Pogsiog Nang 19

Paulus Efesus wamogha

Apolos poneko as Korintus wamogpa, Paulus poneko yim kelero palamogha as Efesus yaog. Efesus aneko Yesus yubu ka'ero neleptop nimi etpareap Paulusap haiptaek. 2 Sinap haiptaekti, Paulusti sin wamek nimi tanekoag hailamsiogti, “A'undi Yesusag sikne aro seneraghaomba, Allahri Eldamne Yame Walinge a'unag tatsio te?” aro haibahiog.

Wene aro haibahiogpa sindina, “Kom. ‘Allah Eldamne Yame Walinge,’ selamne nenena ik nhon babe ka'elamap kom yubu agha leplam,” seek.

3 Wene seekpa Paulusti, “A'un maghag pelengkipsiek nena, etneri yubu ambatsiogne sik sembalumneag agha maghag pelengkipsiek?” aro haibahiog.

Wene aro haibahiogpa sindina, “Yohanesti yubu ambarelamsiogne ka'ebaburi, sik senelamububa, ambarelamsiogne sunsunum uro maghag pelengkahiek,” seek.

4 Wene seekpa, Paulusti yubu ambarelamsiogti, “Yohanesti nimi maghag pelengelamsiog nena, nimiri malia seneragto uropne laplobi agha Allahri senenne saelba ul pinepne sembe maghag pelengelamsiog. Yohanes ponekorina, ‘Allahri, “El amik yalul,” seogne ponekoag sikne aro wana palilamlulom,’ aro Yohanesti maghag pelengelamsiog. ‘El amik yalul,’ seogne poneko Yesus yanepne sembe lebog,” aro Paulusti ambatsiog.

5 Paulusti wene aro ambatsiogpa, sin nimi taneko, “Yesus nu Saelba Uhiropne wamla,” aro el siag kekhaekto nenel dalamekne sembe Paulusti maghag pelengkipsiog. 6-7 Maghag pelengkipsiog nimi taneko nimi kabuni aobare saog uro wamek. Paulusti aobare wamek nang tanekoag sae pipsiogpa, Allah Eldamne Yame Walinge sin nongag tahiog. Allah Eldamne Yame Walinge sin nongag tahiogne nenekori pam keyagman nenelamsiogpa, Allahri tarelamsiogti, el nenelamsiog yubuag lelamek. Yubu lero ambarelamsiek yubuna, Allah Eldamne Yame Walingeri yeplamsiogpa, yog nimiri yubu el tangom agha sin ekon urop yubuag agha lelamekti, Allah yubu silimu tipto ambarelamsiek.

8 Wene aro ambatsiekti wamekpa, Paulus poneko Yahudi nimiri Allah yubu lero winirop aeag aneko log kom uro wal wilindi wa'alamogti, Allahri mog so'oag nimi saelba uhiroba sembe, “Sik senelamlulom,” aro ambarelamsiog. Eldi ambarelamsiog yubu ka'elamek nimi tanekori, “El tahabe,” aro hailamekne eldi tibin nenero ambarelamsiog. 9 Aghana sin nimi etpare usog mikip talamekti, sik senelamek komdi, nimi maikno whingag Yesusti Allahag samoro pirop Ina pa'abaogne sembe mali aro lelamek.

Wene aro lelamekpa, Paulusti sin Yahudi nimi wene alamek nimi laplobi agha Yesus yubu ka'ero neleplamek nimi enero poa pihiogti, Tiranusti yubu tam lelamog ae lomag sop-sop winil dalamek. Winil dalamekti, yog nimiag Yesus yubu ambarelamsiogpa sindi, “El tahabe,” aro hailamekne eldi tibin nenero ambarelamsiog. 10 Undo unulamekne nene hengkun phende yubu ambatto lel dalamekpa, nu Saelba Uhiropne poneko sembe ambarelamsiog yubu ane nubu talamogpa, Yahudi nimiap Yunani nimiap mog so'o Asia wamek nimi ni ka'ebaek.

Skewa elmabo sembe lebogha

11 Allahri Paulus pere agha ulamogne, nimiri samenag agha ilirop komne maikno, “Allah mikibari uanepne el pere agha ual,” senenne Paulusti ulamog. 12 Allah mikibari el pere agha ulamogpa, Paulusti nongag enektop ag babe, whin luptop ag babe tolamekti, nimi naiktop nimiap, phia yonge nimi kulomag urop nimiabag, “Wali nembahilul,” aro ag taneko poa sinag pail palamek. Sinag pail palamekpa, malia nimi kulomag ua ulamsiogne lanalamekpa, wali talamek. 13 Wali talamekpa, mema mili lero nimi whesirop nang Yahudi nimi wamek nang mog so'o eneko tongoro, “Nimi phia kulomag uropne yag lambahukap,” aro ulamek. Tongoro ulamekti, nu Saelba Uhiropne Yesus si lelamekti, “Paulusti Yesus si ambarelamsilne neneko si lelamna. Lambahut!” aro tongoro ulamsiek. 14 Sin undo wheroba tongolamsiekne taneko anabiag agha wamek nimina, nimi whesirop nang saekpareri ambatto poa tongolamsiek. Nimi saekpare nimi tanekona, memne Allah sembe palirop nang sikini nhon, Yahudinge si Skewa poneko elmabo saekpareri ambatto whero poa tongolamsiek.

