Pogsiog Nang 20

Paulus mog so'o Makedonia laplobi agha piogha

As Efesus nimiri haum aro walamsieka aneko ta'ap seekpa, olog wameka Paulus elkabo Yesus yubu ka'ero neleplamek nimi taneko yopsiog. Yopsiogti wana aingnibahiogti, “Na Makedonia so'oag pinun,” aro ambatsiogti piog. 2 Makedonia ina agha palamogti, nimi tanekoag yubu maiknoro ambare-ambare wana aingni-aingni palamsiogti, Yunani so'oag piog. 3 Yunani so'oag piogti, wamogpa wal wilindi taogpa, “Mog so'o Siria mag alip toman pinun,” sembaog. “Mag alip toman pinun,” sembaog aghana, Yahudi nimiri, “Paulus obukap,” aro saekag lebekne sembe el taogti, “Mog so'o Makedonia ina agha samoro pinun,” sembaog. 4 “Pinun,” sembaogti palamogpa, elap nikag palamek nangna, Pirus elme Sopater Bereangeap, Tesalonika nimi phende Aristarkhusap Sekundusap, Derbenge Gayusap, Timotius ponekoap, Asia nimi phende Tikhikusap Trofimusap, sin nang ene Paulusap nhon palamek. 5 Paulusap elap nhon palamek nang taneko a'ep taekti, sin samenag as Troas piekti, nu sembe tiboghamsiekti, as Troas wamek. 6 Allah omekto kwaneng roti walerop komne terop li terogha, mag alip toman as Filipi laplobi agha palamububa, ae inipna tombare taog. Ae inipna tombare taogpa, as Troas pibu. Sin samenag piekti, Troas wamek nangap haiptaburi, nikag wamubu paghabog ik saekpare taog.

Paulus as Troas wamogpa, Eutikhus teptopneag agha kamag taogha

7 Minggu sum taogpa, “Kwaneng roti khepto tukap,” aro winip taburi Paulusti, “Nu ambuhum pukap,” aro nungkabo nunap nhon wamubu nimiri, “El tahabe,” aro hailamekne tibin nenero ambarelamsiog paghabog, ae inipna tom nusam taog. 8 Ae tika alikinag ae lomag wamubuag aneko whea maikno tiniro ik-ik piek. 9 Sindi, “El tahabe,” aro haibaeka Paulusti yubu kiliro-kiliro tibin nenero ambarelamsiog abeneko kabuni me nhon si Eutikhus poneko ka'en phoro soro kuptopne ina siramag pukamogti, kabuni me eneko haing whi uro wamna koma kwahingdi tungum kanem alamogti, eba timbaog. Ae tika wilindipne nenekoag agha eba timbaogpa, nimiri salero kemelamekag agha ya'ag tebaog.

Eutikhus ae tika wilindipneag agha eba timbaog. (Pogsiog Nang 20:10)

10 Ya'ag oroba wamogpa, Paulus poneko kulukaogti, kabuni tebaogha aneko somoro saelbamogti, nimi tanekoag, “Yubu maikno lero engkaheng kom. Me ane kamag wamla,” seog.

11 Wene seogti, Paulus nen samoro aeag tai waelbaogti, kwaneng khepto teekti, nen yubu lelamog paghabog ae kwelekaog. Kwelekaogpa Paulus poneko lambaogti palamog. 12 El palamogpa, nimi tanekori me kabuni aneko kamag wamogne elenge aeag pabiekti, sin wana aingniro wamekpa, wana awi maikno uahiog.

Nu Paulusap as Troas agha as Miletus palamubua

13 “Pukap,” sembabuba Paulustina, “A'un sam kabongag agha mag alip toman as Asos pimundi, wapmunag na yan toman agha yanun,” seogha sunsunum uro nu samenag kabongag mag alip toman agha as Asos piburi wamubu. 14 Wamububa el nunap as Asos haiptaburi, kabongag Paulusap nhon waelbaburi, mag alip toman agha as Metilene pibu. 15 As Metilene mabubua lukunap as enekoag agha mag alip toman mo palamububa, imbaogti kwelekaogpa, mag longoro kanektop so'o Khios peramag piburi, inipnag nhon mabubu. Aneko mabubua kwelekaogne lukunap mag longoro kanektop mog so'o as Samos piburi, mabubua kwelekaogne as Miletus pibu. 16 Paulusti, “Nu anam Yerusalem pin komag agha Yahudi nimiri ik nubu sum Pentakosta uaikag,” sembaogne sembe, “Mog so'o Asia ik maikno wamukap kom. As Efesus babe yan ingkan koma pukap,” aro tam karebaog.

