Paulus sae haing kaupto wamogha mag alip toman agha as nubunge Roma sip pabalameka
27
“Kaisar yaghag mog so'o Italia sip pululom,”
aro Festus ponekori tam karebaogti,
Paulusap yog nimi haing sae kaupto wamek nimi tanekoap Kaisar arukna yin salerop nang sikindo nhon sina Yulius poneko saeag nembahiog.
El saeag nembahiogti,
“Andi poa phululam,”
aro ambarog.
2 Ambarogpa kabong mag alip toman piroba nhon as Adramitium agha yaogne neneko,
“As Asia so'oag mag laut longorop mag abolag sorop as tanekoag nhonag wa'al pang,
nhonag wa'al pang uanun,”
aro ulamogne nenekoag wa'iburi pibu.
So'o Makedoniange nhon as Tesalonika agha yaogne si Aristarkhus poneap nikag pibu.
3 Mabubua kwelekaogpa,
as Sidon sangnil ingkibu.
Sangnil ingkiburi,
yin saleropne Yulius ponekori Paulus o'ona sembaogti,
“Ankaboag pimendi,
anag kwema ulangkelne tatkukang aro kemel phululam,”
seog.
4 As Sidon aneko laplobi agha mag alip toman agha palamububa,
khao nu kabong palamubua whingag siba yalamogha sembe mag longorop mag laut longo kanektop mog so'o Siprus khao maruktobag sip pibu.
5 Siprus so'oag anekoa mag alip toman aghabog palamubua,
mog so'o Kilikia mag laut longorop mag abol peram toman agha palamubu.
Nen tipto palamuburi,
mog so'o Pamfilia mag laut longorop mag abol peram toman agha laploplo as Mira Likia so'oag sangnil ingkibu.
6 As enekoag agha yin salerop nang sikindo nu poamsiogne ponekori kabong nhon as Aleksandria agha yaog kabong eneko,
“Mog so'o Italia pinun,”
aro ulamogha ibog.
Ibogti yalamubu kabong enekoag agha laplobi agha,
“Mog so'o Italia pinun,”
aro ulamog kabong enekoag enero poa tobongkipsiog.
7 Tobongkipsiogpa mag alip toman palamububa,
khao kabong whingag siba yalamogti,
yalamubuag sip ko'oro poa pihinep ulamogne nenekori kabong alibag ik etpare mabuburi,
eraruk uro as Knidus peramag pibu.
Khaori kabongag wamubunge,
“Pukap,”
senenag ko'oro pabahinep kom ane sembe,
Kreta khao maruktobag sip ina agha yim Salmone amusogti lilirobag khao aingnirobag sip pibu.
8 Opsinep saog ulamogpa,
nemen-nemen eraruk uro yim Salmone amusoghag anekoa mag alip toman palamuburi,
kabong nenne babe sangnil pirobag as Lasea peramag,
“Sangnil Piroba Walinge,”
si engeropne nenekoag sangnil pibu.
9 Undo palamububa,
Italia sip mag alip toman pinep li eneko phibaogpa,
Israel nimiri nubu sum kwaneng terop kom sum enekoa uro libek.
Undo libekpa,
khao li taogne sembe,
“Magti kula'epto tapsileag,”
aro Paulusti yubu wenero ambatsiog.
10 Yubu ambarelamsiogti,
“Nangkabo,
nari kembanba,
nu ina panne eraruk ulamlaba,
iamnarina pukap kom.
Kabongag poamaba babe,
kabong babe,
nu nimi tane babe opsinep iamna,”
seog.
11 Wene seog aghana,
yin salerop nang sikindo ponekori Paulusti lebogne sembe sik sembaog komdi,
kabong ngaingeap,
kabong u o'orop nimiapti leptekne agha sik sembaog.
12 Kabong sangnil ingkirobag ane,
“Khao li wamnual,”
aro kabong sangnia unne eraruk wamog.
Eraruk wamog aghana,
mag kanero longorop mog so'o Kreta so'oag as nhon sina Feniks wamog.
As Feniks aneko kabong sangnirobag heng purukul pirobag sip tibogto,
waneng sip babe,
sirik sip babe tibogtobag wamogpa,
“Khaori opsinep komag aingnirobag wamla,”
sembaek.
Ane sembe kabong porop nang tanekori,
“Anea lambaberi,
khao li wamlange nene as Feniks pina wamukap,”
aro wene seek aghana,
nen nimi nhon-nhon nimiri saekag lebek kom.
13 “Lambaukap,”
aro wamek abeneko phoana nemenag yangaro-yangaro mag laut longorop mag siba mog so'oag sip yalamog.
Mag laut longorop mag sip agha phoana yangaro-yangaro yalamogpa,
“Hae phoana aneri Feniks asag poa pihilul,”
sembaek.
Undo senelamekti kirik saogha,
“Kabong saelbamlul,”
aro maghag pelengeroba aneko toro kabongag towalengkaek.