15 Wene aro whelamsiek aghana, phia nimi kulomag ua ulamsiogne taneko nhondi lelamogti, “Nana, Yesus na el. Paulus sembe babe ka'ebano aghana, a'unna etne?” alamog.

16 Wene alamogti, phia kulomag wamogne poneko nong mikip sirikti wea sekom agha whesirop nang saekpare nang taneko mulog opsiog. Olamsiogpa ae lom wamekag aneko lanalamekpa, sindi ag enekto amekne taepsiogpa, kerebenang eneng lan-lana piek. 17 Undo uro yabiogne neneko sembe ka'ebaekti, Yahudi nimiap Yunani nimiap as Efesus wamek nimi taneko log aro nu Saelba Uhiropne Yesus si paliag nenelamekpa, nubu talamog. 18 Yesusag sikne aro seneraglamek nimi taneko maikno yalamekti, “Samenag nuri malia undo-undo ulamobo,” aro nimi haingag lag phoro lelamek. 19 Mema mili lero pharop nimi taneko maikno yaekti, mema uroba si mome toro paiameka togto payaekti, nimi maikno haingag agha aukag talamek. Mema si pharop yubu mome toroba ni aukag talamekne tane samenag kamna kapto tolamekne kamna kaptoba wanange teng-tengne (50.000) agha kamna kapto tobek aghana, Yesusag sikne aro seneraglamek nimiri sindinge mema si mome toroba aukag tabek. 20 Undo uro yabiogne toman agha imap so'oap Saelba Uhiropneri yubu ane nubu tangto sabo talamogti, mikip tangto ka'elamek nimiri wanaag pongolamog.

Demetriusti yubu, “Yanghang alamsululom,” aro suknubaogha

21 Ni undo uro yabiogpa, amik sum Paulusti el wanaag agha, “Makedonia so'o ina agha mog so'o Akhaya pineri, nen tipto as Yerusalem pinun,” aro seneraghog. Seneraghogti, “As Yerusalem pineri, na as Roma nimi babe kemel pihinepneog wamla,” seog. 22 “Na mog so'o Asia ane olog wamnea amik pinun,” aro el yeptop nimi Timotiusap Erastusap, “Samenag Makedonia pururom,” aro pogsiog. Pogsiogpa pirekpa, 23 wamoghag aneko Paulusti, “Yesusti Ina pa'abaog,” aro amoro ambarelamsiogha sembe yog nimi maiknori tam nubunge nenero haum aro walamsiek.

24 Tam nubunge nembaek nimi nhonna, si Demetrius wamog. Demetrius poneko wali-walia kirik leng-leng arop kirik perak aroba agha sunuro sorop nimi nhon wamog. Demetrius ponekori sunuro solamog nena, Efesus nimiri pharop kel si Artemis wamnep ae nubunge as Efesus wamogne sunumna sunsunum uro mem phabaneba nhon nimiri ae lomag paia phalamnepne sunulamog. Demetriusti sunuroba taneko Efesus wamek nimiri maiknoro kamna kapto tol tolamek. Tol tolamekag agha sunuro sorop nimi yogne as Efesus wamek nimi babe tup talamek. 25 Demetrius ponekori elkabo sunulamek nang poloro wimbahiog. Wimbahiogti yubu ambarelamsiogti, “Nangkabo, a'un el wamlom nena, nuri sunuroba tane nimi maiknori kamna kapto tolamangneag agha tup talamap. 26 Tup talamap aghana, wene ane Paulus pone yingkina ambarelamsildi, ‘Mem phabaneba nimiri saeri sunuropne nene memne mikiba wamang kom,’ aro nimi maikno tane ambatsioba, a'undi haingdi iamlomdi, aori babe ka'eamlom. Ekel ina pabihirop yubu ambarelamsilne ka'ebaong nimina as Efesus nimi aghabog kom, aghana as ni Asia so'oag wamang nimi babe ka'ebaongdi, sik senelamang. 27 Nunin Artemis phalamap kel enekona, Asia nimi taneap, tala-tala mog so'oag nimiapti kel eneko phalamang. Aghana Paulus nenekori undo ambarelamsilne sembe, nunin Artemis mema sunuro phalamap kel eneko nimiri karong alamikti, teba'en nembaikag. Teba'en nembaukangne abeneog kom aghana, nuri Artemis nunin phalamap kelap, eldi mem ae tane sorop ae nenekoap babe mali sembaikag,” aro ambatsiog.

