Pogsiog Nang 23

Paulus Yahudi nimi sembe tam lelekto kemero kareptobag Mahkamah Agama nimi whingag wamogha

Yahudi nimi sembe tam lelekto kemero kareptop nimi Mahkamah Agama nimi winip tangto wamekpa, Paulusti sinag yop-yoba kembahiog. Yop-yoba kembahiogti yubu lelamogti, “Nangkabo, samenag babe, wene babe, ‘Allahri ililamnel,’ aro ul palamnange nene nari wanari babe, ‘Tam malia uan koma walingeog uan,’ aro wanaag seneraglamnari wamna,” seog. 2 Paulusti wene alamoghag agha memne Allah sembe palirop nang sikini nubunge Ananias ponekori ka'ebaogti, wana yo sembaogti, “Paulus pamag taeplam loplulom,” aro peramag wamek nimiag wene aro arukahiog. 3 Wene aro arukahiogpa, Paulusti elag samoro yubu lelamogti, “An leka kwerek tangto yabinep saog wamlamne, ‘Solomne agha likto niknip tanun,’ senenne saog uro ulamlam aghana, Allahri an babe opkelul. Andi senelamlamne, ‘Musari aruksirop yubu mome toro pairop yubu sunsunum uro tam ene karebanun,’ senelamlam aghana, ‘Pam taepto oplulom,’ selamne agha andi Musari aruksirop yubu phiro ualam,” seog.

4 Wene seogpa, Paulus peramag wamekti, ka'ebaek nimi tanekori, “Andi Allahri nimi nubunge memne Allah sembe palirop nang sikini poneko san tiliplamlam te?” seek.

5 Wene seekpa Paulusti, “Nangkabo, samenag Musari mome toro pibog yubuna, ‘A'uni yabo saelbamsiang nangag san tilipto yubu malinge lepseng kom,’ aro mome toro pibog. Yubu eneko na el wamna aghana, el poneko memnang Allah sembe palirop nang sikini nubunge wamlange na ekondi ogto lemna,” seog.

6-8 Wene seogti, “Nimi wamek nimi taneko Saduki nimiap Farisi nimiap winil dalamekag nhon wamang,” aro el taog. Saduki nimiri senelamekti, “Nimi teptopne yame orogti, nimi teptopne kamag tanep kom. Allah arukna imagnang malaikat babe orog,” senelamek. Undo senelamekpa, Farisi nimiri, “Nimi yame wamangba, nimi teptopne kamag tanep. Apna Allah arukna imagnang malaikat babe wamang,” senelamek. Sindi senelamekne sembe el uro wamogti, Paulusti tam kareptop nang Mahkamah Agama nimi tanekoag yubu ambarelamsiogti, “Nangkabo, na babe Farisinge wamna. Nari nai babe Farisinge ponekori mangkaneog. ‘Nimi teptopne Allahri kamag nembahilul,’ senelamnari nang-nangaro ulamnange sembe na enero poa yaneangba, wene tane tam kareptobag wamna ane,” seog.

Eldi wene seogne sembe nimi taneko yubu ka'ebaekti, Farisi nimiap Saduki nimiap sin wal dalamekti, winil dalamek nimi taneko nenne Farisi nimiag sip talamekpa, nenne Saduki nimiag sip taekti, saekag lero wamek kom.

9 Undo wene alamekti, sin maiknoro yo paip tangka lel dalamek. Nimi etpare Farisi nimi Musari yubu amohirop nang sekelabiekti, yubu lelamekti, “Nuri kembiag agha nimi eneag tam nenenne olog ibap kom. Nimi eneri yubu lelamlangena, Allah arukna malaikatti to, nimi yameri to ambatnaba, lelamloa saog sembamap,” alamek. 10 Sin yubu haum hag aro lelamekpa, yin salerop nang sikindo ponekori, “Paulus tara kilim, tara kilima olobikag,” aro yin salerop nang sikindo poneko logti ilipsaboag, “Kulukamundi tolingkina nu yin salerop nangdi aeag pabululom,” seog. 11 Pabiekpa kwelekaogne, inipnag Paulus malamogpa, nu Saelba Uhiropne Yesus el peramag yaog. Elag yingkina yubu lelamogti, “Wana khapto wamlulam. Na sembe andi Yerusalema sikne lag nenero ambatsilam saog uro as Roma pimendi, anoko babe sikne lag nenero ambatsululam,” seog.

