Roma 11

Israel nimi agha nimi ologha Allahri wepto taulbahilulne sembe ambatsiogha

Wene seog tanena, nimiri haibanep nena, “Allahri wepsiog nimi taneko wene wa'epto sae lipsiog te?” aro haibanep. Undo sembaheng kom! Na Paulus babe Abrahamdi liksiogne pere agha mangap tahi. Abraham ilisag Israel ponekori Benyamin mangaro aog. Elme Benyamin ponekori mangarobari mangaroba mangkahiekne pere agha mangap tahiri, Israel nimi wamna. 2 Allahri Israel nimi wa'epto sae liamsil kom. Anamag sin wamnepne sembe samenag agha el wamogti, “Nari nimi taukang,” aro wepsiog. Allah Yubu mome toro palilamek yubuag Elia ponekori tam nene sembe yubu lebogne mome toro pibek. Elia ponekori Allahag mololamogti, Israel nimi walamsiogne sembe ekon tanep kom. 3 Elia ponekori Israel nimi sembe Allahag mololamogti, “Na Saelba Ulamnelamne, an sembe pham oro kirik alibag aukag taro pail pirobag aneko babe kwerekto yaombaong. Andi yubu silimu tiptop nimi ya'ag olamsiongba, na mo kamag wamnange babe elamneangdi omneikag,” aro Allahag molbaog.

4 Wene aro molbaogpa, Allahri samoro ambarogne sembe seneragsut. Allahrina, “Nimi maiknori mema si neneko phalamang kom. Sin mema pharop kom nimi teng-tengne (7.000) taneko wepto wali paiamsin,” aro samoro ambarog. 5 Samenag wepto paiamsiog saog uro, wene babe Allahri Israel nimiag wana yorolamsilne sembe sin nimi agha nimi ologha wepto wali paiamsil. 6 Allahri nimi wepto pipsinep nena, nimiri ul piropneag agha wepto pipsiso tanena, Allahri wana nunag yorolamsilneag agha wepto paiamsil senep kom. Aghana eldi wana nimiag yorolamsilneag agha wepto paiamsil tanena, nimiri ul piropne agha wepto paiamsil kom.

7 Wene aro lemna tanena, Israel nimi wela wamnep? Israel nimi tanekori, “Wana porog nimi nenep tahabe,” aro ulamang aghana, sindi ul piropne pere agha uro yabinep kom. Ot Allahri wepsirop nimi mo wana porog nimi nenelamsil. Aghana wepsiog kom nimi taneko wana kas nembahiog. 8 Tam nene sembe Allah Yubu mome toro palilamek yubuag wamlangena,

“Allahri sin wana inmon nenelamsiogpa, wene babe ulamsil nena,

‘Sin haingdi ibikti, kemero saelbaikag,’ aro haing ulohirop.

Aori ka'ebaikti, ka'ero seneraghikag aro wana inmon nenehirop,”

aro mome toro pibek.

9 Daud ponekori babe yo'osirop sepna mome toro palilamogti,

“Sindi kwaneng pairobag anekona, ikin pemna paliropne saog tahoba, ikinne sinag timbaho.

Sindi ulamongne sunsunum uro sinag uro yaboho.

Sindi kwaneng teroba anekori sin wana kiliro malingeag nembahiso.

10 Sindi haing ubahisoba, haingdi ipseng kom.

Sin maghan porogne nhon wamna koma kiniptopneog taheng,”

aro yo'osin sepna mome toro pibog.

11 Wene aro lebogpa, nimiri nen haibanep nena, “Undop pagha tanena, Israel nimi tanekori Allah sae libekti, phukul ingiekti, ya'ag timbaek te?” aro haibanep. Undo sembaheng kom! Ot Israel nimiri irikna phibaekne sembe Allahri nimi sisa yog nimi talulamsil andarina, Israel nimi tanekori, “Nunag undo unuahiso,” aro mon sek uahilul. 12 Allahri irikna pibogne neneko Israel nimiri phibaekne pere agha ni mog so'oag nimi tup nenelamsil. Israel nimiag kwema ulamsilne pere agha nimi sisa yog nimi tup nenelamsil. Undop pagha tanena, Israel nimiri Allahag sikne aro wana to'opto palilamik tanena, nimi niag tup nenehiroba phelektopne lag tanepneog wamla.

