Roma 14

Yesusag wana palirop nimi mamun ulamnepne sembe ambatsiogha

A'un Yesusag wana palirop nimiri tam nhon-nhon sembe seneragna nhonog uro wamlom kom aghana, a'un mamun wal dalamseng kom. A'un nimi agha nimi nhondi, “Nene uanep komdi, ot nene agha uanep,” aro wana wag tangtop tanena, nimi eneko waptan koma, “Nangkae,” aro kiplulom. 2 Sunumnana, a'un nimi agha nimi nhondi Yesusag wana to'opto paliropne agha, “Mem kom,” aro nia mangkina terop. Nimi nhondi ot meropne telamlangena, Yesusag anam wana to'opto palirop aghana, wana wag tanba, lebe aroba sop, “Tenep kom,” aro terop kom. 3 A'un nimi a'ep taheng kom. Andamneri nia mangkina terop tanena, meropne mo terop nimi sembe loba sembaheng kom. Aghana andamneri meropne mo terop tanena, el nia mangkina terop nimi sembe, “Malia ulamla,” aro yubu loloro tam pipseng kom. Nimi eneko Allahri elag tam pimna koma toro kiplamla ane sembe, elag tam pipseng kom. 4 Andi ora nimiag, “Tam pipsene,” senelamlam tanena, tam nene sembe seneragsut. Nu Saelba Uhiropne ponekoringe arukna wamap tanena, nimi eneko babe el saelba uropne poneko mori elag tam pimnep. El saelba uropne ponekori elag tam pimna kom tanena, an etne wamlamdi, elag tam pimnep? Nu Saelba Uhiropne ponekori tam pimna koma khapto sekitsinep ane sembe, el arukna aneko babe khapto seklul tiog.

5 A'un nimi agha nimi nhondi tam kareplamlari, ik nhon sum nubu nenero, “Mem sum,” aro seneragto ulamla. Aghana nimi nhondi, “Mem sum orog,” senelamlari ni sum nika-nika nenero ulamla. A'undi ulamlulom nena, wali uro seneragto wanaag khapto seneraglamlomne sunsunum uro a'ero-a'ero ulamlulom. 6 Nimi nhondi nubu sum nenero ulamlange, nu Saelba Uhiropne sembe nubu sum nenelamla. Nimi nhondi lebe aroba sop telamlange Allahag, “Wali tatnelam,” aro kiptopne agha terop ane sembe, eldi babe, “Nu Saelba Uhiropne si nubu talul,” aro telamla. Nimi nhondi, “Ane tenep, ane tenep kom,” seneropne sunsunum uro telamlange Allahag, “Wali tatnelam,” aro kiptopne agha eldi babe, “Nu Saelba Uhiropne si nubu talul,” aro telamla. 7 Saelba Uhiropne poneko sembe ulamap nena, nundam nimi sembe ulamap kom. Nu kamag wamapne nundam nimi sembe kom. Nu tebanepne babe nundam nimi sembe tebaukap kom. 8 Nu kamag wamap nena, nu Saelba Uhiropne poneko sembe ul palamap. Nu tebanepne babe, nu Saelba Uhiropne sembe tebaukap. Kamag wamapne babe, nu tebanepne babe, nu Saelba Uhiropne ponekoringe wamap.

9 Eldinge wamap nena, Kristus ponekona, “Kamag urop nimiap, teptop nimiap saelbamsinun,” aro tebaogti, nen kamag taog. 10 Kristus ponekori nu saelbamsilba, ot Allah whingag seklamebe sum eneko nu sembe tam karebalul. Undop pagha tanena, a'un mamun eldo ilipsae saog uro ma'ap taom nimi loba sembahinep komdi, sinag tam pimnep kom. 11 Nu Allah whingag sekto lag talamebe sum eneko sembe samenag Allahri yubu silimu tiptop nimiri mome toro palilamogti,

“Nu Saelba Uhiropne ponekori yubu lelamogti, ‘Na sik uro kamag wamnange,

na whingag nimi niri yabu sanukto u amupto pulingkina,

na Allahag lag phoro omeklamnukang,’ seog,”

aro mome toro pibog.

