Pogsiog Nang 22

Yahudi nimiag Paulusti yubu lebogha

Paulusti yubu lelamogti, “Yahudi nimi nangkabo, nani yabo, a'undi lolomnange nanag lolbitneomba, nari tibin nenero pelep tangtop yubu ambatsinunne ka'eamlulom,” seog.

2 Undo wene seogpa, nimi maikno tanekori, “Nimi poneri Ibrani yubuag ambarelamsil,” aro ka'ebaekti, yubu koma wamek. Yubu koma wamekpa, Paulusti nen yubu lelamogti, 3 “Nangkabo, a'un Yahudi nimi wamlomne saog uro na babe Yahudinge wamna. Na mangkaneekag as Tarsus Kilikia so'oag wamlange nenekoag agha mangkaneekpa, as Yerusalem ane yahiri, nubu tahi. Allahri aruksirop yubu Musari mome toro pibog yubu elne Gamaliel ponekori Musa yubu kop-kop tagto amoro ambarelamneogpa, wali uro el tahi. El tahiri, a'un wamlom nimi taneri, ‘Allah sembe yeng uro awe tolamnun,’ aro sol wali uro ulamlom saog uro, nari babe yeng uro Allah sembe ta'ap sen koma sol wali uro ulamsi. 4 Allah sembe sol wali uro ulamsinge toman agha Yesusti pa'abaog Ina nelepto palamang nimi sarekerepto ya'ag olamsisi. Nenne ya'ag olamsisiri, nenne salero nengaboap kelaboap kop aeag tolongolamsisi. 5 Undo ulamsinge nene memne Allah sembe palirop nang sikini nubunge babe, Yahudi nimi wenehirop nang nubunang babe, sindi nari ulamsinge el wamangdi, ‘Sikne lepla,’ aro lag nenero ambatsinep. Sindi mikipne nanag paibatto mome tatneek. Mome tatneek nena, ‘Yesus yubu ka'erop nimi ebahimendi, haing sae kaupto saelbahilulam. Saelbahimendi as Yerusalem samoro payahimenba opsukap,’ aro mome nanag paibatto tatneek. Mome ane poro, ‘Yesus yubu ka'erop nimi saelbahinun,’ aro sikinkabo Yahudi nimi as Damsyik wamek nimiag mome aneko tarel palamsiba, 6 as Damsyik peramag palamsiag agha heng ik mol-mol alamog abene libango aropne nubunge haing omomne imag agha nanag tingil omneog. 7 Tingil omneogpa, na so'oag malingkihiri ka'elamsiba, yubu nhon lelamogti, ‘Saulus! Saulus! Sa'a sembe na, “Seklebale,” aro ulamnelam?’ seog.

8 Wene seogpa, nari hailamsiri, ‘Nai, anna etneri lelamlam,’ sehiba eldina, ‘Na Yesus Nazaretne andi, “Seklebale,” aro ulamnelamne ponekori lelamna,’ seog. 9 Heng yame saogne nanag tingkaneogne nimi nanap palamubu nimiri babe ibekti, aoag agha yubu lilim ka'ebaek aghana, yubu nanag lelamogne sindi ka'ebaek kom. 10 Eldi yubu ka'ebaek kom aghana, nari lelamsiri, ‘Na Saelba Ulamnelamne, sa'a agha nari uanun?’ sehiba eldina, ‘Sekmendi Damsyik pululam. Damsyik pimenba, Allahri an sembe, “Ulamlulam,” aro aruklangkelne ni ambatkelul,’ seog. 11 Wene seog aghana, na haing omomne imang warero libango aropne nenekori haing ubaneogpa, pinep komdi nangkabo nhon palamubu nangdi sae salero Damsyik poa pineek. 12 Poa pineekpa, as Damsyik aneko nimi nhon sina Ananias wamog. Ananias ponekona, Musari aruksirop yubu wali uro saelba ulamogpa, Yahudi nimi as Damsyik anekoa wamek nimi niri el sembe wali aro lelamek. 13 El poneko na peramag yaogti, yubu lelamogti, ‘Saulus, nangkae. Haing kwelekae,’ seog abeneko pere na haing kwelekahiri, nari elag kembahi. 14 Elag kembahiba, nanag eldi yubu lelamogti, ‘Allah nunisag yabo paia uhiropne ponekori weplangkeldi, “Allah Eldamne seneropne walinge el taleri, Nimi Sikne poneko ipleri, eldi yubu pamag agha lanaropne ka'ebalul,” aro wepkel,’ aro Ananiasti ambatneog.

15 Wene aro ambatneogti, nen yubu lelamogti, ‘Wene el sembe sikne lag nenero ambarelamsimendi, an haingdi iplamne, aori ka'ebalamne andi nimi ni ambarelamsululam. 16 Sa'a sembe wene nang-nangalamlam? Sekmendi Yesusag si lero yoplapmendi, “Malia uanonge tam orog nembanululam,” aro molbamenba, maghag pelengkaghukang,’ aro Ananiasti ambatneog,” seog.

