Paulusti, “Roma nimi saelba uhiropne nubunge Kaisarag pinun,” seogha
25
Festus poneko,
“Yudea so'o saelbamlulam,”
aro nimi nubunge towalengkaogpa,
as Kaisarea yaog.
As Kaisarea ae inipna ik wilindi wamogha as enekoag agha Yerusalem waelbaogti wamog.
2 As Yerusalem wamogpa,
memnang Allah sembe palirop nang sikini yaboap,
Yahudi nimi nubunangap Festus poneko whingag piek.
Piekti,
“Paulusti mali-malia ulamogne sembe elag tam pibubunge wamla,”
aro el nenero ambarekti,
molona nhon molbaek.
3 Elag molona mololamekti,
“Andi nu sembe wana wali sembahimen tanena,
‘Paulus as Yerusalem poa pululom,’
aro arukahimenba poa pukang,”
aro molbaek.
Wene aro molbaek nimi tanekori samenag agha tognoro saekag lelamekti,
“Festus whingag piberi,
‘Paulus Yerusalem poa pululom,’
aro molbaukap.
Molbabeba Paulus ina toman payalamikpa,
Paulus obukap,”
aro saekag lebekti,
elag molona molbaek.
4 Wene aro molbaek aghana,
Festus ponekori,
“Paulus as Kaisarea kop aeag wamlaag wamlul.
Wamleba na babe,
‘Olog wamnea as Kaisarea samoro pinun,’
sembamna.
5 Eldi uaogne sembe,
‘Elag tam pibukap,’
sembamun tanena,
a'un a'uni yabo nanap nhon as Kaisarea piberi,
elag tam piplulom.
Elag tam pimnepne wamle tanena,
lelekto kembaberi,
‘Malia uaog to,
kom to?’
aro tam karebanun,”
seog.
6 Undo wene seogti,
Festus poneko ik linbare to,
ik sa'obare to undo as Yerusalem wamogha samoro as Kaisarea kulukul piog.
Kaisarea piog sum eneko imbaogti kwelekaogpa,
lukunne neneko,
“Yubu tam lelekto kembaberi,
tam karebanundi,
Paulus enel pululom,”
aro ilipsabo ambatsiog.
7 Paulus sin poloro wamekag enero payaekpa,
Yahudi nimi Yerusalema yaek nimi taneko el kanero sekek.
Paulus kanero sekekti,
yubu maikno lelamekti,
“Malia undo-undo ulamog,”
aro lolorop yubu lelamek aghana,
“Malia uaogne undo-undo ulamog,”
alamekne tiplamog komdi,
nimiri sik sembanep kom saog wamog.
8 Wene alamekne tiplamog komdi,
sik sembanep kom saog wamogpa Paulusti,
“Nandamne sembe pelep tangtop yubu lemnun,”
aro sekelingkiog.
Sekelingkiogti yubu lelamogti,
“Nari ulamnangena,
Musari aruksirop yubu Yahudi nimiri salero ul palamang yubu phibano kom.
Allahri Mem Ae sembe babe,
yubu sia leropne nubunge Kaisarag babe,
nari tam malia unne babe,
san lenne babe orog senelamna,”
seog.
9 Wene seogpa,
Festus ponekori,
“Yahudi nimiri nanag wana yororo senelamnukang,”
senelamogti Paulusag hailamogti,
“ ‘Tam ane as Yerusalema karebaukapti pukap,’
senne sembe saekag senelamlam te?”
aro haibaog.
10 Wene aro haibaogpa Paulusti,
“Samenag yubu sia leropne nubunge Kaisarti anag,
‘Yudea so'oag pimendi saelbamsululam,’
aro sekitkeo.
Sekitkeoba an whingag tane wamnari,
tanea babe andi tam karebanep.
Nari ologha babe Yahudi nimiag tam malinge uan komne nai an el wamlam.
11 Nari uanonge sembe andi tam karebi agha,
‘Malia uaonge sunsunum uro opmunba tebalul,’
aro sik uro tam karebanep tanena,
na tebanea babe tebanun.
Aghana tam nanag palilamangne orolenange lelamangdi,
lolorop yubu lelamang tanena,
nimi nhondi babe sinag wana yorobahinne sembe Yahudi nimi saeag nembanukang kom.
Na Kaisar ponekoag yoplamna.
El whingag pineba,
Kaisarti tam karebalul,”
seog.
12 Wene seogpa,
Festus poneko el yubu eptop nangap yubu saekag lebekti,
Paulusag ambarelamogti,
“ ‘Kaisarag yoplamna,’
selamba elag pimenba,
Kaisarti tam karebalul,”
seog.
Festusap Agripaap yubu lepteka
13 Ae ik etpare wamekpa,
nimi nubunge yubu sia leropne Agripa poneap,
ilipsa'el Bernikeap,
“As Kaisarea Festus poneko kipnunam,”
aro yarek.
14 Aneko sin ik etpare undo wamekti,
Festus ponekori Paulusag tam pibekne sembe yubu sia leropne Agripa ambarelamogti,
“Nimi sae kauptopne nhon wamlange Feliksti saelbamsiog liag agha Yahudi nimiri,
‘Eldi malia ual,’
aro salero Feliks whingag tam pabiekpa,
el kop aeag tobongkibog.
