Pogsiog Nang 26

Agripa whingag agha Paulusti pelebel tanan yubu lebogha

Wene aro ambatsiogpa, Agripa ponekori Paulusag, “Wene andi ulamlamne sembe pelebel tanan yubu leplulam,” seogpa Paulusti sae la'abatsiogti, yubu lebog. Yubu lelamogti, 2 “Yubu sia leropne Agripa, nani. Yahudi nimiri lolorop yubu nanag lolbaneongne sembe sumene an whingag agha pelebel tanan yubu lag phoro lemnunne sembe wana awi uro wamna. 3 Yahudi nimiri sikinisari ulamekne saelba ulamangneap, tam sin anabiag lag taongeap ni ane sembe an el wamlam. An el wamlamba, nari ambatkenunne andi wana pailingkina wali ka'eamnululam aro mololangken. 4 Na nari asag agha mangkaneekpa, na kabuniag agha Yahudi nimiri saelba ul palamekti, ulamekne aombaneek. Aombaneekpa as Yerusalem ane babe yahiba, nen anea ma'aro aombaneekne sunsunum uro na yabalamsiri ulamsi. Na yabalamsiri ulamsia Yahudi sisa nimi as Yerusalem wamek nimiri imneekne sin el wamang. 5 Sin samenag agha na sembe el wamang. Sin el wamang nena, na Farisinge wamsiri, Musari yubu kop-kop tagto amoropne sunsunum uro mikip uro saelba ul palamsi. Musari yubu ane sunsunum uro ul palamsinge sembe sindi babe, ‘Sikne lag nenero ambatsukap,’ sembaik tanena, ‘Sik lepla,’ aro ambatsinep. 6 Na wene ane sekamnange, ‘Allahri nunisa yaboag, “Undo uanun,” aro salag pibogne sunsunum uro sik talul,’ senelamnari nang-nangaro ulamnange sembe nimiri saelbaneek. Saelbaneekti wene ane tam kareptop nang whingag payaneongba sekamna. 7 Nu Yahudi nimi sisa aobare wamapne tane, ‘Allahri samenag salag pibogne sunsunum uro sik uro yabilul,’ aro samenag nimiri sinag kweleknag sol wali, wali uro Allah omeklamekne saog uro nuri babe nang-nangaro omeklamap. Nani Agripa, an yubu sia lelamlamne, nu Yahudi nimi sisa aobare nimiri undo seneragto ul piropne sunsunum uro ulamsinge sembe Yahudi nimiri nanag, ‘Malinge ulamlam,’ aro tam nanag pibek. Tam nanag pibekpa, na wene pelebel tanan yubu ambarelangken. 8 Nangkabo, ‘Allahri teptop nimi kamag nenelamsil,’ senenne sembe a'un nimi nhondi, ‘Sik sembanep komne,’ aro tam karebanep te?

9 Samenag nari babe, ‘ “Yesus Nazaretne si nubu taleag,” aro yo uro luknubahinun,’ senelamsiri 10 as Yerusalema aneko undo unulamsisi. Memnang Allah sembe palirop nang sikini yabo tanekori, ‘Nuri sae wamla,’ aro yubu nanag pibekpa, Allahri wepsirop nimi maikno haing sae kaupto kop aeag tolongolamsisi. Kop aeag tolongolamsisiri, ‘Ya'ag tepnange babe wali tebaik,’ aro yubu lepsiri, Yahudi nimi nubunangap saekag lebubuag agha, Yesusag seneraglamek nimi ya'ag opsiek. 11 Yahudi nimiri Allah yubu lero winirop ae nhonag pang, nhonag pang ulamsisiri, ‘Yesusag seneraglamangne sembe opsukap,’ aro sen-sena elamsisi. Ero ililamsisiri, ‘Yesus san tiliplopsut,’ aro ambarelamsisi. Yo maikno senelamsisiri, as soro kalurop as maikno weag wamekag babe elamsisiri, ‘Seklebaukang,’ aro sarekereplamsisi,” aro Paulusti nimi nubunge Agripa whingag ambatsiog.

Paulusti, “Yesusti na yopneog,” aro ambatsiogha

(Pogsiog Nang 9:1-19; 22:6-16)