Ag kabongag kerekaekpa,
“Phoanari kabong ko'oro pabalamlul,”
aro kerektoba towalengkaekti,
mog so'o Kreta mag abol peram toman kabongag palamubu.
Mag laut longorop mag alibag palamekpa, khao nubunge mu aro yalamogha
14 Olog palamekpa,
khao nubunge Kreta so'oag ople siba mag laut longorop mag simbik pabirop khao yalamog.
15 Yalamogti nu palamubu kabong enekoag sibil alamog.
Khao yalamogne neneko mikipti,
“Mog so'o Kreta mag abol toman palamukap,”
aro ulamubu aghana,
kabong aneko panne eraruk wamogpa,
kabong aneko babe khao palamoghag sip mikip taog.
“Elba eldi ualea,”
aro pulobububa,
mag laut longorop mag sip pabalamsiog.
16 Pabalamsiogti mag longo kanektobag as Kauda aneko maruktobag sip aneko pail pihiogpa,
eraruk uro kabong nubunge pomaghag sip kerektop kabong ologne haing kerekto kiliro toro pibubu.
17 Kabong ologne neneko kiliro towalengkaburi,
nu pabalamsiog kabong eneko magti sibil alamleba,
“Taongkaleag,”
aro haing mikipne agha nu pabalamsiog kabong eneko wan-wanoro kaubek.
Kaubekti,
“Khaori mag laut longoropne ingkisag Sirtis kirik a'angkeag poa meldal pihileag,”
aro log senelamek.
Log senelamekti,
ag kabongag kerekaekne,
“Phoanari ko'oro pabalamlul,”
aro kerektoba wamogne togto pibekpa,
kabong aneko khao palamog ina nemen palamog.
18 Mabubua kwelekaogne neneko khao aneko olog paplamog komdi,
opsinep ulamogpa,
kabongag ikinne poameka taneko maghag talamsiek.
19 Mabubua ik wilindip sum eneko kabongag soroba taneko sinba kabong porop nimi tanekori maghag talamek.
20 Khao anekori unulamogpa,
kabongag palamubunge nene heng babe imberea babe olog ililamubu kom.
Undo palamubua nu taulbahinep ina nhon wamnepne ero tilamubu aghana,
ik etpare imberea babe heng babe ililamubu komdi,
khao anekori sibil alamogpa,
“Ot tebaukap aneog,”
aro seneraghamubu.
21 Nimi taneko ik maikno kwaneng tero koma wamekpa,
Paulus sin anabiag sekogti,
yubu ambatsiog.
Yubu ambarelamsiogti,
“Nangkabo,
Kreta wamoboa nandamneri lemnonge a'undi ka'ebanohomba,
nuri poamaba tologlamobongeap,
kabong kwerekto maghag talamobongeap unuahabe kom.
22 A'un nari wembahino yubu ka'ebaom kom aghana,
wene nari wenelamsinne,
wana aingniro wamlulom.
Nu kabong eneag agha nu ni tebaukap kom.
Ot kabong aneogna loba talul.
23 Nari lelamnangena undo.
Allah nari omeklamnange ponekoringe wamnari,
na inipnag lenda mamna.
Lenda mamnaba,
Allah eldamneri arukna imagne malaikat nanag poghol alba,
yaldi na peramag sekamla.
24 Na peramag sekamlari,
yubu leplangena,
‘Paulus,
log sembaheng kom.
An Kaisar whingag pinepneog wamla.
Allahri anag wana yororo sembangkelba,
nimi anap kabongag wamlomne tane nhon babe tebalulom kom,’
aro wene malaikat ponekori ambatnel.
25 ‘Tebalulom kom,’
aro ambatnelba,
nangkabo,
wana aingniro wamsu.
Nanag ni ambatnelne nene ni sik uro yabilul aro na Allahag sikne aro seneraglamna.
Ane sembe nangkabo,
wana aingniro wamsu.
26 Tebaukap kom aghana,
kabong aneri nu mag longoro kanektobag pabalamsileri,
meloptaleba kabong ane kolabalul,”
aro Paulusti ambatsiog.
27 Ik meke sum eneko khao anekori kabong ane pabalamog paghabog mag laut Adria longorop maghag pabalamsiog.
Pabalamsiogpa inipna tom nusam talamogpa,
inipnag kabong porop nimi tanekori,
“Mag abolag payalamsil te?”
sembaek.
28 “Abolag payalamsil te?”
senelamekti kirik haing kerekongkia peleng-peleng yalamekpa,
mag longoroba we aneko sununa meterb teng nhon epto naualbare saog wamog.
Nen olog pabalamsiogpa,
haing pelengelamekpa,
we sununa meter teng nhon epto wilindi saog wamogpa,
ibom agha,
“Mag abolag sip payalamsil,”
aro el tahiog.