“Paulus obukap,” aro Yahudi nimiri yubu lelameka

12 Wene seogpa, mabogha ae kwelekaogpa, Yahudi nimi taneko tognorobag longop taek. Longop taekti, “Paulus obukap,” aro yubu lelamekti, “El ya'ag obebe taneogna, kwanengap maghap tukap. Kom tanena Allahri nu opsinep,” aro yubu so'opto salag pibek. 13 “El obukap,” aro saekag lebek nang taneko teng nhonap epto naualbare nang wamekpa, nen ma'aropne babe wamek. 14 “El obukap,” seek nang tanekori memnang Allah sembe palirop nang sikini yaboap, Yahudi nimi wenehirop nangap ambarel pihiekti, “Nuna, ‘Paulus obebe taneogna, kwanengap maghap tukap. Kom tanena Allahri nu yo'oro opsilul,’ aro yubu so'opto salag pibap.

15 Wene aro salag pibap ana, a'unap Yahudi nimi sembe tam lelekto kemero kareptop nang Mahkamah Agama nangapti yin salerop nang sikindo ponekoag yubu piplulom. Elag yubu pipmun nena, ‘Nen sap samoro tam wali uro kembaukap ane sembe, Paulus payalulam,’ aro maneri yubu piplulom. Yubu pipmunba, nuri Paulus, ‘Obaukap,’ senelamapne ekonneag agha yin salerop nang sikindori a'undi mololapmun yubu ka'ebaleri, ‘Paulus sin whingag pabululom,’ aro arukahilul. Arukahileba payalamikpa, inaag anam a'unag Paulus payan komag nuri inaag webaberi obukap,” aro ambatsiek.

16 Wene alamek aghana, Paulus ilipsa'eldi mangaroba me nhon wamog me enekori sindi yubu lelamekne ka'ebahiog. Ka'ebaogti me eneko yin salerop nangdi aeag piogti, “Paulusap haiptanunam,” aro yin salerop nang yae wamek nang tanekoag ambatsiog. Ambatsiogpa, “Hae haiptarurom,” seekpa wa'iog. Wa'iogti yog nimiri, “Paulus obaukap,” aro lelamekne ka'ebahiogne neneko Paulusag ambarog.

17 Wene aro ambarogpa, Paulusti yin salerop nang sikindo nhon yobogti, “Me ane poa lepmendi, a'un yin salerop nang a'uni ponekoag poa pululam. El a'uniag yubu olog leplul,” seog.

18 Wene seogpa, me aneko poa lebogti, sin yin salerop nang sikini ponekoag poa piog. Poa piogti ambarelamogti, “Paulus kop aeag wamlange ponekori yopneldi, ‘Me ane a'uniag pabimunba, yubu olog elag ambatlul,’ selba payan,” seog.

19 Wene aro ambarogpa, yin salerop nang sikini ponekori me eneko sae kiliro saelba ae paroag sip piog. Ae paroag sip piogti hailamogti, “Sa'a agha nanag, ‘Ambatnun,’ aro leplam,” seog.

20 Wene seogpa, me enekori, “Yahudi nimiri saekag lelamangne ka'ebahin. Ka'ebahin nena, nari nawang Paulus sembe, ‘Nen sap samoro ambuhum tam wali uro kembaukap. Nuri tam lelekto kemero kareptobag Mahkamah Agama winip tangtop aeag payalulam,’ aro anag molbaghukang.

