Korintus
Nimi Sembe
Paulusti Mome Toro Pibogha Selekne
El nenerop yubu palilamap
Paulusti mome toro pibog yubu enena as soro kalurop as Korintus wamek nimi sembe mome toro pibog. As Korintus aneko nubu as mag laut longorop mag abolag wamogpa, kabongag mag alip toman pirop nimi maiknori kabong pabiro as anekoag sangnil alamek. As Korintus aneko Yunani so'oag wamogpa, Roma nimiri luknubahiekti saelbamsiek. Roma nimiri saelbamsiek aghana, nimi sisa a'ero-a'ero wamek nimi maiknori as Korintus anekoag wali-waliaba maikno poa yalamekti, kamna kapto tol dalamek. Nimi sisa Yahudi nimiap, nimi sisa Yunani nimiap, nimi sisa yogne babe maikno wamek. Nimi sisa a'ero-a'ero wamek aghana, Allahri seneropne sunsunum uro ul palamek komdi, salik-malik uropne maiknoro ul palamekti, mema yogne-yogne phalamsiek. Undo unulamek aghana, Paulusti samenag as Korintus aneko wa'alaogti, wa'anero nimi taneko yubu walinge Yesus sembe ambatto tongolamsiogpa, nimi maiknori sik senelamekti, Yesusag wana palirop nimi tanekori Allah yubu lero winil dalamek.
Allah yubu lero winil dalamek aghana, Paulus as Korintus agha lambaogpa, yog nimi babe Allah yubu ambarel ahiek. As Korintus anekoag yubu amoro ambatsirop nimi etpare wamekpa, Korintus nimiri ambatsirop nimi tanekoag neleplamekti, waptangto a'ep tangkamek. Yubu ambatsirop nimiag neleplamekpa, “Amoro ambatsirop nimi enekoag neleplamla,” aro maghag pelengelamsiek. Nimi a'eptangka nimi nhonag nelepto maghag pelengelamsiekne sembe Paulusti, “Nimi maikno na si paliag nenero neleplamneikti, ‘A'ep tangkamikag,’ aro nari nimi maikno maghag pelengkahisi komne wali,” sembaogti ambatsiog (1 Korintus 1:14-15).
Nimi sisa a'ero-a'ero wamek nimi tanekori Yesusag wana palilamekti, hail dalamekti, “Yesusag wana palirop nimiri welaro ul palamukap,” aro haiptangto mome tobekti, Paulusag pibek. Mome toro haibaek yubu eneko Paulusti kembaog aghana, nimiri wali uro pibek komba, ka'eseptaog. Paulusag mome toro pibek yubu ka'eseptaog aghana, Paulus as Efesus wamogti, sin Korintus nimiag samoro wenelamsiog yubu ene mome toro pibogpa, wene a'undi yubuag tipto mome toro palilamap. Paulusti sin as Korintus nimiag wenelamsiog tamna, Yesusag wana palirop nimiri seneragna nhonog wamnepne sembe, nengabo kelabo salik-malik salep tangtopne sembe, nimiri wanaag seneragnange sembe, “Allah yubu lebukap,” aro winip tangtobag ulamnepne sembe, Allah Yame Walingeri tarelamsilne sembe, apna teptop nimi agha kamag tanepne sembe tibin nembarelamsiogti, mome toro pibog. Paulusti Allah yubu walinge Yesus sembe kiliro ni tam neneko sembe wenero tibin nembarelamsiog.
Paulusti Korintus nimi sembe mome toro pibogha selekne lomag wamlange
1:1-9 - Korintus nimi kipsiogha
1:10—4:21 - Yesusag wana palirop nimi a'el dalamekne sembe ambatsiogha
5:1—7:40 - Nengabo kelabo salik-malik salel dalamekne sembe ambatsiogha
8:1—11:1 - Mema yogne pharo koma Allah mo omeklamnepne sembe ambatsiogha
11:2—14:40 - “Allah yubu lebukap,” aro winip tangtobag ulamnepne sembe ambatsiogha
15:1-58 - Kristus teptobag agha kamag taog saog uro nu babe kamag tanepne sembe ambatsiogha
16:1-24 - Paulusti, “Uanun,” aro ambatsiogti, komopto kipsiogha