Tektek paptoba Allahri sumbatsiogne sembe
4
Wene Allahri sumbatsiog tektek paptobag wa'inepne sembe salag pibogne wamla ane sembe,
a'un nimi nhon anam wa'in koma wapmunagti,
log uro seneraglamlulom.
2 Log uro seneraglamlulom nena,
Allah yubu samenag sinag ambatsiek saog uro,
nunag babe yubu walinge ambatsiek.
Ot sin samenag nimiri mo ka'elobekti,
yubu enekoag wana palilamek kom.
Ane sembe,
yubu walinge nenekori sin samenag ka'elobek nimi yepsinep kom.
3 Ot wene nu yubu walinge nenekoag wana palirop nimiri tektek papto wamnebag aneko wa'alanuap.
Wa'ilanepne nene sembe Allahri samenag lebogne,
“Ane sembe nari wana yo senenne agha yubu so'opto salag lelamsiri,
‘Tektek paptobag nari sumbatsisingeag wa'aikagti,’
sehi,”
seog.a
Tektek paptobag wa'inepne sembe lebog aghana,
Allahri imap so'oap sumbaogneag agha komopto sumbirog.
4 Tam nene sembe mome nhonag saek sum sembe mome toro pibog nena,
“Allahri sumbaogti,
‘Nia mangkina sumbitna,’
aro ik saek sum eneko tektek pabog,”
aro mome toro pibog.b
5 Tanena amik momeag nen lebog nena,
“Tektek paptobag nari sumbatsisingeag wa'aikag,”
seog.
6 Wene,
“Wa'aikag,”
seog tanena,
nimi nhon-nhon wa'inep nimi anam wamang sembanep.
Ot sin samenag yubu walinge ka'elobek nimi tanekori yubu enekoag wana pibek komne sembe wa'iek kom.
7 Tanena Allahri tam karepto,
“Amik uro yabilul,”
aro ik nhon sum pibogti,
amik sum Daud pere agha,
“Sumene,”
aro engero lelamog nena,
usa lemna saog uro,
“Allahri yubu lilim sumene ka'elapmun tanena,
a'undi wana kas tangom agha ka'elopseng kom,”
seog.c
8 Wene seog aghana,
Yosua ponekori sin Israel nimi tektek papnebag pabahiso tanena,
Allahri nen ik nhon sum tanepne sembe amik undo yubu lepso kom.
9 Undop pagha tanena,
Allahri kelmabo me sembe Sabat sum nen ik nhon tektek papto wamnep sum weroba wamla.
10 Sabat sum enekona Allahri,
“Sumbitna,”
aro tektek pabog sum wamla.
Nimi etneri tektek papnebag Allahri sumbatsiogne enekoag wa'in tanena,
Allah tektek pabog saog uro nimi enekori babe eldamneri ulamogne li agha tektek papto ulamla.
11 Ane sembe,
sindi yubu ene wana khapto saelban koma ulamek saog uro,
nun nimi nhondi babe sinag nelepto ulamleri,
timbaleag aro,
nuri ulamukap nena,
“Tektek papnebag sumbatsiogne enekoag merero wa'asene,”
aro seneragto ulamsut.
12 Allahri Yubu eneko kamag uro wamlari,
lebe aro mikip uro ulamla.
Nimi ohirop karog si tara-tara yo urop karog wamnep aghana,
ot Allah Yubu mo yo sirik wamlari,
nimi nong ningkiap yameap alukto nimi nongag yo'o kop-kobap babe,
yo'o yongap babe a'ebanep.
Wanaag seneropneap,
seneragnangeap a'ebi agha tam karebanep.
13 Nia mangkina sumbahiogne el whingag lag tangto yabalamlaba,
eldi haingdi kemelamsilagna keknel dalamla.
El whingag nhonne babe tognoro wamnep komne ponekoag nuri uropne sembe yubu ambatnepneog wamla.
Memne Allah sembe palirop nimi paliag sirikne urop nena Yesus
14 Wene aro lemnange agha memne Allah sembe palirop nimi sikini paliag sirikne Allah Elme Yesus imag waelbaogne ponekori nu yeplamsil.
Ane sembe nuri salelamap yubu sikne neneko mikip uro tipto saelbamukap.
15 Nu yeplamsil nena,
memne Allah sembe palirop nimi sikini ponekori nu haing pesa wamapne sembe yareag sembahinep komne wamla kom.
Nia mangkinari nunag mipsinep saog uro elag babe mipto yabalamog aghana,
malia uaog kom.
16 Ane sembe nunag wana yororo Saelba Uhiropne poneko puka urobag wana khapto yalamukap andarina,
nu teko ulamsilneag yareag senelamsileri,
nunag wana yorolamsilne agha yeplamsilul.