Yakup wali wali'ur laa Betel
35
Lerida Makromod Lalap na'aheni Yakup, “Ya'u penia Makromod Lalap ma nalhari kemen ki o lere om lari nano o mo'onwallum Esau. Lere eni mala'a laa Betel here. Mamkene lolo onne la ma'ariri panaur ida Maya'u.”2 Enime'ede Yakup konohi nakar raram noro nin ri enihe na'akeme, “Sopol mouwedi minim aukerhe na'akeme! Horu, maroho wawa'an la nair nainair man moumou, 3 ono ika kamhara lolo eni kala'a Betel. Laa enne ya ariri panaur rodi hoikani Makromod Lalap man paku ya'u lere ya'u sus wake'e. Ai onne ma norle'ule'u norwaliwali ya'u laa ewi-ewi.” 4 Kame'ede hi rodi aukerhe hir hohoi kakani enihe noro rira antin-antina na'akeme rala Yakup. Yakup nawilo'o ha onne lolo au onno lapa ida lehern na'urani kota Sikem. 5 Lere Yakup noro nin muku enihe rala'a ne, Makromod Lalap hi'i man holi lolo leke-leke lolo onne ramka'uk, de kar hi'i yakyaka Yakup noro nin muku enihe.
6 Enla hir rakanedi leke Betel (man nonolu naran Lus) man aile lolo noho Kana'an. 7 Lolo onne Yakup nodi waku na'ariri panaur ida. Nonolu eni, Makromod Lalape nalhari kemen Yakup lere an lari nano mo'onwalin Esau, de Yakup waki onno onne naran El-Betel (napa'ahne, ‘Makromod Lalap ma aile Betel’). 8 Lere onne Debora, Ribka nin in lauhe maki, de rawilo'o lolo au'onno lapida lehern. Au'ono lap onne aile leke Betel wali yawa. Ende rin waki naran au'onno onne Alon Bakut (napa'ahne, ‘au'onno mak oir man dupdupu’).
Makromod Lalap namre'e namharu Yakup lere an minle Betel
9 Yakup wali nano Mesopotamia rakan Betel, mene Makromod Lalape nalhari kemen wali'ur ai la namre'e namharu. 10 An konohi Yakup na'ahenia, “Nano lere eniyeni, ka rapolu o Yakup me'e, maa rapolu o Israel (napa'ahne, ‘man wahi'i noro Makromod Lalap’).” Ende Makromod Lalap waki Yakup naran Israel. 11 An konohi wali'ur na'ahenia, “Ya'u peni Makromod Lalap Ma Nodi Molollo Narehi Nalewen Na'akeme. Na'amoli o upum anumhe nammori, la ramwali hair-hair man min lolo noho wawan na'akeme, la nano upum anumhe heruwali ramwali rai. 12 Nohorai man Ya aledi Abraham noro Isak, Ya ala wali'ur ki o moro upum anumhe.”
13 Namre'e namharu horu ne, An hoikaruwedi Yakup. 14 Yakup nala waku kukulu ida na'ariri namwali tanada nahenia lolo onne Makromod Lalap namre'e namharu ai, la ai nala anggur noro wuru zaitun halle waku onne wawan nodi hoikani Makromod Lalap. 15 An waki onno onne naran Betel, ono Makromod Lalap wakunu noro ai lolo onne.
Yakup hono Rahel moriyana wali'ur la maki
16 Onne horu, Yakup noro nin muku enihe ramharedi Betel. Hir ko'u nano Eprata makun, Rahel nin lere alam nokor, den moriyana, maa tatane sus mene mai paharne. 17 Moriyedi me'e maa kemen apinha rehi, la ma noro moriyane na'aheni ai, “Rahel, ma'alap o akim! O anum eni mo'oniyana wali'ur.” 18 Rahel na'akeki aran horu, maa an waki tatana naran Ben Oni (napa'ahne, ‘an'a man hi'i apinpinha'u’), maa aman waki naran Benyamin (napa'ahne, ‘an'a i lim'u malanna’).
19 Rahel makiyedi rawilo'e lolo kalla man laa Eprata arkanne. (Eprata onne naran Betlehem haenihi). 20 Yakup na'ariri waku ida namwali tanada nahenia onno onne Rahel nin lunne. Rakan lere eniyeni waku onne aile makun. 21 Enla Israel (Yakup) nala'a mamani lolnohi manara Ederb laa karanna tarana mene ai na'ariri nin heuheu. 22 Hir min lolo onne makun, Ruben nala Bilha nore namkuru wuku. Bilha onne Ruben aman Yakup hono ma namwali hophopon wawahan. Ende ri lan konohi Yakup Ruben nin hini'i onne.
Yakup ananhe
Yakup ananhe mo'oni idaweli woro'o:
23 Lea ananhe: Ruben (Yakup anan anulu), Simeon, Lewi, Yehuda, Isakar, noro Zebulon.
24 Rahel ananhe: Yusup noro Benyamin.
25 Bilha ananhe: Dan noro Naptali. Bilha enie, Rahel nin hophopon wahwahan.
26 Zilpa ananhe: Gad noro Asyer. Zilpa enie, Lea nin hophopon wahwahan.
Yakup na'ori tatana eniyenihe lolo noho Mesopotamia.
Isak maki