Lukas
Ponekori Yubu Walinge Yesus Sembe
Mome Toro Pibogne
Lukasti mome tobogne sembe tibin nenerop yubu palilamap
Yubu ene mome toro pibogne poneko Lukasti mome phendeag samenag uro yabiogne sembe el nenero mome toro pibog. Lukasti mome toro pibog yubu eneag Yesus mog so'oag ua ulamogti, yubu ambatto nimi yeplamsiogti, tebaogha kamag taogne sembe mome toro pibog. Yubu eneap tiptop mome phendepneag Lukasti mome toro pibogpa, mome si Yesusti Wepto Pogsiog Nangdi Ulameka wamla. Mome phendepne nenekoag Yesusti wepto pogsiog nangdi yubu walinge ene sabo nenero ambarelamsiekne sembe Lukasti nimi el nenero mome toro pibog. Mome phende abeneko elkae Teofilus sembe mome toro pibog (Lukas 1:1, Pogsiog Nang 1:1). Teofilus etne wamogne sembe nu olog ekon uro wamap aghana, Yunani yubuag el sina, “Allah o'ona seneropne,” aro lerop ane sembe, mome eneko Allah o'ona senerop nimi ni sembe wamla.
Lukasti yubu walinge Yesus sembe mome toro pibog yubu neneag, “Yesusti Israel nimi babe, nimi sisa mog so'o tala-tala urop nimi babe talulamsil,” aro el nenelamsiogti, mome toro pibog. Yesusti eldamne sembe, “Allahri na wepto, ‘Sin olog nimi saeagha orog nimiag yubu walinge ambarelamsululam,’ aro toro sekitneo,” seogne Lukasti mome toro pibog (Lukas 4:18). Yubu eneag teko uhirop nimi ni sembe Yesusti yareag senelamsilne Lukasti lag nenero mome toro pibog.
Yesus mog so'oag ua ulamogne sembe Matiusap, Markusap, Yohanesapti babe mome toro pibek aghana, yubu tam nhon-nhon ot Lukasti mome toro pibog yubu eneag agha el tanep. Yesus mangap taog sum Allah arukna imagnang malaikatti yubu poa seplamekpa, pham domba paia uhirop nang Yesusag yingkina kiplamekne sembe babe, Yesus ngauk me wamoghag Allahri Mem Ae aramag wamogne sembe babe, ot Lukasti mome toro pibog yubu eneag mo wamla (Lukas 1:5—2:52). Yesusti sunumna likiptop yubuag agha ambatsiog yubu Samaria nimi wana walingeri ulamogne sembe babe (Lukas 10:25-37), ka'eseptaog me sembe babe (Lukas 15:11-32), ot Lukasti mome toro pibog yubu eneag wamla. Lukasti mome toro pibog yubu walinge eneag Allahag molona moloropne sembe babe, Allah Eldamne Yame Walinge sembe babe, Allahri nimiri malia uropne tam wailag neneropne sembe babe whingag nenero mome toro pibog. Apna Yesusti yubu ambatto nimi yeplamsiogpa, kelabori elag nelepto yeplamekne sembe babe Lukasti whingag nenero mome toro pibog.
Lukasti mome tobog yubu lomag wamlange
1:1-4 - Lukasti Teofilus pone kibogha
1:5—2:52 - Yesusap Yohanes maghag pelengehiropne ponekoap mangkahiekpa, ngauk wamdeka
3:1-20 - Yohanesti yubu ambatto nimi maghag pelengelamsiogha
3:21—4:13 - Yohanesti Yesus maghag pelengkaogpa, phiari Yesus pai aldesag agha mibogha
4:14—9:50 - Yesus mog so'o Galilea piogti, yubu ambatto nimi yeplamsiogha
9:51—19:27 - Mog so'o Galilea laplobi agha as Yerusalem palamogha
19:28—23:56 - As Yerusalem wa'ina kanero wamek asag ik etpare ua ulamogpa, kalag sipto obeka
24:1-53 - Yesus kamag tangom agha nimi whingag lag nenep taogti, imag waelbaogha