1 Korintus 1

Korintus

Nimi Sembe

Paulusti Mome Toro Pibogha Selekne

Paulusti Korintus nimi kipsiogha

1-2 Nangkabo, na Paulusti a'un as soro kalurop as Korintus wamlom nimiag mome toro palilamna. Allahri seneropne sunsunum uro eldi wepto poghogne Kristus Yesus ponekori na Paulus wepto yopneogti, “Nari yubu ambatto tongolamsululam,” aro pogneog. A'un Korintus nimi agha pogto, “Yesus Kristusap ma'ap tangkapmunne pere agha naringe talulom,” aro Allahri a'un yopsiog. “Nari kelmabo me walingeog talulom,” aro yopsiogpa, a'undi eldi wepto poghogne Kristus poneko siag sikne aro yoplamlomdi, nikag winil dalamlom. A'un Korintus nimi mo saelba ulamsil kom aghana, nimi tala-tala wamang nimiri babe, nu Saelba Uhiropne siag sikne aro yoplamangpa, Yesus Kristus ponekori sin babe saelba ulamsil. A'un el siag yoplamlom nimi kiplamsin. Nanap nungkae Sostenesapti kiplamsinam. 3 “Nuni Allahap, nu Saelba Uhiropne Yesus Kristusap abenekori wana a'unag yororo walia ulamsirikti, wana aingnibahurukang,” senelamnamdi a'un sembe molbarelamsinam.

4 Allahri a'unag wana yorolamsildi, a'un Kristus Yesusap ma'ap tangtopne agha a'unag tarelamsilne sembe nari sop-sop, “Naba naniong wali tarelamsilam,” aro Allah kiplamna. 5 A'unag tarelamsil nena, Yesusap ma'asinne pere agha ni a'unag wamlange tup nembahiogti, ni seneragnangeap, ni yubu leropneap tup nenero a'unag tarelamsil. 6 A'unag tarelamsilne lag tangto yabalamlange abeneko pere nuri Kristus sembe sik yubu ambarelamsiap yubu eneko, “Sikne,” aro lag nenero el talamsil. 7 A'undi wana mikip nembahineba ni tarelamsil ane sembe, nu Saelba Uhiropne Yesus Kristus yanepne sembe wana awi uro nang-nangalapmunba, wana mikip nembahineba sembe nhon babe a'unag kwema uahilul kom. 8-9 Allah ponekori a'un yoplamsiogti, “Naba Name Yesus Kristusap sae tiptangto ma'al dalamlulom,” aro a'un yopsiog. Allah a'un yopsiogne poneko sikne agha wamla ane sembe, a'un mikip nenero sekililamsilul andarina, nu Saelba Uhiropne Yesus Kristus lag tale sum eneko a'unag tam nhon piplul kom.

Sin Korintus nimi mamun wal dalamekne sembe wembahiogha

10-11 Nangkabo, ka'elamnoba Kloe kel enekori ae lom nimiri a'un Korintus nimi sembe ambarelamneongdi, “Waptangto a'el dalamang,” seongba ka'ebano. Ane sembe nangkabo, “Nu Saelba Uhiropne Yesus Kristus si nubu talul,” aro a'unag wenero mololamsindi, “A'un mamun a'ep tan koma yubu nikne lelapmundi, wanaag babe, seneragnangeag babe, a'undam nimi o'ol dalapmundi, nhonog uro wamlulom,” aro wenero mololamsin. 12 Wene aro molbahin nena, tam nene sembe. Nimi nhondi, “Na Paulusag neleptopne wamna,” alamlaba nen nhondi, “Na Apolosag neleptopne wamna,” alamla. Nen nhondi, “Na Kefasag neleptopne wamna,” alamlaba nhondi, “Na Kristusag neleptopne wamna,” alamla. 13 A'un Kristus nongag ma'ap tangtop nimi a'eptangto wamseng kom. Na Paulus a'un sembe kalag sipto tebahi kom. Na Paulus siag kekhaekto nenel dalamlumne sembe maghag pelengelamsiek kom. 14-15 A'un Korintus nimi nhondi yubu lemnep nena, “Paulus siag kekhaekto nenel dalamsinge sembe maghag pelengkaneek,” seleag aro na Paulusti a'un Korintus nimi maghag pelengkahin koma wamnange sembe Allahag, “Naba naniong,” aro kiplamna. Ot Krispusap Gayusap aghabog maghag pelengkahisi. 16 Apna Stefanusti ae lom nimi babe maghag pelengkahisi aghana, nen ora nimi babe maghag pelengkahisi to, kom to aro na babe ekon. 17 Nari wene aro lemnangena, Kristusti na wepto pogneog nena, “Maghag pelengkahilulam,” aro na pogneog kom. Kristusti wepto pogneog nena, “Nari yubu walinge ambatto tongolamsululam,” aro pogneog. Nari yubu walinge ambarelamsin nena, Kristus kalag sipto tebaogne sembe ambarelamsin yubu eneko mikip sirik wamla. Mikip sirik wamla aghana, nari yubu Kristus kalag tebaogne sembe ambarelamsinne neneko a'un wana toro heksirop yubuag agha ambatsinepne toman, “Kamola yubu saog nembaneag,” aro nimi wana toro heksirop yubuag agha nari yubu ambarelamsin kom.