Allahri tala-tala urop nimi taulbahilulne sembe ambatsiogha

13-14 Wene a'un Yahudi sisa kom nimi sembe yubu ambatnuahin. Na mo Kristus ponekori wepneogti, “Yahudi sisa kom nimiag nari yubu ambarel phululam,” aro pogneog. Wepto pogneogpa, Yahudi sisa kom nimiag Yesus yubu sop-sop ambarelamsin aghana, “Nari nimi sisa Yahudi nimi taneko babe taulbahiso,” senelamna. Ane sembe, “Yahudi nimi tanekori mon sek sembaikti, ‘Nu babe taulbahiso,’ seneropne agha wali taukang,” aro nari awe tolamnange sembe paliag nenero lag phoro ambarelamsin. 15 Allahri Yahudi nimi taulbahinepne sembe seneragsut. Allahri Yahudi nimi wa'epto epsiogne pere agha nimi sisa yogne mog so'o tala-tala wamang nimi Allahap samoro ma'ap tanep. Undop pagha tanena, Yahudi nimi Allahri nen toro pipsile tanena, teptop nimiag agha kamag tangtopne saog uro lag tanepneog wamla.

16 Allah sembe pimnep roti sembe sunumna tol pina yubu ambatnuahinne seneragsut! Roti khepto tara sip Allah sembe sam tatnepne mem senep tanena, kheptoba tara sip babe mem wamla. Kal yareng sembe babe, yareng ene kal ngaingeringe mo wamla tanena, kal sae babe el moringe senepneog wamla.

17 Allahri kelmabo me sembe kal zaitunag tol pina sunumna sumbatsinun. Kal meropne ponekori kal zaitun nhon melamnari, kal sae nhon-nhon karepto toboghanep. Karepto toboghanep aghana, kal zaitun yogne mo pongoropne kal sae karepto tomnep. Karepto tomnari, payingkina merop kal yo'o anekoag kal sae optenapto kaupnaba, poba eptenaptanep. Merop kal zaitun yareng wali wamnaba, poba tenaban kal sae mag telamnari, kal sae wendogne eneko wali pongkanep. Yahudi nimi kal zaitun merop kal saog wamapba, a'un Yahudi kom nimi mo pongorop kal zaitun sae saog wamlom. Allahri a'un Yahudi kom nimi topsiogti, merop kal yo'o anekoag ma'aro kaupsiogpa, Yahudi nimi sembenge tero nubu talamlom. 18 Ane sembe a'un Yahudi kom nimiri sin Yahudi nimi merop kal agha karepto tobogsirop kal sae aneko loba semban koma, a'undam nimi paliag nenep tangto maiptaheng kom. A'undam nimi maibil dalamlom nimi, tam nene sembe wali uro seneragsut! Yareng aneko wamso kom tanena, kal sae babe wamnep kom. Aghana kal sae orog tanena, yareng wamnep.

19 Wene aro lemna tanena, a'un maibil dalamlom nimi nhondi samoro lemnep nena, “Nu optenapto pongoro wamnepne sembe kal ngainge ponekori merop kal nene agha kal sae karepto tobogahiog,” senep. 20-21 Hae, nene sik. Ot sin kal sae karepto tobogahiog kal sae taneko kal yo'o neneag mo pongorop. Kal sae taptopne wamek aghana, sindi Yesusag wana palilamek komne sembe Allahri karepto tobogahiog. A'undi Yesusag wana palilamlomne sembe a'un kal yo'o neneag optenapto ma'abahiog. Ane sembe a'undam nimi maiptaheng kom. A'undam nimi sembe wali uro seneraglapmundi, “Kal sae optenapto pongoropne saog wamnari, Yesusag wana palilamne kom tanena, karepto toboghaneleag,” aro log sembalulom.

22 Tam nene sembe seneragsut! Allah wana walinge poneko wana yo sirikne babe wamnep. Sin Yesus sae tiptan koma tiniro phukul ingiek nimi tanekoag wana yo sirik sembahiogti, karepto tobogahiog. Aghana a'undi, “Allah wana walingeri nu paiamsil,” aro elag wana palilamlom tanena, wana walinge agha a'unag ulamsilul. Elag wana palilamlom kom tanena, a'un babe karepto tobogahinep. 23 Aghana sin Yesusag wana palirop kom nimi karepto tobogahiog nimi tanekori babe elag sikne aro wana palilamik tanena, Allahri sin babe nen kal yo'o enekoag optenapto ma'abahinep. 24 Sin nen samoro optenapto ma'abahinepne sembe ambatnuahin. A'un nimi samenag mo pongorop kal zaitun sae saog wamlum. A'un merop kal enekoag mo pongoro sektop kal sae saog wamlum kom aghana, Allahri a'un karepto kal yo'o merop kal zaitun enekoag optenapto ma'abahiog. Allahri a'un paiag agha payingkina merop kal yo'oag ma'abahinep tanena, sin samenag agha merop kal enekoag mo pongoro sektop kal saena, nen ma'abahinep kom te? Samenag merop kal enekoag mo pongoro sektopba, kareplopsiog kal sae eneko nen samoro ma'abahinepneog wamla.