28 Wene seogne neneko ka'ebaekti, yo lelem yubu haum aro lelamekti, “Nu Efesus nimi sembe nunin phalamap kel Artemis ya'ag paliag wamlul,” alamek. 29 As ane wamek nimi tukom-taghom agha longkaekti, Makedonia so'oag agha Paulusap nhon palamdek nang Gayusap Aristarkhusap sae salero kiliro pabalamsiekti, as Efesus nimiri longorobag aneko poa pihiek. 30 Poa pihiekpa, Paulus ponekori, “Poa pihiangag aneko pinun,” sembaog aghana, Yesus yubu ka'ero neleplamek nimi tanekori, “Pululam kom,” seek. 31 Mog so'o Asia saelbamsiek nang etpare babe sinap Paulusap nimi pali wamekti, elkabo wamek. Elkabo tanekori nimiag yubu palilamekti, “Paulus as Efesus nimiri longorobag aneko pilul kom,” aro yubu pairo molbaek. 32 Nimi maikno as Efesus nimiri longorobag longolamek aghana, nimi nhon-nhon aghabog tam nene sembe el uro wamek. As Efesus nimiri longorobag aneko nimi longol wa'alamek nimi tanekori haum aro lelamekti, “Longol wa'iap nena yubu tamna nene sembe lelamap,” alamekpa ora nimiri, “Tam ene sembe kom. Tamna nene sembe longol wa'iap,” alamek.

Wene alamek aghana, sinna tamna ekon wamsiog. 33 Ekon wamsiogpa, Yahudi nimiri nimi nhon si Aleksander webekti, “Andi yubu tibin nenero ambatsululam,” aro sae kiliro sekirekpa, el ponekori, “Yubu ambatsinundi, yubu kom tahut,” aro sae kwarobatsiog. 34 Sae kwarobatsiogti, “Yubu ambatsinun,” aro ulamog aghana, nimi maikno tanekori, “Elna Yahudinge,” aro el tahiogpa, yubu maikno haum aro lelamek. Haum aro lelamekti, “Nu Efesus nimi sembe nunin phalamap kel Artemis ya'ag paliag wamlul,” aro haum alamekpa, heng ko'o phende piog. 35 Heng ko'o phende piogpa, nimi nubunge Efesus nimi sembe yubu tam kareptop yubu mome toro pibogne poneko wamogti, sin whingag sekogti, “Yubu lemnun,” seog. “Lemnun,” seogpa nimi maikno taneko yubu kom taek. Yubu kom taekpa ambarelamsiogti, “A'un Efesus nimi nangkabo. Samenag nu Efesus nimiag kirik imag agha timbaogne nunin Artemis yame sunumna saog urop kirik nuri saeag taogpa, nubu kel ene mem aeag wali paia ulamap. Nubu kel Artemis phalamap kel eneri kirikap, el mem aeap nu Efesus nimiri wali uro paia ulamaba sembe nimi ni mog so'oag wamangne el uro wamang te? 36 Ekon wamang komdi, nimi nhondi babe orolena senep kom ane sembe, wana aingnil dalapmundi, wali uro seneraghongkia ualulom. 37 Nimi payahilomne abeneri nuri mem aeag ua uroba haogha tolamdang komdi, nuri phalamap kel nubu kel wamlange san tiliplamdang kom, aghana payahilom. 38 Tam orog agha tane payahilomne, sunsunum kom agha payahilom. Tam lelekto kemero kareptobag wamla. Ane sembe, Demetriusap elkabo awe nhon tolamang nimiapti, ‘Yubu tam nhon nimiag pibukap,’ sembaik tanena, tam neneko poa tam lelekto kemero kareptop nimiag payahinep. Yubu tam lelekto kemero kareptop aeag pabahiikpa, nun saelba ulamsiang nimiri sop-sop tam kareplamangne sunsunum uro kareplamukang. 39 ‘Tam yogne yubu lebukap,’ senelamlomne babe wamle tanena, nu saelba uhirop nangdi arukahiekne sunsunum uro nimi ni poloro wimbahimunba, wali uro tam karebaukap. 40 Ot sumene tam orog aghana, yubu haum aro walamsilomne neneag agha nu saelbamsiang nangdi samenag yubu sia pibekne philamlom. Wene ulamlomne sembe nu saelbamsiang nangdi sembanep nena, ‘Nunap, “Mal tabukap,” aro poloro winil dalamang te?’ senelamikti nunag tam pipsiik tanena, nurina tibin nembatsinepne welaro sinag ambatsinep? ‘Tamna nene sembe,’ aro tibin nenero ambatsinep taneogna hae,” seog.

41 Wene aro ambatsiogti, nimi tanekoag, “Pululom,” aro ambatsiog.