Paulusap Efesus nimi wenehirop nangap a'ep taeka

17 As Miletus pina wamuburi Paulustina, “As Efesus Yesusag sikne aro winil dalamang nimi wenehirop nang na as Miletus wamnaag yaukangba, enel phululom,” aro Miletus nimi pogsiog. 18 Enel pihiekti yaekpa, Paulusti as Efesus nimi pairo wenehirop nangag yubu lelamogti, “Nangkabo, samenag Asia so'o eneag yahiri, sum enekoa alniro a'unap nhon ua ulamsiri, ulamnange a'un el wamlom. 19 Yahudi nimiri nanag yo palilamneekti, ‘Obukap,’ aro saekag lero ulamneekpa, wana mombolag nenep tangto ulamsi. Hail mag pelengero engelamsiri, nu Saelba Uhiropne Yesus ponekori awe tolamsinge seklero tolamsi. 20 Undop aghana, ta'ap sen koma a'un sembe, ‘El uro wamikpa yepsilul,’ senelamsinge ni a'unag amoro ambarelamsisiri, ologha babe tognobahi kom. Tognoban koma yubu ni amolamsisinge nimi ni whingag agha ambatsisiri, a'undinge aeag poloro winil dalamlumag babe tongoro ambatsisi. 21 Yahudi nimiap Yunani nimiap ambarelamsisiri, ‘Malia seneragto ulamlomne laplobi agha Allahri senenne salelapmundi, nu Saelba Uhiropne Yesusag sikne aro wana palilamlulom,’ aro sikne lag nenero ambatsisi. 22 Aghana wene Allah Eldamne Yame Walingeri na wanaag aruklamnelba, as Yerusalem pinun. Yerusalem pineba, nanag uaukangne ekon wamna. 23 Na ekon wamna aghana, na as nhonag pang, nhonag pang ulamnaba, Allah Eldamne Yame Walinge ponekori, ‘Nimiri haing sae kaupkeikpa seklebalulam,’ aro wenero ambarelamnel. 24 ‘Seklebalulam,’ aro ambarelamnel aghana, nari wana nong ene sembe seneraghal dalamna kom. Nari seneraglamnange, nu Saelba Uhiropne Yesusti nanag, ‘Nari awe tongoro nimi yeplamsululam,’ aro na saeag pibogne sol wali, wali uro awe toro komobililamnun. Awe na saeag pibog nena, ‘Allahri nimiag wana yorolamsilne sembe wali yubu sikne lag nenero ambarelamsululam,’ aro na saeag pibog.

25 Wene aro na saeag pibogpa, as nhonag pang, nhonag pang ulamnori, a'unag babe Allahri mog so'oag nimi saelbamsilne sembe ambarelamsino aghana, a'undi nari whing ene nen olog imnululom komne, na el wamna. 26-27 Ane sembe sumene ane yubu mikip uro a'unag lelamnangena, Allahri nanag, ‘Yubu ane ambatsululam,’ aro ambatneonge ta'ap sen koma a'unag tipto ni ambarelamsino. Nari walinge uanepne uitna ane sembe, ka'erop kom nimi Allahri opsileba, nimi nhondi eneng babe nanag tam tanep kom.

28 A'undam nimi wana yae uptangto wapmundi, a'unkabo pham domba saog uro wamang nimi taneko babe haing whi uro yae paiamsululom. Allah Eldamne Yame Walingeri, ‘A'unkabo yubu amohiro paiamsululom,’ aro a'un sekitsio ane sembe, a'undi Allah Eldamne enengag agha toro topsiogti, poloro winilamsil nimi taneko haing whi uro yae paiamsululom. 29 Na el wamnange, na amik pineba, yog nimi pai kam yonge saog wamik nimi a'un nusamag sekelingkikti, Yesusag sikne aro winip tangtop nimi pham domba saog urop nimi taneko o'ona sembahin koma wea oro kilbahukang. 30 A'undam nimi anabiag agha babe nimi sekelingkikti, Allah yubu sikne sengkwanekto nenelamikti, orolenange lebukang. Orolenange lelamik yubuag agha Yesus yubu ka'ero neleptop nimi wana tolamsiikpa, orolenange lerop nimiag sikne aro ka'ero nelebahukang. 31 Ane sembe yae up tangkamlulom! Hengkun wilindi sinag kweleknag na olog ta'ap sen koma nari wanaag agha hail mag pelengero a'un ni amoro ambarelamsinonge ekon taheng kom.

32 Wene, ‘Allahri a'un paiamsilul,’ aro nari a'un Allahri saeag nenelamsin. Allahri wana a'unag yorolamsilne sembe ambarelamsin yubu salelapmunba, Allahri a'un mikip nenelamsileri, ‘Na namabo taukang,’ aro weplamsil nimi niag eldinge saeagha tatsilul.

33 Nari, ‘A'undi saeagha leng-leng aroba emas to, perak to, enektop ag to a'undi na tatneheng,’ aro wanaag seneraglamno kom. 34 Nanap nangkabo nhon wamubu nimiap teko nunag wamogne sembe nadamne saeag agha kamna kapto tolamsinge a'un el wamlom. 35 Nari ulamnonge a'un sembe, ‘Sindi babe imneikti ulamukang,’ aro sunumna ulamno. Nia mangkina ulamnonge, ‘A'undi sol wali, wali uro welapmundi, mikip kom nimi yeplamsululom,’ aro ulamnoba imneom.

Nia ni ulamnonge aneko, Yesusti yubu ambarelamsiogne seneraghi agha ulamno. Nu Saelba Uhiropne Yesusti ambarelamsiogti, ‘Nimiri a'unag tatsiikne olog wali senelamlom aghana, a'undi nimiag tatsimunne sembe wali sirik alamna,’ aro ambatsiog. Yesusti ambarelamsiogne seneraghi agha nia mangkina a'un anabi agha ulamno,” aro Paulusti ambatsiog.

36 Ni yubu ane Paulus ponekori ambatsiogti, yabu sanukto pulingkina sinap nhon Allahag molona molbaek. 37 Allahag molona molbaekti, sindi Paulus somoro togtog aro kiplamekti, “Wali pululam,” aro maiknoro engkarek. 38 Wana ikin uro engkarek nena Paulusti, “Nari whing ene nen imnululom kom,” seogne neneri sin wana ikin sirik nembahiogpa engkarek. Wana ikin uro, “Mag alip toman pilul,” aro kabong wamoghag mag abolag pail piek.