“Mog so'oag nimi sembe tam karepto saelba uhirop nangdi yubu ka'ebalulom,” aro ambatsiogha
13
Nu mog so'oag nimi wamapne sembe Allahri nimi weplamsildi,
“Nimi mog so'o eneag yubu sia lero tam karepto o'obahilulom,”
aro nimi a'ero-a'ero sekililamsil.
Saelba uhirop nimi ni wamang nimina,
Allahri sekitna koma waelbanepne nhon babe wamla kom.
Ni mog so'o eneag saelba uhirop nimi Allahri sekitsiogpa,
yubu sia lero tam karepto saelba ulamsiang.
Ane sembe a'un nimi niri nu saelba uhirop nimiri yubu sia lelamangne ka'elamsululom.
2 Mog so'o ene saelba uhirop nimi yubu sia lerop nimi Allahri sekililamsil.
Ane sembe nimi etneri,
“Sindi yubu ene ka'ebahane kom,”
aro yubu ingisaplamle tanena,
Allahri sekililamsilne ingisaplamlul.
Undop pagha tanena,
tam kareptop nimiri wana yo pipsinepne sindam nimiri apto anep.
3 Sin saelba uhirop nimina,
walia urop nimiag wana yo pipsinep kom aghana,
sin malia urop nimiag wana yo pipsinep.
Ane sembe saelba uhirop nimi sembe walia urop nimiri log sembahinep kom.
Mog so'o saelba uhiro yubu sia lerop nimiri a'unag tam palihinne karong senelapmun tanena,
ot walinge agha ulapmunba,
sindi a'un kipsinepneog wamlange sembe log sembalulom kom.
4 Allahri saelba uhirop nimi sekitsiogpa,
sin Allah arukna wamangne,
“Mog so'oag nimi taneko wali paiamsiikti,
yeplamsukang,”
aro sekitsiog.
“Paiamsukang,”
aro sekitsiogpa,
Allah arukna wamangdi,
“Nimi yonge salero opsukap,”
aro ulamang.
Tam nene sembe nimi opsinep karog Allahri sindi saeag tatsiog.
Ane sembe,
a'undi malia ulapmun tanena,
log senelamlulom.
5 A'un nimina,
“Sin umag yubu ka'ero ulamsebe,”
senelapmun kom tanena,
sindi a'unag wana yo pipsinep.
Yo pipsinepne sembe mo kom,
aghana a'undi wanaag,
“Nene sik,
nene mali,”
aro seneragnange el talamsil.
Ane sembe,
a'undi wanaag seneraglapmundi,
“Sin umag yubu ka'ero ulamsebe,”
aro seneragnepneog wamla.
6 Sin mog so'oag nimi saelba uhirop nimi Allahri sekitsiogpa,
el arukna wamangdi,
mog so'oag nimi sembe tam karepto o'olamsiang.
Ane sembe a'unag,
“A'undi saeag agha nunag kipnange pogto tatsimunba,
a'un sembe tam o'obaukap,”
aro aruklamsiangne sunsunum uro tarelamsilom.
7 A'un sa'oag kamna kareploroba wamlaba,
a'undi uanepneog wamlangena,
nimi enekoag kareploroba tatsinepne sunsunum uro tatsululom.
A'un saelba uhirop nimiri a'unag,
“Nu sembe kipnangeap,
a'un o'obahinepne sembeap nunag tatsululom,”
aro aruklamsiik tanena tatsululom.
Allahri,
“Sin umag wapmundi kipsululom,”
aro sin sekitsiog tanena,
a'un sin umag wapmundi,
sunsunum uro kiplamsululom.
“Naba nangkabo wanaagne,” aro o'ona seneptangtopne sembe ambatsiogha
8 Nimiringe kareploroba wamla tanena,
ni komopto lumbalulom.
Ot a'undi lunuro komobanep kom nena,
papna koma sop-sop o'ona senel dalamlulom.
Nimiri ora nimi tapto o'ona senehirop tanena,
Musari aruksirop yubu ni eneko yubu tam nhonag kaupto wamlange wali uro saelba urop.
9 Musari aruksirop yubu mome toro pibog yubu enekoag,
“Ora nimiri nengabo kelabo haogha topsiseng kom.
Nimi ya'ag opsiseng kom.
Nimiringe haoghaba topseng kom.
‘Ora nimiringe aba naringe taho,’
sembaheng kom,”
aro mome toro pibog.a
Ni yubu eneap,
aruksirop yubu orange mome toro pibogneap,
ni eneko yubu tam nhonag ni kaupto wamlangena,
“Andamne nong ningki o'ona senep tangkamlam saog uro andi mog so'oag nimi babe o'ona senelamsululam,”
seneropne agha mome toro pibog.b
10 Nimiri eldi mog so'oag nimi o'ona senehirop tanena,
nimi enekoag malia uahinep kom.
Ane sembe,
nimiri ora nimi tapto o'ona senero ulamsil tanena,
Musari aruksirop yubu ni yubu tam nhonag kaupto wamlange eneko wali sunsunum uro saelba ulamla.
11 A'un mamun o'ona senel dalapmundi,
nu wene wamap ko'o ene sembe seneragto el uro wamlulom.
Nu talulamsilne ponekori komopnag taulbahilul sum eneko peram wamla.
Nu samenag Yesusag wana palilamububa,
eldi nu taulbahinep sum eneko olog ko'o we uro wamog aghana,
wene peram wamla.
Taulbahilul sum peram tal ane sembe,
“Kwahing nen uahileag,”
aro a'undam nimi kamol dalamsut!
12 Inibin nene palamlaba,
wene kwelekanep saog wamla.
Ane sembe,
nu samen inibinag palamuburi ulamubunge nene lipsiberi,
tibin wareropne seng enekamebe ina agha pelebel dalamukap!
13 Nimiri inibinag ulamangne,
mag yonge along teropti nenek salehirop nimi nenep tangtopneap,
“Wanaag bobonge agto yaboho,”
seneropne agha nengabo kelabo salik-malik salep tangtopneap,
“Naringe taho,”
aro wana mali seneropneap,
nimiap waptangtopneap ulamang.
Undo inipnag unulamang saog uaheng kom aghana,
ali neneptan koma yo'obi uanepne sunsunum uro ulamlulom.
14 A'un nongagna,
nu Saelba Uhiropne Yesus Kristus ponekoap ma'ap tangtopne agha a'un nongag kalup tangka ulamlulom.
Andarina a'undi wanaag,
“Bobonge agto yaboho senenne uahane,”
aro nong yeng neneropne elamlulom kom.