Yesus nen kamag taogha
16
Yesus tebaog sum eneko iniplamog abeneko pere Yahudi nimi tektek paptop sum Sabat sum taogpa,
ik nhon wamekpa,
nen imbaog.
Imbaog sum eneko inipnag aneko Maria Magdala kel enekoap,
Yakobus ilin Maria kel enekoap,
Salome kel enekoap sin kelabo tanekori,
“Yesus nong teptoba song taleagti,
song wali mag elag pelaghukap,”
aro inipnag aneko song wali mag kamna kapto tol piek.
2 Tol piekti,
kweleknag aneko lukunap sin Yesus kirik hogtobaag piboghag aneko piek.
3 Inaag palamekti,
sin mamun hail dalamekti,
“Kirik hogtoba ina siramag maruktop kirik aneko nubu sirikti,
etneri yepto pemagto kolbatsilul,”
aba palamek.
4 “Etneri yepsilul,”
aba palamekti,
pina kemelamekag agha kirik aneko pemagto kolop tangtoba ina siram kuptoba ibek.
5 Ina siram kuptop wamogpa,
kirik hogtobaag wa'ina sae sirik sip kemelamekpa,
kabuni me nhon ag siliro pelengka urop ag kororopne wangkamogti pukamog.
Pukamogpa ibekti,
sin lo'om seek.
6 Lo'om seekpa,
kabuni me anekori sinag yubu lelamogti,
“Log sembaheng kom!
Na el wamnange Yesus Nazaretne amni kalag sipto olobongne poneko elamlom.
Elna nen kamag taldi,
ane wamla kom.
El wirikil wa'iongag ane kembalulom.
7 Aghana a'un wene pimundi,
yubu nene eldi yubu ka'ero neleptop nimiag ambatsimundi,
Petrusag babe ambatlulom.
Yubu ambarelamsimundi,
‘Yesus a'un whingag mog so'o Galilea pinual.
Eldi samenag ambatsio saog uro,
pimundi anoghoa el ipmundi haiptalulom,’
aro ambarel phululom,”
seog.a
8 Wene aro ambatsiogpa,
kirik lom hogtobaag Yesus piboghag anekoa lambaekti,
“Mane agha uro yabil,”
senenne agha pet-pet aro merero palamek.
Sin logti nimi nhon babe ambatsin koma merero piek.
Yesus nimi whingag lag taogha
[
9 Minggu sum anekob lukunap Yesus tebaogha nen kamag taogti,
samenagne Maria Magdala kel eneko whingag lag taog.
Maria Magdala kel enena,
samenag Yesus anam teban komag phia saekpare el kulomag wamekpa,
Yesusti kel eneko wali nenero phia yag lambahiogpa,
wali taog kel wamog.
10-11 Yesus Magdala kel eneko whingag lag taogpa,
kel enekori sin samenag Yesusag nelepto elap nhon ul palamek nimiag,
“Ambarel pihinun,”
aro piog.
Piogpa sin engero amang ulamek nimi tanekoap haiptaekti,
kel enekori,
“Yesus nen kamag taldi,
nanag lag talba imna,”
aro ambatsiog aghana,
sik sembaek kom.
Yesus elag neleptop nang phende whingag lag taogha
12 Ambatsiogne sik sembaek kom aghana,
sum eneko babe Yesus elkabo phende as nhonag palamdek.
Palamdekpa Yesus sin whingag lag taog aghana,
Yesus nong a'erop saogne agha lag taog.
13 Lag taogpa,
sin phende sikinkabo wamekag saombarekti,
ambarelamsirek aghana,
sin phende abenekori yubu lelamdekne babe sikinkabori sik sembaek kom.
Yesusti eldi yubu ka'ero neleptop nimiag, “Ambarel phululom,” aro ambatsiogha
14 Amik sum Yesusti wepto pogsiog nang ko'olombare nang taneko kwaneng telamek.
Kwaneng telamekpa,
Yesus sin whingag lag taog.
Lag taogti,
sinag yubu lelamogti,
“Nimi tanekori na sembe,
‘Nen kamag talba ibap,’
aro a'unag ambarelamsiang.
Sa'a sembe a'un usog mikipti sik senelamlom kom,”
aro wembahiog.
15 Wene aro wembahiogti,
tipto ambarelamsiogti,
“Nimi sisa mog so'o tala-tala wamang nimi niag pimundi,
Allahri nia mangkina sumbahiog nimi niag yubu walinge aneko ambarel phululom.
16 Nimi etneri na Yesusag sikne aro wana palilamleri,
‘Sikne aro seneragtopne sembe maghag pelengkanululam,’
aro ulamle tanena,
nimi eneko Allahri taluro wali nembalul.
Ot nimi etneri na Yesusag sikne aro seneraglamla kom tanena,
Allahri nimi enekoag tam ikinne pipleri oplul.
17 Sin na Yesusag sikne aro seneraglamik nimiri kekneba ulamukang.
Kekneba ulamik nena,
na Yesus mikipne sin pere agha ulamneba,
phia yonge yag lanalamsukang.
Sin ekon yubu ka'eptanep kom yubuag lelamukang.
18 Sindi ya'ag ohirop paghae saelbaika babe,
nimi ya'ag ohirop mag telamika babe,
sin tebaukang kom.
Sindi nimi naiktopne nong alibag sae palilamsiikpa,
Allahri nimi taneko wali nenelamsilul,”
seog.
Yesus imag yingkiogha
19 Wene aro ambatsiogpa,
Allahri imag agha nu Saelba Uhiropne Yesus kiliro tobog.
Kiliro tobogpa,
imag walero Allah sae sirik sip pul ingkiogti wamla.
20 Imag agha kiliro tobogpa,
Yesusti yubu ka'ero neleptop nimi tanekori as tala-tala nimiag yubu walinge Yesus sembe ambarel pihiek.
Ambarel palamsiekpa,
nu Saelba Uhiropne Yesusti mikip nenelamsiogpa,
kekneba maikno ulamek.
Kekneba ulamek nena,
nimiri kembiag agha,
“Imagne ponekori sin pere agha ulamla tanena,
Imagneri yubu sikne ambarelamsiang,”
senenne kekneba maikno ulamekti ambarelamsiek.
Abenda.]c