Roma 12

“Allahringe wamna,” aro nuri ul pinepne sembe ambatsiogha

Nangkabo, Allahri nunag yareag sembamsil ane sembe, elag sunsunum uro omekto tatnepneog wamlangena, “A'un kamag wamlomag a'undam nimiri nong ningki el sembe omekto pail palamlulom,” aro wenero mololamsin. Undo unulapmunneag agha, “Na el moringe taneba, yeng sembanelul,” aro a'undam nimi nong elag tarel pululom. 2 Wene wamap ko'oag mog so'oag nimiri ulamangne sunsunum uro a'undi nen tipto unuaheng kom. Tipto uaheng kom aghana, a'undi wanaag seneragna wendog nembahiogne pere agha, yog nimi wendog nimi saog talulom. Undo unulapmun andarina, Allahri senenne el talapmundi, walinge aro lag nembalulom. Allah wana yeng neneropne aneko ot walinge agha wamlaba, malinge nhon babe orog wamla.

3 Wene aro lemnaba, Allahri nanag wana yorolamneldi, “Yubu ene ambarel phululam,” aro nari sa'oag pibogne pere agha a'unag yubu wenero ambatnuahin. A'undam nimi wamlomne sembe wali uro seneraghal dalamsut. Allahri a'unag pogto tarelamsilne sunsunum uro Kristusag wana palilamlom. Ane sembe, a'undam nimi maibil dalamseng kom aghana a'undi, “Allahri nanag tareamnelne pere agha wene elag wana paliro ua ulamna,” aro sunsunum uro seneraghal dalamlulom. 4 Tam nene sembe sunumna tol pina ambatsinun. Nimi nong nhonog wamlaba, yan saeap, nongag wamlange yogneap babe a'ero-a'ero wamla. Yan saeap, nongag wamlange yogneap taneko nikange urop komdi, a'ero-a'ero uanep. 5 Ane saog uro, nu Kristusap ma'ap tangtop nimi wamapti, nong nhonog saog tabu. Nong enekoag nia wamlange aneko orangeap tiptangkamla. 6 Allahri nun nimiag wana yorolamsildi, a'ero-a'ero tarelamsil. Nimi nhonag Allahri, “Nari yubu silimu tipto lelamlul,” aro mikip nenero tatnep. Nimiag undo mikip nenero tatle tanena, nimi enekori wanaag, “Allahri yubu nene tatnel,” aro sik senenne sunsunum uro lelamlul. 7 Allahri nimi nhonag, “Kwema uhirop nimi wali yeplamsilul,” aro mikip nenero tatleba, wali uro nimi yeplamsilul. Ora nimiag, “Yubu amolamsilul,” aro Allahri tatleba, nimi amoro ambarelamsilul. 8 Ora nimiag Allahri, “Nimi wana mikip nembahilul,” aro tatleba, nimi wana mikip nenelamsilul. Allahri ora nimiag tarelamleri, “Eldi saeagha kwema ulamsil nimiag yepto tatsilul,” aro nimi saeag tatleba, wanaag agha kwema ulamsil nimiag tarelamsilul. Allahri nimi nhonag, “Nimi o'oro saelbamsilul,” aro sekitleba, sol wali uro nimi saelbamsilul. Allahri nimi nhonag, “Wana yareag seneropne agha nimi yeplamsilul,” aro tatleba, wana awi uro nimi yeplamsilul.

“O'ona senel dalamlulom,” aro ambatsiogha

9 Wanaag agha o'ona senel dalamlulom. Malia uroba sembe karong aro wa'eplapmundi, ot walinge agha kasmi agha saelbamlulom. 10 A'unkabo tangtop nimi mamun wanaag agha o'ona senel dalapmundi, ora nimi babe whingag nenero kiplamsululom. 11 A'un, “Sol mali,” semban koma, “Na Saelba Uneropne ponekoringe awe tolamna,” seneropne agha wana nubu uro sol wali uro awe tolamlulom. 12 A'undi wanaag, “Taulba Uhiropne ponekori yepnelul,” aro nang-nangaro wana awi uro tiboglamlulom. A'un seklenne seklelapmunne abeneko pere wana khapto ulapmundi, Allahag sol wali uro sop-sop mololamlulom. 13 Allahri wepsiog kelmabo me kwema ulamsil nimi tanekoag pogto tarelamsimundi, yingkirop nimi babe toro kiplamsululom.

14 Ora nimiri, “Seklebaik,” aro a'unag malia ulamsiik tanena, nimi eneko yo'obahin koma ot yubu walinge, “Wali wamlulom,” aro ambatsululom. 15 Wana awi senelamle nimiap a'un ma'aro wana awi senelamlulom. Wana ikindi engelamik nimiap ma'aro engelamlulom. 16 A'un mamun wanaag seneragna nhonog uro ma'al dalamlulom. Metmereng sen koma mombolag urop nimiap babe sae tiptangkamlulom. A'undam nimi sembe, “Wana hektop nimi wamap,” senenneag agha maibil dalamseng kom.

17 A'unag malia ulamsile nimiag samoro malia uaheng kom. Ot nimi niri kembi agha, “Ane walinge,” senepne sunsunum uro walinge agha ulamlulom. 18 A'un, “Nimi niap ma'ap tahabe,” aro ulamlulom. Wana porogneag agha ora nimiap ma'ap tanep tanena, tam nemban koma ma'al dalamlulom. 19 Nangkabo, a'un nari wanaag nimi wamlomne, wali ka'ebahut. Nimiri a'unag malia uhiropne samoro lumbaheng kom. Nu Saelba Uhiropne ponekori samenag lebogpa, nimiri tipto mome toro pibogti, “Na mori nimiri malia uropne lunuro opsinun. Tam nene naringe wamla,” seog. Ane sembe nimiri a'unag malia ulamsiik tanena a'undi, “Allahri tam karebaleri, malinge lumbalul,” aro liplulom. 20 A'undam nimiri samoro malinge lumbaheng kom aghana, Allah Yubuag mome toro pairopne sunsunum uro,

“Anap aisa nenep tangtop nimi nhon kwaneng yo ulamle tanena, kwaneng tatlulam.

Mag yo uale tanena, mag tebatlulam.

Anap aisa nenep tangtop nimiag walinge ulapmenne pere agha, eldi usoghag ali nenep tangtoba loloro paliropne elag talul,”

aro mome toro pibog.

21 Nimiri a'unag malia ulamikneri luknubahilul kom aro togtangto wamlulom. Samoro malinge ualulom kom aghana, a'undi walia ulapmunne pere agha malinge neneko luknubalulom.