yubuag nelepto ul pirop nimi ni sembe ya'ag uro taulbahinep ina yarebatsiogne taog.
Taulbahinep ina yarebatsiogne sembe
10 Allahri el webogne agha,
“Melkisedekti samenag ulamog saog uro wamlul,”
aro memne Allah sembe palirop nimi sikini sekirog.
Yesus sae limnepne sembe wembahiogha
11 Tam nene sembe,
“Yubu maikno ambatsisebe,”
senelamna aghana a'undi,
“Yubu ka'ebahabe,”
senelamlumne sol mali taom.
Ane sembe nari,
“A'unag tibin nembatsisene,”
senelamnange eka'uk wamla.
12 Wene ik maiknoro Allah yubu ka'elamlomne agha a'undi ora nimiag tibin nenero amolamsinepneog wamla.
Aghana Allahri samenag yubu yangaropne sembe a'undam nimi ekondi,
ora nimiri a'unag tibin nenero ambatsinep saog wamla.
Me maum terop meri kwaneng kasne tenep kom saog wamlom.
13 Nimi etne olog me saog wamlari,
kwaneng kasne ten koma maum telamloa saog urop tanena,
wana porog yubu nene sembe ekonne wamla.
14 Ot nong nimina,
kwaneng kasne telamang.
Nong nimina wana whi uro sop-sop el nenep tangtopne toman,
“Nene walinge,
nene malinge,”
aro tam karebi agha ulamang.