29 “Kabong aneko kirik sildiag tipleag,”
aro sin log lelem kirik simbuk tombare kabong pomaghag sip pelengkaekti,
“Elemag kwelekale,”
aro imagneag mololamek.
30 “Elemag kwelekale,”
aro mololamekti kabong porop nimi tanekori,
“Magti kabong aneko kolabaleagti,
kabong nubunge laplobi agha kabong ologne maghag pelengkaberi,
mag alip toman tognoro pukap,”
aro saekag lebek.
Undo tognoro saekag lebekti,
maneri ulamek nena,
“Kabong paiag sip saelba unna kirik simbuk whingag sip wamlange pelengkaukap,”
seek.
Wene seek aghana wanaag,
“Kabong nubunge liloa tognoro pukap,”
aro seneraghekti,
kabong ologne neneko mag laut longorop maghag pelengkaek.
31 Undo unulamekpa,
Paulusti ipsiogti,
el taog.
El taogti,
yin salerop nang sikindoap ilipsaboap tibin nenero ambarelamsiogti,
“Kabong porop nimi tanekori,
‘Tognoro pukap,’
aro ulamang aghana,
kabongag wamna koma liloa piik tanena,
nhon kamag wamlulom kom,”
seog.
32 Wene seogpa,
“Tognoro pukap,”
aro ulamekne sembe el taekti,
yin salerop nang tanekori kabong ologne kabong nubungeag haing kerekameka taneko haing karepto maghag talopsiek.
Kabong ologne maghag talopsiekpa,
kabong nubunge porop nimi tognoro pinep kom wamog.
33 Kwelekanep peram wamogpa Paulusti,
“Kwaneng tululom,”
aro wenelamsiogti,
“ ‘Khao kom taho,’
senero wamomdi,
ik mekpare kwaneng ten koma wamom.
34 A'un wali tanepne sembe kwaneng a'un samenag tululom aro wenelamsin.
A'un ni ane wamlomne a'undi usoghag hong pongoropne hong kiki nhon top tangka timbalul kom,”
aro ambatsiog.
35 Wene aro ambatsiogti,
Paulusti kwaneng roti tobogti,
sin wamek nimi ni whingag agha Allahag,
“Nani,
walia tatsilam,”
aro lelamogti,
khepto-khepto tatsiogti,
Paulusti samenag teog.
36 Sin wana ikin wamsiogne wana aingnibahiogpa,
sin babe awi uro kwaneng telamek.
37 Nu kabong enekoag yalamubu nimina,
nimi teng sa'obare eptopneap (276) ane yalamubu.
38 Kwaneng teburi,
mon tahiogpa,
kabongag kwaneng roti sumbaneba gandum wana poamekne taneko,
“Kabong keyagman talul,”
aro mag laut longorop maghag talolamsiek.
Mag alip toman pirop kabong kolapto yabiogha
39 Kweleklamogpa kabong porop nimi tanekori tilamekpa,
mog so'o kirik a'angkea ingkisag sameptopne nhon tiboghaek.
Kabong porop nimi taneko mog so'o ene sin babe ekon aghana,
kabongag agha tiboghaekag aneko,
“Tibil pukap,”
sembaek.
40 Anekoa,
“Kabong saelbamlul,”
aro kirik simbuk pelengeroba taneko haing kaongoro maghag talopsiek.
Haing kaongoro maghag talopsiek abeneko kabong u o'oroba,
“Nhonag sip pabileag,”
aro kerektopne toro pibekti,
“Pilul,”
senenagne u o'obaek.
Phoana mag laut longorop mag siba yalamogpa,
“Mog so'o ingkisag tibil pukap,”
aro ulamekti,
ag kabongag kerekaekpa,
“Phoanari ko'oro pabalamlul,”
aro kerektoba kabong whingag sip towalengkibekti palamek.
41 Mag ingkisag palamek aghana,
kabong eneko kirik a'angkeag malukaogpa,
kabong whingag sip kirik a'angkeag werelop taogpa,
lebe senep kom uaog.
Lebe senep kom uaogpa,
pomaghag sipna mag kula'epto yalamogti,
olamogne nenekori kolabaog.
42 Kolabaogpa yin salerop nang kabongag wamek nang tanekori nimi sae kaupto pabalamsiek nimi taneko “ ‘Maghag agha ya'aro abolag pina merebaikag,’
aro opsukap,”
aro ulamek.
43 Undo unulamekpa,
yin salerop nang sikindo Paulus pabalamogne ponekori,
“Paulus obikag,”
sembaogti,
“Pelebanun,”
aro irikahiog.
Irikahiogti ambarelamsiogti,
“Mag alip toman ya'aro pirop nimi samenag maghag taptaikti,
ya'aro abolag pukang,”
seog.
44 Mag ya'aro panne ekon nimina,
kal la'asi agha to,
kabong kwerektoba agha to salero mag alip toman agha mag abolag undo piburi,
nimi nhon babe tebaek kom.