Paulusti nimi kipsiogha
16
Nunipsa'el Febe kel enekori Yesusag wana paliro winil dalamang nimi Kengkrea so'oag wamang nimi taneko sembe yepto tongohirop kel wamla.
Yeplamsilba,
“Wali kel,”
aro sekililamna.
2 Febe kel eneko a'unag yaleba,
a'undi el kipto,
“Nu saelba uhiropne elmangkel weptop kel,”
aro sunsunum uro kiplulom.
Kel enekori nimi maikno yeplamsildi,
na babe yeplamnel ane sembe,
elag olog teko ulamleba,
“Yeplulom,”
aro a'un mololamsin.
3 Akwila elkel Priskilaapti Kristus Yesus sembe nanap nhon awe nikne tolamobo.
Sin abeneko kipsululom.a
4 Sin abenekori yeplamnerek nena,
sindam nimi tebanebag agha wamdekti yeplamnerek.
Ane sembe,
nari sin abeneko sembe,
“Wali yeplamnerek,”
aro wana awi senelamsin.
Na mo kom aghana,
yog nimi sisa Yesusag wana paliro winip tangtop nimi mog so'o tala-tala wamang nimiri babe sin sembe,
“Nu wali yeplamsirong,”
aro wana awi senelamsiang.
5 Sin abenekoap,
Yesusag wana palirop nimi sikindi aeag winip tangtop nimiap kipsululom.
Nangkae wanaagne Epenetus poneko kiplulom.
Elna Asia so'oag wamang nimi agha Kristusag wana palirop nimi samne wamla.
6 Maria kel eneko whin seklero a'un sembe awe tolamoba kiplulom.
7 Na nimi sisa nikne Andronikusap Yuniasap kipsululom.
Sin abeneko samenag sae kaupto kop aeag tobongkipsiekpa,
nanap nhon wamubu.
Na anam Kristusap ma'ap tan komag,
sin abeneko Kristusap sam ma'ap taek.
Sin Yesusti wepto pogsiog nimi paliagne wamdang.
8 Ampliatus poneko nu Saelba Uhiropne ponekoap ma'al dalamapti,
o'ona sembamnange kiplulom.
9 Urbanus poneko Kristusap ma'ap tangkamlari,
awe nikne tolamnamdi kiplulom.
Apna Stakhis,
nangkae wanaagne kiplulom.
10 Apeles ponekona,
el Kristusap ma'ap tangto uropne mibi agha sikne wamlange poneko kiplulom.
Aristobulusti ae lom nimi kipsululom.
11 Na nimi sisa nikne Herodion kiplulom.
Sin nu Saelba Uhiropne ponekoap ma'al dalamang nimi Narkisusti ae lom nimi agha kipsululom.
12 Kelabo phende Trifenaap Trifosaap kelabo abeneko nu Saelba Uhiropne ponekoap ma'ap tangto eldi awe whin seklero tolamdang kelabo abeneko kipsululom.
Nunin wanaagne Persis kel eneko babe nu Saelba Uhiropne ponekoap ma'ap tangtop kel wamlari,
eldi awe whin seklero tolamla kel eneko kiplulom.
13 Rufus poneko nu Saelba Uhiropne ponekori,
“Nanap ma'al dalamnunam,”
aro webogpa el kiplulom.b
Ilin babe na sembe nari kain saog uro wanaag taogpa kiplulom.
14 Asinkritusap,
Felegonap,
Hermesap,
Patrobasap,
Hermasap nungkabo Yesusag wana palirop nimi sinap nhon wamang nimiap babe kipsululom.
15 Filologusap,
Yulia kel enekoap,
Nereusap,
ilipsa'elap,
Olimpasap,
Allahri wepsirop kelmabo me sinap nhon wamang nimiap kipsululom.
16 A'un mamun haibil dalapmundi,
“Allahri wepsirop kelmabo me ma'ap tangto wamap,”
aro somoro togtog aro kibil dalamlulom.