Allahringe mikipneap, Allahringe nimi wana hekahinepneap ni Kristusag wamlange sembe ambatsiogha

18 Kristus kalag sipto tebaogne sembe ambatsirop yubu eneko Allahringe mikipne wamla. Nu talulamsil nimi sembe Kristus kalag sipto tebaog yubu eneko Allahringe mikipne wamla aghana, sin loba nenel dalamang nimiri yubu ene sembe, “Limitukneri yubu,” senelamang. 19 Tam nene sembe Allahri yubu silimu tiptopneri mome toro palilamogti,

“Sin wana heksirop nimiri wanaag seneraglamangne loba nembanundi,

sin el urop nimiri el tananne kom nembanun,”

seogne tipto mome toro pibog.

20 Wene seog tanena, wana hektop nimiap, el nenehin yubu amohirop nimiap, wene wamap ko'oag el tangtopne agha yubu lel dalamang nimiap sembe wela sembanep? Mog so'oag nimiri wana hekto el tangtopne wamnep aghana, Allahri lag nembarelamsilne pere agha lag tangto yabalamlangena, “Mo limituk senerop nimi wamang,” aro lag tangto yabalamla.

21 Mo limituk seneropne neneko lag nembarelamsil nena, Allah eldamneri wana hektopneag agha undo unulamog. Mog so'oag nimiri wana hekto el tangtopne pere agha Allahri ua ulamlange sembe el wamnep kom. Nimiri mo el wamnep kom aghana, Kristus sembe lag nenero ambatsiropne pere agha Allahri ua ulamlange sembe mo el wamnep. Kristus sembe ambatsirop yubu enena, mog so'oag nimiri senelamangneag agha, “Limituk seneropne,” alamang. “Limituk seneropne,” alamang aghana, Kristus sembe ambatsirop yubu ka'ero sikne aro wana palirop nimi sembe Allahri wana yeng seneropne agha talulamsil. 22-23 Kristus kalag sipto tebaogne sembe nuri nimiag ambarelamsiap aghana, Yahudi nimiri, “Allah mikibari uanepne kekneba ibeberi, sik sembaukap,” alamang. Wene aro mololamang aghana, Kristus kalag sipto obek yubu ambarelamsiap yubu eneri sin wana mali nenelamsilba, saelba ul pinep kom saog wamla. Yahudi sisa kom nimi babe, sin Yunani nimiri, “Wana hekahinepne el tahabe,” aro ero sarekereplamang aghana, sin Yunani nimiri Kristus tebaogne sembe ka'elobi agha, “Limitukneri seneropne,” aro seneraglamang. Yahudi nimiap, Yunani nimiapti Kristus tebaog yubu saelbanep kom saog wamla. 24 Undo mololamangba, ero sarekereplamang aghana, Allahri sin Yahudi nimiap Yunani nimiap wepto, “Nanag yahut,” aro yoplamsil nimi sembe, Kristus yubu ene Allahri mikipne babe, Allahri wana hekahinepne babe sinag lag tal. 25 Allahri, “Kristus kalag sipto tebalul,” aro karebaogne sembe nimiri luknuro, “Limitukne,” aro seneragnep. Mog so'oag nimiri senelamang nena, “Allah limitukne aro seneraglamla,” sembanep aghana, nimiri seneragnange phelekto Allahri seneragnange paliag wamlaba, nimiri wana hektoba el uro unne mombolag wamlangeri seneragnep kom. Allahri, “Kristus kalag sipto tebalul,” aro karebaogne sembe nimiri luknuro, “Pesange,” aro seneragnep. “Pesange,” aro seneragnep aghana, Allahri el mikipne lag nemban koma eldi uanepne babe nimiri mikipne phelekto paliag wamlaba, nimi nong mikipne mombolag wamlangeri luknubanep kom.

26 Nangkabo, wene aro yubu lemnange sembe, Allahri a'un, “Nanag yahut,” aro yopsiogne sembe seneraglamsut! Eldi a'un yopsiog sum eneko ora nimiri a'un nimi maikno sembe, “Wana hekto el urop nimi wamang,” sembanep kom. A'un nimi maikno nubu nimi wamlum kom. A'un nimi maikno tup nimiri ae lomag mangap talum nimi kom. 27 Allahri a'un anam yopsin komag undo wamlum aghana, mog so'oag nimiri, “Limitukne,” aro seneraglamangne Allahri wepsiog andarina, mog so'oag nimi wana hekto el urop nimi ali taukang. Apna mog so'oag nimiri, “Pesange,” aro seneraglamangne Allahri wepsiog andarina, mog so'oag nimi mikip nimi ali taukang. 28 Apna Allahri wepsiog nimina, mog so'oag nimiri sin sembe, “Nubu nimi kom, sin loba nimi,” senehirop nimi sembe babe, Allahri wepsiog. Allahri seneraglamogti, “Wene wamlange kom talul,” aro mog so'oag nimiri sin sembe, “O'omne kom,” senelamang nimi Allahri wepsiog. 29 Undop pagha tanena, mog so'oag nimi nhondi babe eldamne Allah whingag maiptanep kom. 30 Allahri seneropne agha a'un Kristus Yesusap ma'ap tangto wamlom. Kristus poneko nu sembe Allahri nimi wana hekahinepne nembaog. Kristus ponekori nuri malia uroba sembe kamna top taogti, malinge wepto o'om nimi nenelamsildi, nu wana porog nimi nenelamsil. 31 Ane sembe, samenag Allahri yubu silimu tiptop nimiri mome toro pibogne sunsunum uro uro yabalamla. Allahri yubu lebogne, “Nimi etneri maiptangtop tanena, ‘Nu Saelba Uhiropneap ma'ap tangkamnam,’ aro maibil dalamnep,” seogne mome toro pibog.