Kop aeag tobongkibogha tam kareban komdi,
wene babe kop aeag wamla.
15 Kop aeag wamlange ponekona,
na Yerusalem pinoba,
memnang Allah sembe palirop nang sikini yaboap,
Yahudi nimi wenehirop nangapti elag tam palilamongdi,
‘Malia uaogne sembe elag tam pelengero oplulam,’
aro molbaneong.
16 Wene aro molbaneongba,
nari ambarelamsinori,
‘Mog so'o saelba uhirop nang Roma nimiri ul piropne sunsunum uro salero ul palamap.
Ul piropne nene sunsunum uro nimi nhondi nimi nhonag tam palilamle tanena,
tam el pina malia uropne poneko haiban koma wana yorobahinne sembe nimi saeag nembanep kom.
Tam tangtop nimiap,
tam palirop nimiap nikag wamnaba,
anabiag uropneri malia uropne ponekoag haibanep.
Haibanba tam tangtopneri eldamne sembe pelebel tanan yubu tibin nembahin taneogna,
tam lelekto kemero kareptop nimiri,
“Ualne sembe undo uaukap,”
aro tam karebaleba,
eldi yubu sunsunum uro tam tangtopneag uro yabilul,’
aro ambatsino.
17 Wene aro ambatsinoba,
sinap nhon as Kaisarea tane yabori,
maboboa kwelekaonge,
‘Ta'ap sen koma yubu tam lelekto kembaberi karebaukapti,
el enel pululom,’
seno.
18 Elag tam palirop nimi taneko kanero sekamongdi,
‘Eldi malia uaogne,
“Undo-undo uaog,”
aro lag phoro lebukang,’
sembano.
‘Malia uaogne sembe lebukang,’
sembano aghana,
sindi elag tam palilamongne nari samenag sembanonge sunsunum uro lebong kom.
19 Nari sembanonge sunsunum uro lebong kom aghana,
ot sindi omeklamangne sembe aghabog tam nembaongdi,
yubu lelamong.
Apna nimi nhon samenag tebaogne si Yesus sembe Paulusti,
‘El sik uro kamag taogti wamla,’
aro ambatsiogne sembe yubu tam saog taog.
20 Sin undo yubu lelamongba nari,
‘Yubu tam ane sembe lelamang,’
aro karebel pana,
enhaun seo.
Ane sembe nari Paulusag hailamnori,
‘An Yerusalem pimenba,
Yahudi nimi ua urobag tam ane karebanundi,
wali sembalam te?’
aro haibano.
21 Wene aro haibanoba Paulustina,
‘Na Kaisarag yoplamnari,
kop aeag ane nang-nangaro,
“Kaisarti tam karebalul,”
aro wamnun,’
seo.
Ane wene seoba nari,
‘Kaisarag pognun,’
aro kop aeag paiamna,”
seog.
22 Wene seogpa,
Agripa ponekori Festusag,
“Nari babe,
‘El ponekori yubu lemnepne ka'ebahane,’
sembamna,”
seogpa Festus ponekori,
“Ambuhum el yubu leplenge ka'ebalulam,”
seog.
Agripa wamoghag Paulus enero poa pieka
23 Wene seogpa,
mabeka lukunap Agripaap,
ilipsa'el Bernikeap nubu nimiri towalengeroba towalengkiptekpa,
yin salerop nang sikini yaboap,
as eneko wamek nimi sikini yaboap wa'alamek.
Wa'iekpa Festus ponekori,
“Paulus tol pululom,”
aro nimi arukahiog.
24 Paulus tol pina payaekpa,
Festus ponekori yubu lelamogti,
“Yubu sia leropne Agripa nuniap,
nimi ni tane yalomne nangkabo!
Yahudi nimi ni taneko Yerusalem wamang nimiap,
Yahudi nimi as soro kalurop as Kaisarea tane wamang nimiapti el pone sembe,
‘Malia ulamog,’
aro yubu maikno lelamong.
Yahudi nimiri nanag yingkina koloro,
‘Nimi ene nen kamag wamnep komdi tebalul,’
aro haum alamong.
25 Undo wene alamong aghana,
nari kembanori,
tam uaogne sunsunum uro tam elag palina babe orog uao.
Ya'ag ona babe orog uaoba eldamneri,
‘Kaisarti tam karebalul aro elag yoplamna,’
seoba nari,
‘Kaisar yaghag as soro kalurop as Roma pabaikpa,
Kaisar whingag pilul,’
aro yubu lemno.
26-27 Yubu lemno aneko agha,
‘Eldi tam malia uaogne Kaisarti kemero karebalul,’
aro mome toro palina tam orog kembano.
Na el wamnange,
nimi nhondi malia uropne tam kembanba,
‘Eldi uaogne tam nene agha uaog,’
aro mome toro palinne oroghag agha,
‘Nu saelba uhiropne Kaisarti kembalul,’
aro elag pognep kom sembamna.
Ane sembe a'un ni wamlomne whingag el pailan.
Nuni yubu sia leropne Agripa,
an babe Yahudi nimiri omekto ul palamangne elne wamlam.
Tam eldi uaogne kembabeba,
tam wamlenge ibebe tanena,
eldi uaogne sembe nari mome toro pimneri,
Kaisarag pognun,”
aro ambatsiog.