12 Ane sembe nu nimi niri a'ero-a'ero, “Undo-undo ulamsi,” aro Allahag lag phoro ambatto lebukap.

Eldo ilipsae saog uro ma'ap tangtop nimi mikip nembahinepne sembe ambatsiogha

13 Undop pagha tanena, nu mamun, “Malia ulamlam,” aro tam karepto tam pipsiseng kom. Tam pimna koma a'un wanaag seneraglapmundi, “Naro naipsae tangkamap nimi tanekori ul palamangag sin phukul ingiro malingeag nembahineagti, punpun tiptoba nhon pimnun kom,” aro wanaag kareplapmundi, sunsunum uro ul palamlulom. 14 Na mori wanaag seneragto el wamnange, nu Saelba Uhiropne Yesusap ma'ap tangkamap tanena, nia mangkina nimiri tenaba tenepne sembe Allahri sembenga kaolbanne sembalul kom. Na el wamna aghana, ora nimiri eldi wanaag, “Sembenga kaolbanne neneko nari tenep kom,” aro seneraglamla tanena, nimi eneko sembe sembenga kaolbanne tal. 15 Ane sembe a'un nimi tanekori, “Nia mangkina tenep,” aro seneragto kwaneng telamlom aghana, ankae wana ikin nenelamlam tanena, o'ona seneropne agha wene ul palamlam kom. Ando anipsae saog taom nimi eneko sembe Kristus tebaog aghana, andi kwaneng tenaba sembe nimi eneko loba nembanep te? Undo uaheng kom. 16-17 Allahri nimi saelbamsilne neneko ot kwaneng mag tenepne sembe saelbamsil kom. Ane sembe, a'undi kwaneng ni wali tenep aghana, teroba sembe nimi loba nenero ulapmen tanena, ulamlamne nene mali senep. A'un walia ulamlomne sembe nimiri, “Malia ulamang,” aro san tilibahiikagti, yae up tangkamlulom. Allahri nu saelbamsil nena, kwaneng mag teropne sembe kom aghana, Allah Eldamne Yame Walingeri nu wana porog nenehiropneap, wana aingniro nimi mamun ma'asinneap, wana awi nenehiropneap sembe Allahri nu saelba ulamsil. 18 Nimi etneri ni tam nene sembe, “Kristusti aruksirop yubu ul palamnun,” aro tol tolongolamle tanena, nimi enekori Allah wana awi nenelamlul. Nimiri babe nimi eneko sembe, “Wali ulamla,” aro maipnep.

19 Ane sembe, nia mangkina ulamapne pere agha, nimi mamun ma'asinneap, nu mamun mikip nenel tanneap uro sarekereplamukap. 20 Allahri nu saelbamsildi, awe tolamlange neneko loba nembaheng kom. Kwaneng teroba ni hae wali tenep. Aghana nimi etneri el wanaag, “Nene tenep kom,” aro seneragtop aghana, wana wag senenne agha terop tanena, phukul ingkiloa saog ul pirop. Undop tanena mali. Ane sembe nimiri tenepne sembe wal dalapmunne agha Allahri nimiag awe tolamlange loba nembaheng kom. 21 Ando anipsae saog tangtop nimi, “Perarekto phukul piikag,” aro lebe aroba sop teropne babe, anggur mag yonge teropne babe lipsinepne ane olog wali wamnep. Sa'a-sa'a ulapmenne pere agha ando anipsae tangtop nimi perarekto phukul pinep tanena, sin malingeag nembahinepne neneko uaheng kom.

22 Andi wanaag tam kareplamlamdi, “Nari sa'a-sa'a teheneba, Allahri nanag tam pipso kom,” aro seneraglamlam tanena, andam nimi sembe, “Malia uan,” aro tam paip tan koma wana yeng uro wamlulam. Andi tenepne sembe wanaag seneraglamlamne neneko ora nimiag yubu nubu uro lemna koma Allahag mo wana palilamlulam. 23 Aghana ora nimiri wana phende tangom agha, “Wali tenep to, tenep kom to,” seneropne agha telamla tanena, eldam nimiag ikinne paip tangkamla. Nimiri nia mangkina ul piropne sembe, “Yesusag wana palirop nimiri hae uanep,” aro sik senerop kom aghana, undo ul pirop tanena, sik senerop komne agha ulamlenge neneko malia uropne tanep.