Sin Kristusag wana paliro winil dalamang nimi tala-tala wamang nimiri a'un kiplamsiang.
Paulusti komoptop yubu wenero ambatsiogha
17 Nangkabo,
yubu walinge ambarelamsiek yubu ene wali ka'ebaomdi,
el taom.
A'un ma'al dalamlom aghana,
nari a'un wenelamsin nena,
yubu walinge sunsunum uro a'undi ul palapmunne abeneko pere ora nimiri a'un kiliro malingeag nenelamsiikti,
a'un a'ebahiikag aro yae paip tangkamlulom.
Sin a'un a'ebahinep nimi taneko wail ibatsimundi,
kolop talulom aro wenelamsin.
18 Sin nimi a'ebahinep nimi tanekona,
nu Saelba Uhiropne Kristus ponekori awe tolamang kom aghana,
sindam nimiri mon sek seneropne agha ulamang.
Sindi yubu lilim walingeag agha nimi maipsirop yubu lelamangne pere agha wana heksirop kom nimi haing kunuro ekel ina nenelamsiang.
19 A'undi Yesus yubu walinge ka'ero ulamlomne sembe nimiri yubu lero sabo talamlaba,
nimi niri a'un sembe ka'elamang.
Ane sembe a'undi wali ka'elamlomdi ulamlomne neneri wana awi maikno ulamnel.
A'undi walia ulamnepne sembe wana heksiropneag agha ulapmundi,
malingeap ma'ap tan koma wamlulom.
20 Ko'o we uro wamna komag Allahri nimi wana aingniro ma'asinne ponekori phia sikini nubunge neneko a'un yan mombolag ingisapto luknubalul.
A'un sembe molbarelamsin nena,
“Nu Saelba Uhiropne Yesus ponekori wana a'unag yorolamsilneag agha yepto paiamsilul,”
aro elag molbarelamsin.
21 Nanap awe nikne toropne Timotius ponekori a'un kiplamsil.
Na nimi sisa nik nimi Lukiusap,
Yasonap,
Sosipaterap a'un kiplamsiang.c
22 Paulusti yubu tipto na Tertius saeri mome toro palilamna.
Nari babe nu Saelba Uhiropne ponekoap ma'al dalamapne pere agha a'un kiplamsin.
23 Nu wene wamapne Gayusd ponekori nu aeag tolongoro kiplamsilba,
eldi aeag malamap.
Wene wamap so'oag nimi Yesusag wana paliro winil dalamap ae ngainge Gayus ponekori babe a'un kiplamsil.
Erastuse ponekona,
as soro kalurop as eneag nimi sembe kamna kaptoba o'oro paia uhiropne ponekori a'un kiplamsil.
Nungkae Yesusag wana paliropne Kwartus ponekori babe a'un kiplamsil.
[
24 Nari a'un sembe molbarelamsin nena,
“Nu Saelba Uhiropne Yesus Kristus ponekori wana a'unag yorolamsileri,
yae paiamsilul,”
aro molbarelamsin.
Sikne agha saekag lebap.]
Allah omektop yubu komopto pibogha
25 Allah omeklamsut!
Nari yubu walinge Yesus Kristus sembe ambarelamsin yubu eneko pere agha el mori a'un khapto sekitsinepne poneko wamla.
Yum-yum samenag agha lilirobag tognoroba wamog aghana,
wene lag nembaog.
26 Wene lag taog nena,
Allah ya'ag uropne ponekori aruksirop yubu sunsunum uro eldi yubu silimu tiptop nimiri lag nenero mome toro palilamek.
Lag nenero mome toro palilamek yubuna Allahrina,
“Nimi sisa mog so'o tala-tala wamang nimiri ka'elamikti,
na Allahag wana palilamukang,”
senelamogneag agha el nenelamsiogpa,
mome toro palilamek.
27 El mo Allah wana hektopne wamlaba,
Yesus Kristus pere agha el mo ya'ag uro kipto omeklamebe paghabog omeklamukap.
Sikne agha saekag lebap.
Abenda.