Nu Saelba Uhiropneri Paulusag, “Yahudi sisa kom nimiag ambarel phululam,” aro ambarogha

17-18 Paulusti nen tipto ambarelamsiogti, “Na samoro Yerusalem yahiri, Allahri Mem Aeag wamsiri, Allahag molona mololamsi. Allahag molona mololamsiri, haing uamna kwelekamna senenag agha nu Saelba Uhiropne poneko ipsi. Ipsiri tilamsiag agha eldi nanag yubu lelamogti, ‘Na sembe sikne lag nenero ambarelamsilam yubu ka'ebaukang komba, Yerusalem anea elem-elem lambalulam,’ seog. 19 ‘Lambalulam,’ seogpa nari samoro yubu lelamsiri, ‘Nu Saelba Ulamsilamne, sin el wamangne, nari Allah yubu lero winirop ae nhonag wa'ang, nhonag wa'ang ulamsiri, anag sikne aro wana palirop nimi salero kop aeag tolongolamsisiri, olamsisinge sin el wamang. 20 Apna Stefanus poneko ya'ag olamek sum eneko, eneng lanaro tebaogha peramag aneko na babe kemero sekamsi. Stefanus poneko an sembe sikne lag nenero ambarelamsiogne wamog aghana, “Wali ya'ag olamang,” aro saekag sembahi. Stefanus olamek nimi tanekori sindi enektop ag na peramag pibekpa, nari yae paiamsisi,’ aro Yesusag ambatsi.

21 Wene aro ambatsiba, nu Saelba Uhiropne ponekori nanag lelamogti, ‘As anea lambamendi pululam. Amik nari an mog so'o weag wamang nimi Yahudi sisa kom nimiag poglangkenun,’ seog,” aro Paulusti ambatsiog.

22 Nimi Paulusti yubu ambarelamsiogne wali ka'elamek aghana, wene aro, “ ‘Yahudi sisa kom nimiag poglangkenun,’ seog,” aro Paulusti ambarelamsiog abeneko, Yahudi nimiri ka'ebaekti, wana yo senelamekti, “Nimi ene ya'ag oplulom! El nen kamag wamnep kom,” alamek.

Yin salerop nimiri “Paulus taeplam-taeplam lobukap,” aro ulameka

23 Wene alamekti, Yahudi nimiri sindinge nongag siriro pelengerop ag kwiripto tobogahiekti, hao lopto alikinag towalengelamek. 24 Undo unulamekpa, yin saleropne sikindo ponekori, “Nimi maikno taneko yubu sa'a sembe haum alamang aro el tanun,” sembaog. “El tanun,” sembaogti ilipsaboag aruklamsiogti, “Paulus aeag pabumundi, taeplam-taeplam lopmundi, wana aluktop yubu ambatsilne sembe haim-haim aro el talulom,” aro ilipsabo ambatsiog. 25 Yin salerop nang tanekori Paulus pabiekti, “Taeplam-taeplam lobukap,” aro yan sae kiliro haing kauplamek abeneko Paulusti, yin salerop nang sikindo nhon Paulus peramag sekamogne ponekoag hailamogti, “A'undi tam wali uro kembitna koma Roma nimi opsinep te?” aro haibaog. 26 Wene aro haibaogpa, yin salerop nang sikindo poneko Paulusti lebogne neneko ka'ebaogti, eldo yin saleropne ponekoag piogti, “Paulusti wene sel,” aro ambarelamogti, “Paulus pone babe Roma nimi wamlaba, sa'a agha elag ualulam?” aro haibaog.

27 Wene aro haibaogpa, yin saleropne sikindo poneko Paulusag piogti, “An sik Roma nimi wamlam te?” seogpa Paulusti, “Yo, ot andi leplam ane,” seog.

28 Wene seogpa, yin saleropne sikindo ponekori, “Na babe, ‘Romange tanun,’ aro kamna alikinag Roma nimi sikini yabo tatsisi,” seog.

Wene seogpa Paulusti, “Na kamna tatsisi kom. Nani Romangeri mangkaneogpa, Romange wamna,” seog.

29 Wene seogpa, yin salerop nangdi, “Haim-haim aro taeplam-taeplam lobukap,” aro el haing kaubek nang tanekori ka'ebaekti, “Obukap kom,” aro log lelem elem-elem piek. Sin log lelem elemag piekpa, yin salerop nang sikindo ponekori babe, “Romange agha mane agha, ‘Besi agha sorop haing agha kauplulom,’ sen,” aro log sembaog. 30 Yin salerop nang sikindo ponekori, “ ‘Yahudi nimiri Paulusag ulamangne nene sa'a sembe ulamang?’ aro sik wali uro el tahane,” senelamog.

Wene senelamogti, mabogha kwelekaogne memnang Allah sembe palirop nang sikini yaboap, Yahudi nimi sembe tam lelekto kemero kareptop nang Mahkamah Agama nangap yopsiog. Yopsiogti poloro wimbahiogpa, Paulus haing sae lopto enero poa sin wamekag payaek.