Allahri Israel nimi ni taulbahinep sum sembe ambatsiogha

25 Nangkabo, nari yubu ambarelamsinne nene tognorop saog wamogpa, wene uro yabalamlange a'un ekon uro wamnep kom senelamnari ambarelamsin. Israel nimi samenag pogto sin nimi maikno wana kas talameka, wene wamap ko'o eneag babe Yesusag sikne aro seneraglamang kom. Aghana Allahri nimi sisa Yahudi kom nimi tala-tala wamang nimi agha, “Nari kelmabo me taukang,” aro a'iliro wepsiogti yoplamsil. Allahri Yahudi kom nimi wepto yopsirop nimi ni elag yaik taneogna, Israel nimi ni taneko babe taulba uhilul. Tam nene sembe, “A'un Yahudi kom nimiri a'undam nimi sembe, ‘Wana hektop nimi wamap,’ senenneag agha maibil dalapmunag,” aro tognoro wamogne nene tibin nenero yubu ambarelamsin. 26 Allahri Israel nimi ni taulbahilulne sembe Allahri yubu silimu tiptop nimiri mome toro palilamekti,

“Nu taulbahiropne poneko Sion so'oag agha lag talul.

Allahri, ‘Uaheng kom,’ seneropne Yakubti nimi likto pirop nimiri ulamang aghana,

taulbahilenge agha malia ulamangne neneko toro kolbalul.

27 Nanap sinap yubu nikne lero salag paip tangtopne sunsunum uro

sum eneko sindi malia ulamangne neneko epto toboghanun,”

aro Allahri yubu silimu tipto mome toro pibek.

28 A'un nimi sisa Yahudi kom nimiri Yesus yubu walingeag sikne aro wana palilamnepne sembe sin Israel nimi maiknori Yesus yubu walinge eneko karong alamek. Karong alamekne pere agha sin Israel nimiri Allahap aisa nenel dalamang. Aisa nenel dalamang aghana, sikinisag yabo sembe Allahri sin Israel nimi wepsiogti, o'ona sembamsil. 29 Allahri sikinisag yabo yopsiogne babe, “A'unag tatsinun,” seogne babe angkanep komneog wamla. 30 Undop pagha tanena, a'un samenag Allah yubu ka'elamlum kom aghana, Israel nimiri Allah yubu wa'eplamek. Wa'eplamekne sembe wene Allahri a'un yareag senelamsilne pere agha Yesus yubu walinge ambatsirop yubu ka'elamlom. 31 Ane saog uro, Allahri sin Israel nimi babe yareag senelamsildi, “Lag nembatsisene,” senelamsil. Allahri a'un wene yareag sembamsilne pere agha Yesus yubu walinge ka'elamlom. Israel nimi tanekori wene ka'elamang kom aghana, amik Allahri yareag senelamsilne pere agha ka'ebaukang. 32 Allahri nimi sembe yareag senelamsil nena, el wamogti, “Nimi niri nari yubu ingisaplamikti, loba nenel dalamukang,” aro el wamogti, sindi malia uropne eraruk urobag lipsiog. Lipsiog andarina, amik nimi niag yareag senelamsildi, ulamsilne lag talul.

Allah omektop yubu ambatsiogha

33 Ot Allah el mo wana hekto phelektopne wamla. Eldi wanaag seneraglamlange nubu sirik wamlari, nimi tapto tup nembahineba kom tanep komne wamla. Eldi tam karepto palilamlange nimiri seneraghi agha ni el tanep kom. Eldi ul pilenge babe nimiri wibin kembi agha, “Undo unualul,” aro seneragnep kom.

34 “Imap so'oap Saelba Uhiropneri wanaag seneragnange nimi etneri el tanep?

Etneri elag, ‘Undo unuahom,’ aro wembanep?”

35 “Etneri elag sam nubu uro tatnep andarina,

el ponekori kamna lunuro tatso?”

36 Nia mangkina eldi sumbaogpa, el sae pere agha wamnepti, el mo sembe ua ulamla. Ane sembe, el paliag nenero omeklamebe paghabog omeklamukap. Sikne agha saekag lebap.