12 Paulusti nen tipto ambarelamsiogti, “Undo unulamsiba, memnang Allah sembe palirop nang sikini yabo tanekori, ‘Nuri sae wapmendi, as Damsyik pimendi, undo-undo ualulam,’ aro ambatneekpa, ‘As Damsyik pinun,’ aro palamsi. 13 Nani Agripa, yubu sia lelamlamne, ina toman palamsiba, ae siro heng ik mol-mol alamog abeneko heng tingiropne phiro tibin warerop sirikne imag agha nanap, nangkabo palamubu nangag warelopsiog. 14 Warelamsiog abeneko nangkaboap nu so'oag malingkiburi, ka'elamsiba yubu nhon Ibrani yubuag lelamogti, ‘Saulus! Saulus! Sa'a sembe na, “Seklebale,” aro ulamnelam? Eldi yagto pabalangkelne pheleptangka pinep kom. Pheleptangka palapmen tanena, og seklebalulam,’ alamogpa ka'ebahi. 15 Wene alamogpa, ka'ebahiri narina, ‘Nai, anna etneri lelamlam?’ sehiba nu Saelba Uhiropne ponekori, ‘Na Yesus andi, “Seklebale,” aro ulamnelamne ponekori lelamna,’ alamogha ka'ebahi. 16 Eldina, ‘Wene pukmendi sekelabi. An na arukna wamlulam. Andi na sembe wene imnelamne babe, amik lag nembaneba iplulamne babe, “Na sembe sikne lag nenero ambarelamsululam,” aro nari an sekitkenundi, an haingag lag tan. 17 Nari an poglangkenne, “Yahudi nimiap, Yahudi sisa kom nimi as tala-tala wamang nimiap babe sin wamangag pululam,” aro poglangken. Poglangkenne saelbagheikpa, Yahudi nimiri saeag agha babe, Yahudi sisa kom nimi mog so'o as tala-tala nimiri saeag agha babe, nari an taluro sae lopkenun. 18 Poglangkenba sin wamangag pimendi, sin nimi taneko haing uropne haing kwelekel palamsululam. Haing kweleklamsimenba, inibinag lilobi agha samoro tibinag yalamukang. “Haing kwelekamikti, phia sikini nubunge Satanas nenekori saeag agha sae lop tangom agha Allahag samoro yalamikpa, Allahri saelbamsilul,” aro poglangken. Sindam nimiri na Yesusag sikne aro wana palilamik tanena, Allahri sin, “Naringe aghabog wamukang,” aro wepsirop nimi taneko sembe, “Sindi malia uropne tam wailag nembaleba, Allah Eldamneri mabo taukang,” aro poglangken,’ aro Yesusti ambatneo. 19 Ane sembe, nani Agripa, an yubu sia lelamlamne, Yesus imagne ponekori kekneba nanag uaori, yubu ambatneogne sunsunum uro ul palamsi. 20 As Damsyika Yahudi nimi wamekneag agha alnibahiri, as Yerusalem nimiap, Yudea so'oag urop nimiap, Yahudi nimi babe, Yahudi sisa kom nimi babe Allah yubu ambarelamsisi. Sinag ambarelamsisiri, ‘Malinge seneragto ulamlomne lilobi agha Allahag samoro yalulom. Allahri seneropne saelbapmundi, sunsunum uro walia ulamlulom,’ aro ambarelamsisi. 21 Undo wene aro ambarelamsisinge sembe Yahudi nimiri Allahri Mem Ae aramag agha saelbaneekti, ‘Ya'ag obukap,’ aro uaneek. 22 Undo, ‘Obukap,’ aro uaneek aghana, Allahri samenag agha yeplamneoa wene babe paiamnelba wamna. Wamnari wene ane sekamnari, nari haingdi ipsinge nimi ologne nubunge ambarelamsin. Nari sikne lag nenero ambarelamsin nena, ot samenag Allahri yubu silimu tiplamek nangap Musa ponekoapti, ‘Amik uro yabilul,’ aro mome toro pibek yubu sunsunum uro ambarelamsin. Yogne agha ambarelamsin kom. 23 Samenag ambarelamsiek yubuna, ‘Allahri wepto poghol aogne Kristus poneko seklero tebaleba, Allahri nimi teptopne ua urobag agha el samenag kamag nembalul. Kamag nembaleba, elkabo Yahudi sisa nik nimi babe, Yahudi sisa kom nimi babe Kristus ponekori tibin nenero ambarelamsilul,’ aro lebek yubu sunsunum uro nari nen tipto ambarelamsin,” aro Paulusti ambatsiog.

Paulusti Agripaag ambarelamogti, “Yesusag sikne aro seneraglamlulam,” aro ambarogha

24 Paulusti, “Undo-undo ulamsi,” aro pelebel tanan yubu ambarelamsiog abeneko, Festus ponekori yubu mikip uro lelamogti, “Paulus, an serem ulangkelba lelamlam. ‘Nia mangkina el tahane,’ aro el talamlam aghana, seneragna maiknori serem ulamlam,” seog.

25 Wene seogpa, Paulusti samoro, “Na serem saelbanelba, lelamna kom. Festus nani walinge, na seneragna walinge sik yubu lelamna. 26 Nani Agripa, yubu sia lelamlamne, wene aro lemnange tane mo uro yabionge agha lemna. Nen tognorobag agha uro yabiogne agha lemna kom. Ane sembe na sik senelamnange, ni lemnange tane an ekonne nhon lemna kom. Ni lemnange tane an el wamlam ane sembe, na log kom uro an whingag lag phoro lelamna. 27 Nani Agripa, yubu sia lelamlamne, samenag Allahri yubu silimu tiplamek nangdi lebekne sembe sik senelamlam te? Na el wamnange, nani, andi babe sik senelamlam,” seog.

28 Wene seogpa, Agripari Paulusag, “Andi senelamlamne, ‘Wene abene, nari olog yubu lemnange ka'ebi agha sik sembaleri, Kristen nimi talul,’ senelamlam te?” seog.

29 Wene seogpa Paulusti, “Nani, an mo kom. Aghana anap nimi taneap sembe nari Allahag molona molbarelamsin nena, ‘Wene babe to, olog wamebea babe to, nari yubu ka'ebaneang nimi tane na saog taukang. Na saog taikpa, nimi tanena haing sae kaupto pipsiseng kom,’ aro Allahag molbarelamsin,” seog.

30 Wene aro Paulusti ambatsiogpa, nimi nubunge yubu sia leropne Agripaap, ilipsa'el Bernikeap, wamekag mog so'o saleropne Festusap, nimi ni sinap pukamekne tanekoap sekek. 31 Sekekti lanalamekti, sin mo-mo yubu leple palamekti, “Nimi ene uaoa sunsunum uro kop aeag tolongoro babe, ya'ag onne babe, tamna orog wamla,” aba palamek.

32 Wene aba palamekpa, Agripa ponekori Festusag ambarelamogti, “Nimi eneri, ‘Kaisarag yoplamna,’ seho kom tanena, kop aeag agha sae lopto lambitsebe. Aghana eldamneri, ‘Kaisarag yoplamna,’ seo ane sembe, wene Kaisarti agha el sae lopto lambitnep,” seog.