Roma 15

“Nu Yesusag wana palirop nimiri nundam nimi wana yeng nenep tangtopne mo ulamseng kom,” aro ambatsiogha

Nuri wana Yesusag khapto palirop nimi wamap tanena, nundam nimi wana yeng nenep tangtopne mo uanep kom. Ora nimiri Yesusag wana palirop aghana, “Ane sik uanep to, kom to,” aro wana wag tangtop tanena, nu wana khaptop nimiri ulamnepneog wamlangena, sin wabahin koma, “Yepsukap,” aro ulamukap. 2 Nu nimi niri nuri mog so'oag nimi yepsinepne agha, “Mikip nenelamsukap,” aro walinge agha ulamukap. 3 Undo unulamukap sen nena, tam nene sembe. Kristus ponekori babe eldamne yeng nenep tangtopne mo ulamog kom. Eldamne yeng nenep tangtopne uaog komne sembe septop nimi nhondi mome toro palilamogti, “Nimiri an san tilipto lelamangne nene nanag timbaneo,” aro mome toro pibog.

4 Wene aro mome toro pibog yubuap, ni samenag mome toro palilamek yubuap nu el nenero ambatsiropne sembe mome toro pibek. Allah yubu anekori nu wana mikip nenero wenelamsilne pere agha nuri babe, “Wana khabamnaba, walinge tipto ulamneri, amik wali wamnun,” seneropne agha nang-nangaro tiro wamnep.

5 Nari a'un sembe molbarelamsinne, “Allahri nimi wenero wana mikip nenelamsilne ponekori a'un yeplamsilenge pere agha a'un wana khaptangkamlulom. A'un wana khapto ulapmundi, a'un Kristus Yesusag wana palirop nimiap ma'ap tangtopne sunsunum uro seneragna nhonog uro talulom,” aro molbarelamsin. 6 Undo unulapmun tanena, a'un wana seneragna nhonog uro talapmundi, yubu lilim nhonog uro yubu nikne lero Allah paliag nenero omeklamlulom. Elna nu Saelba Uhiropne Yesus Kristus poneko Ili Allah wamla.

7 “Allah paliag nenero omektoba nubu talul,” aro Kristus ponekori a'un taluro ma'alamsil saog uro, a'un mamun babe ma'aro kibil dalamlulom. 8 Nari yubu lemnange nene, Kristus poneko yaog nena, “Allahri samenag Yahudi nimi sikinisag yaboag salag lero pibogpa, sik uro yabilul,” aro mome toro pibekne sunsunum uro Kristus eldamne arukna nenep taog. Arukna nenep tangka Yahudi nimiri kon karepto ul piropne sunsunum uro nelepto uaog. 9 Yahudi nimi sembe eldamne arukna nenep taog aghana, “Allahri sinag yareag senelamsilne sembe Yahudi sisa kom nimiri babe kipto omeklamukang,” aro arukna nenep taog. Tam nene sembe samenag nimiri Allahag lebogne mome toro pairop nena,

“Ane sembe an si paliag nenero nimi mog so'o tala-tala wamang nimi whingag omeklangkenun.

An si paliag nenero sepna pere agha omeklangkenun,”

aro mome toro pibog.

10 Nen nhonag samenag mome toro pairopne,

“Allah elmabo wana awi ulamsilne saog uro,

a'un mog so'o tala-tala wamlom nimi sisa babe sinap nhon wana awi uro wamlulom,”

aro mome toro pibog.

11 Nen nhonag mome toro pairopne,

“A'un Yahudi sisa kom nimi niri nu Saelba Uhiropne poneko omeklamsut!

A'un mog so'o tala-tala wamlom nimi niri el omekto paliag nenelamsut!”

aro mome toro pibog.

12 Nen nhonag Allah yubu silimu tiptopne Yesaya ponekori,

“Isai ponekori mangarobari mangaroba mangap tanepne nubunge lag talul.

Lag taleri, ‘Nimi mog so'o tala-tala wamang nimi sisa saelbamsinun,’ aro walel ingkilul.