21 Wene aro molbaghukang aghana, andi sindi yubu sik sembaheng kom. Nimi teng nhon epto naualbareap, nen ma'arop nimiap tanekori, ‘Paulus obukap,’ aro inaag webaikti wamnuang. Sindi lebang nena, ‘Nu Paulus ya'ag obebe taneogna, kwanengap maghap tukap. Kom tanena Allahri nu opsinep,’ aro yubu so'opto salag pibangdi, yubu karebangdi wamang. Sindi, ‘Nen payalulam,’ aro maneri molban uagheang. Wenena andi tam karepto yubu lepmenne sembe agha nang-nangaro wamang,” aro ambarog.

22 Wene aro ambarogpa, yin salerop nang sikini ponekori me enekoag, “Nimi nhonag babe, ‘Elag yubu undo ambatna,’ aro ambatsiseng kom,” seogti, “Anenge aeag pululam,” seog.

Paulus Feliks wamoghag as Kaisarea poa pieka

23 Me eneko elenge aeag piogpa, yin saleropne sikini ponekori ilipsabo yin salerop nang sikindo phende yopsiog. Yopsiogti ambarelamsiogti, “Yin salerop nang teng linbare saog uro (200) nimiap, yin salerop nang pham kuda alibag pan nang teng wilindi saog uro (70) nimiap, yin salerop nang kame lausiki salerop nang teng linbare saog uro (200) nimiap poloro webitsululam. Webitsimenba heng purukaleba, olog inibin tan aleba, Paulus as ane agha poa lepmundi, as Kaisarea poa pululom. 24 Keledai Paulus alibag walenne babe webitmendi, poa mog so'o ane saleropne Feliks yaghag wali uro Kaisarea poa pululom,” seog. 25 Yin salerop nang sikini ponekori, mog so'o saleropne Feliks sembe mome toro pibog yubu lilimna ane.

26 “Na Klaudius Lisiasti nani nubunge walinge Feliks aro kiplangken.

27 Nimi ene Yahudi nimiri saelbaongdi, ‘Obukap,’ aro ulamang. Aghana, ‘Nimi ene Romange,’ aro el taneoba, na naipsaboapti Yahudi nimiri saeag agha taluro tobobo. 28 Taluro tobobori, ‘Sa'a sembe elag tam palilamangne el tanun,’ aro Yahudi nimi sembe tam lelekto kemero kareptop nimi Mahkamah Agama nimiag poa pibo. 29 Poa piboba, sindi elag tam yo'o saog nembaong nena, ‘Musari aruksirop yubu philamla,’ aro undo agha lebong. Aghana eldi tam malia unneap sunsunum uro tam elag, ‘Tebalul,’ aro tininneap, kop aeag tolongonneap sunsunum uptao kom. 30 Apna na yubu ka'ebanonge, ‘Yahudi nimiri, “El obukap,” aro yubu lelamang,’ seongba ka'ebano. Ane sembe, nari elemag anag, ‘Poa pululom,’ sen. Apna tam elag yubu lelamang nangagna, ‘Tam a'undi lelamlomne poa Feliks ponekoag poa pululom,’ sen anekona an babe el uro wamlulam,” aro mome toro pibog.

31 Mome undo toro pibogpa, yin salerop nang sikiniri ambatsiogha sunsunum uro inipnag Paulus poa as Antipatris poa piek. 32 Kwelekaogpa lukun yin salerop nangap, kame lausiki salerop nangap aeag samoro Yerusalem yaekpa, yin salerop nang agha pham kuda alibag pan nang tanekori Paulus poa sin Kaisarea sip palamek. 33 As Kaisarea aneko piekti, sikiniri mome toro pibogne mog so'o Kaisarea saelba uropne Feliks ponekoag tarekti, Paulus el saeag pibek. 34 Mome tareka aneko kembaogti, Feliksti Paulusag, “Anna talange,” aro haibaog.

Wene aro haibaogpa Paulustina, “Na Kilikiange,” seogpa el taog. El taogti, 35 Feliks ponekori, “Tam anag pibong nimi taneko yaikpa, tam anag pipkeongne kembaukap,” seog. Wene seogti ilipsaboag, “Nimi nubunge yubu sia leropne Herodesti samenag sobaog aeag poa paiapmundi, yae wamlulom,” aro ambatsiog.