Kristus kalag sipto obekpa, tebaogne Paulusti o'omne nenero ambarelamsiogha
2
1-2 Nangkabo,
na babe samenag a'unag yahinge,
“Allahri seneropne tognoro wamog yubu ambatsinun,”
aro ambarel ahisi.
A'unag yubu ambarel ahisi aghana,
anamag nari tam karebahiri,
“Ot Yesus Kristus sembe,
el kalag sipto tebaogne sembe mo na el uro wamloa saog uro wamneri ambatsinun,”
aro tam karebahiri,
ambarel ahisi.
Ane sembe,
a'unag ambarelamsisiri,
wana toro heksirop yubu lilim toman emem arop yubu lilim ambarel ahisi kom.
3 Na babe a'unag yahiri wamubu abeneko na nong pesa wamneogpa,
log sembahiri,
pet-pet alamsi.a
4 Nari a'unag yubu ambarelamsisinge,
wana heksiropne kop-kop tagto a'un wana tolamsisi kom.
Aghana nari a'unag yubu ambarelamsisi abeneko pere Allah Yameri el mikipne a'unag lag nenel dalamog.
5 Nari undo ambarelamsisi andarina,
Allah mikipneag a'undi sikne aro wana palilamlom.
Mog so'oag nimiri wana toro heksirop yubuag a'undi sikne aro wana palilamlom kom.
Allah Yameri nimi wana hekahinepne sembe ambatsiogha
6 Ot wana whi uro seneragtop nimi sembe nuri ambarelamsiap yubu ene wana hekahinep yubu wamla.
Aghana nuri ambarelamsiap yubu enekona,
wene mog so'oag wamang nimiri wana heksirop yubu alamang saog yubu ambarelamsiap kom.
Mog so'oag nimiri wana heksirop yubu alamang yubu enekoag sin wene mog so'oag saelba ulamsiang nimiri neleplamangdi,
kom talamang.
Mog so'oag nimiri wana heksirop yubuap,
nuri wana heksiropne ambarelamsiap yubuap nikne kom aghana,
7 nuri wana heksirop yubu ambatto lelamap nena,
Allahri samenag tognoro pibogpa,
samenag nimi el tan koma wamek yubu ambarelamsiap.
Allahri tognoro pibogne neneko anam imap so'oap sumban komag el wamogti,
tam karebaog andarina,
nu paliag urop nimi nembahilul.
Allahri nimi wana hekahinep yubu eneko ambarelamsiap.
8 Allahri nimi wana hekahinepne tognoro wamog yubu eneko sembe wene wamap ko'oag mog so'o ene saelba uhirop nimiri seneragnep komdi,
el uro wamek kom.
Allahri nimi wana hekahinepne sembe el wamseng tanena,
nu Saelba Uhiropne mo paliag nenero kipnepne poneko kalag sipto opseng kom.
9 El uro wamek kom aghana,
Allahri elag wana paliro o'ona senerop nimiag,
“Tatsinun,”
aro welamogne sembe Allah yubu silimu tiptop nimi nhondi mome toro pibog.
Mome toro pibog nena,
“Nimiri haingdi irop komneap,
aori ka'erop komneap,
nimiri wanaag seneragnep komneap
Allah o'ona senerop nimiag walinge tatsilul,”
aro mome toro pibog.b
10 Tognoropne neneko nimiri seneragnep kom aghana,
Allah Yameri nia mangkina kemero elamlari,
Allahri tognoro seneragnange babe el wamla.
Ane sembe Allahri el Yame pere agha nunag lag nembatsiog.c
11 Nari lemnange neneko sembe sunumna sumbatnuahin.
Nimi nhondi wanaag seneraglamlange sembe ora nimi el wamnep komdi,
ot nimi enekori yame mo el wamla.
Ane saog uro Allahri seneragnange nimi nhondi babe el wamnep kom.
Ot Allah Eldamne Yame mo el wamla.
12 Allahri Eldamne Yame nunag tatsiog.
Nunag yame tatsiogne mog so'oag nimiringe saog seneragna yameap tatsiog kom.
Mog so'oag nimiringe saog kom aghana,
Allahri Eldamne Yame nunag tatsiog andarina,
Allahri nunag wana yororo tatsiropne sembe nu el uro wamnep.
13 Allahri nunag tatsiropne sembe el uro wamapti ambarelamsiap.
Mog so'oag nimiri wana heksiropne kop-kop tagto ambarelamsiap kom aghana,
Allah Yameri sik uro amoro ambatsiropne nuri yubu tiplamapti,
Allah Yameri yubu ka'erop nimiag ambarelamsiap.
14 Allah Yame nimi nhonag ua urop kom tanena,
Allah Yameri yubu ambatsiropne nimi enekori ka'elobi agha limitukne senelamlari,
seneragnep komneog wamla.
Ot Allah Yame nimi nhonag ua urop taneogna,
nimi enekori Allah Yameri yubu ambatsiropne ka'ebi agha tam lelekto seneragto karebanep.
15 Nimi nhonag Allah Yame ua urop nimi enekori nia mangkina tam lelekto seneragto kareplamla aghana,
nimi nhondi babe el sembe tam karepto elag tam pimnep kom.
16 Tam nene sembe,
nimiri mome toro palilamogti,
“Imap so'oap Saelba Uhiropneri wanaag seneragnange nimi etneri el tanep andarina,
el ponekoag,
‘Undo unuahom,’
aro wembanep?”
aro mome toro pibog.d
Aghana nuna,
Kristus ponekori wanaag seneragnange nunag wamla.