Nimi sisa mog so'o tala-tala wamang nimiri, ‘Nu yepsilul,’ aro elag wana paliro tilamukang,”

aro mome toro pibog.

13 A'un sembe molbarelamsin nena, “A'undi Allahag, ‘Yepsilul,’ aro tilamlomdi, elag sikne aro wana palilamlomne sembe Allahri a'un yepsilul. Yepsilul nena, a'un wana aingnibahileri, a'un mamun ma'abahileba, wana awi maikno a'undi wanaag to'op tahilul. A'un wana aingniro awi seneropne to'op tale andarina, Allah Eldamne Yame Walingeri mikipne pere agha a'undi wanaag, ‘Nu wali nembahilul,’ aro tiro nang-nangaropne a'unag siriro la'inilamlul,” aro molbarelamsin.

Paulusti nimi sisa mog so'o tala-tala wamang nimiag Yesus yubu walinge ambatto tongolamsiogha

14 Nangkabo, nari wanaag a'un sembe sik senelamnange, a'un Roma nimi wanaag walingeog to'op tangto to'obol dalamlaba, walia lero ulamlom. A'un wana heksiro el uro wamlomdi, a'un mamun wali uro yubu ambat tangto el nenel dalamnep. 15 Undo wali wamlom aghana, nari mome toro pairop yubu eneag, “A'un ekon tamunag,” aro yubu tam nhon-nhon lag phoro yubu mikip uro ambatsin. Yubu mikip uro ambatsinne nene, Allahri wana yorolamsilneag agha nari sa'oag, 16 “Nari yubu walinge nimi sisa mog so'o tala-tala wamang nimiag yubu ambarel phululam,” aro Allahri awe tatneog. Awe tatneogpa, “Allahri awe wel tongolamsene,” seneropne agha Kristus Yesus arukna tahi. Nari yubu ambatto tongolamsin nena, “A'un Yahudi kom nimi tala-tala wamlom nimi Allah Eldamne Yame Walingeri a'un wero, ‘Naringe,’ aro webatsilul. Webatsileba memnang Allah sembe palirop nangdi wali-waliaba tarelamlonga saog uro, nari babe nari yubu ka'elapmunne pere agha a'un Allah whingag poa pihinun. A'un poa pihineba, ‘Wali tatnelamba tomnun,’ aro Allah wana yeng ualul,” aro yubu ambatto tongolamsin.

17 Ane sembe na Kristus Yesusap ma'ap tangkamnamne pere agha Allahri awe tolamnange neneko sembe, “Walinge tolamna,” aro wana awi ulamnel. 18 Nadamne maiptahanenge na sunurop komdi, ot Kristus ponekori na pere agha ulamlange mo yubu lemnun. Nari ambarelamsin yubuap ulamnangeap Kristus ponekori na pere agha ulamlaba, Yesus yubu walinge nene Yahudi kom nimi tala-tala wamang nimi tanekori ka'elamang. 19 Allah Eldamne Yame Walinge mikipne pere agha, Allah mikibari uanepne “Yaghe,” senenne kekneba ulamnonge toman Kristus yubu walinge ambarel palamsin. Allah Yame Walingeri mikip nenelamnelne agha, as soro kalurop as Yerusalem babe, Ilirikum so'oag kanerop so'oag babe, ni anabiag urop so'oag babe Kristus yubu walinge nari to'opto nimi ambatto tongolamsin. 20 Nari wanaag, “Yubu walinge ambatto tongolamsisene,” senelamnange neneko, ora nimiri so'o nhonag sam Kristus yubu ambarel ahiekag aneko ambarel pihisi kom. Tanekoag ambarel pihisi kom nena, “Ora nimiri yubu yangaropne alibag waelbaneag,” aro so'o anekoag wa'ina ambarel pihisi kom. Ot sin Kristus si anam ka'erop kom nimiag, “Ambatto tongolamsisene,” aro ambatto tongolamsisiri ulamna.

21 Samenag ka'erop nimiag ambarel pihisi kom aghana, Allah yubu silimu tiptopne nhondi mome toro pibogne sunsunum uro ambarel palamsin.

“Sin el sembe samen ambarel ahin komag wamang nimiri ibukang.

Sin samen ka'erop kom nimiri ni wali seneragto el taukang,”

aro mome toro pibog. 22 Mome toro pibogne nene sunsunum uro ambatto tongolamsin ane sembe, na a'un Roma nimiag kemel ahisene senelamna. Aghana punpun tiptoba maikno uro yabalamoba, anam yanep kom ulamla.

“As Roma nimi kemel pihinun,” aro Paulusti seneraglamogha

(Pogsiog Nang 19:21-22)

23 Samenag agha hengkun taibuka taubuka ulamog abeneko, nari a'un, “Kemel ahisene,” senelamna aghana, pinep kom wamog. Wene sin ka'erop kom nimi wamang so'o nen nhonag wa'ina ambarel pihinep kom saog wamla. 24 Ane sembe na Spanyol so'oag palamne abeneko pere, nari a'un, “Kemel ahisene,” seneropne agha a'unag yanun. A'un Roma nimiag yaneri, ik etpare haole aro wamsebe senelamna. Wamebeba awi nari wanaag to'op taneleba, a'undi na tipto palamnunne olog yepnemunba pinun. 25 A'unag amik yanun aghana, anam yan komag wene na as Yerusalem sip, “Allahri weptop kelmabo me yepsinun,” aro pinuan. 26 Sin yebel pihinun nena, Allahri wepsirop kelmabo me as Yerusalem wamang nimi nusamag kwema ulamsil. Sinag kwema ulamsil nimi sembe Makedonia nimiap Akhaya nimiapti ka'elamongdi, “Wana yengag agha yepsukapti, tarel phululam,” aro yepsiroba poloro wimbaong. 27 Sindi wana yeng seneropne agha tatsiongne nene sunsunum. Sin as Yerusalem nimiag tatsinepneog wamlangena, tam nene sembe. Allahri sin Yahudi nimiag samenag, “Taluro saelba uhiropne nhon pognun,” aro salag lero pibog. Salag pibogti, sinag tatsinepne neneko pogto Yahudi sisa kom nimiag babe tatsiog. Undop pagha tanena, wene Yahudi nimi kwema ulamsilba, wali-waliaba so'oag uropne Yahudi sisa kom nimiri saeag talamlange neneko babe pogto Yahudi nimiag yeptoba tatsinep taneogna, sunsunum uropne wamla. 28 Samenag Yahudi nimiringe meptaogne pongoro lag taogti, wene wana maubao. Wana mauropne nene keknep talba, Yahudi nimiag samoro, “Kembaukang,” aro tarel pihinun. Komopto tatsineri, Spanyol sip palamne abeneko a'un kemel ahinun. 29 Na el wamnange, na a'unag yanepne neneko sembe Kristus ponekori, “Ni walingeog uro yabilul,” seleba a'unag yanun.

30 Nangkabo, nu Yesus Kristus ponekori saelba ulamsil nimi wamapti, Allah Yame Walingeri o'ona senehinne nuri wanaag tarelamsil. Undo wamap ane sembe, a'unag mololamsin nena, nari seklero awe tolamnange sae tiptangto tolapmundi, Allahag molbarelamnululom. 31 Allahag molbarelamnumun andarina, Yesusag wana palirop kom nimi Yudea so'oag wamang nimi tanekori, “Na omneikag,” aro sindi saeag agha pelebanelul. Nen Allahag molbarelamnumun andarina, Allahri wepsirop kelmabo me as Yerusalem wamang nimi taneko yeplamsineba, “Wali yepsil,” aro wana yeng uro tobukang. 32 Ni undo wali uro yabile tanena, “Allahri wali sembaleba, na wana yeng uro a'unag yaneri, nikag tektek papto wamukap,” aro Allahag molbarelamnululom.

33 “Allahri nimi wana aingniro ma'alamsilne ponekori a'un ni yae paiamsilul,” aro molbarelamsin. Sikne agha saekag lebap.