Dina noro Sikem
34
Lerida maekrara ida naran Dina, Yakup noro Lea anan, lan ka'ar maeke ma aile leke Sikem onne. 2 Lere onne ri ida ma naran Sikem do'onedi Dina ne, ai nodi lan hi'i diwar dawar. Sikem eni aman naran Hemor nano luhu Hewi, la ai ma nodi molollo noho onne. 3 Enine Sikem onne raram nodi Dina la naramyak wake'e, de wakunu wawa'an noro ai. 4 Enpenia Sikem konohi aman Hemor na'ahenia, “Pape! Ya apanak pape laa mapanak maekrara onne leke yo ore ho.”5 Yakup derne rin hi'i dawaredi ananne me'e, maa an karkaramedi ono ananhe aile kauhe mahar tolle hunuri wana'an, de Yakup lapan ananhe wali mene konohi inhawa ma namwaliyedi noro Dina eni.
6 Lere onne Hemor, Sikem aman, mai leke napanak Yakup hurinohi anan Dina ho noro ai anan Sikem. 7 An mai ne, pakroromo noro Yakup ananhe wali nano kauhe. Hir dernedi nahenia Sikem hi'i dawaredi Dina, de hi akin apinha la ra'ahan wake'e. Hi rauroin nahenia Sikem nin diniwar danawar onne namehiyala wake'e, ono danawar onne namwali ha man luli lolo Israel nin nakar raram na'akeme.
8 Hemor na'aheni Yakup, “Ya an'u Sikem raram nodi i walin ananne. Ya apanak leke i walinne hurinohi ya an'u nore ho. 9 Mai ik lawuku panaeku leke ainim ri roro i walin num ri ho rawo'or rawa'aha. 10 Enleke i walin noro mayai minle wewerre lolo leke eniyeni, de ai raram nodi mim holi lolo noho ma naphari eni. I walin huri ra'iwali, ranoin linikir kanaru, la weli noho lernohi minim suk.”
11-12 Enime'ede Sikem ne'el Dina aman noro narnhe na'ahenia, “Ya apanak yon ma'ahan maya'u, maa mala Dina noro ya'u ho. Mapanak inhawa-inhawa, ya ala ke'e. Mi mapanak mahe wo'ira ya ale, horo nahenia hurinohi yo oro Dina ho.”
13 Maa Yakup anan mo'oni enihe rauroinedi an hi'i yaka saledi noro narna Dina me'e de paipudi Sikem noro aman Hemor. 14 Hi re'el woro'ohe, “Ai mawawa huri ai narum ho noro ri ma kan sunat makun. 15 Am kokala onum napanak eni, horo mi me'e lernohi ainim panaeku ida. Mi mo'oni na'akeme lam sunatedi maise mayai nanumene 16 am kokala onum panaeku onneni. Mim hi'i heheni mene ai mamkene mai eni leke moro ai walin kamwali hair mahaku, de kawo'or kawa'aha. 17 Maa yon hi'i mi kam kokala ainim panaeku eniyeni de mamhene sunat, lo'o ai moro ai narum onne mala'a me'e.”
18 Hemor noro Sikem rauroin nahenia panaeku onne wa'an, 19 la Sikem namkene lernohi panaeku onne idewe, ono ai naramyaka Dina. Ainin nakar raram na'akeme horhawa Sikem narehi walin namehin. 20 Waliyedi laa leke raram ne, Hemor noro Sikem rala honopun penepen lolo nika lape makan la rala wanakunu ra'aheni, 21 “Ri Israel enihe iknik yore yawar. Ende huri hi roro ika holi mai leke eniyeni, la huri hi ranoin rir popono orereki lolo ewi-ewi lernohi rir raram nodi. Noho eni naproro naphari de hir minle mai eni iknik noho noknokor, la ik ida man ho noro ida haenihi. 22 Maa ri eniyenihe re'e roro ika minwuku la kamwali hair mahaku, horo ik sunat kaise hi. 23 Lo'o hir ho kawo'or kawa'aha noro ika, hirira ha mormori ukun noro hirira kanaru enihe ik manarne, de mai ik lernohi rir panaeku sunat leke hi re'e minwuku roro ika.” 24 Ende leke raram na'akeme kokala Hemor noro Sikem rir panaeku, de mo'oni na'akeme lar sunat mouwedi.
25-26 Rakanedi lere wokelu ne, mo'oni man sunat eniyenihe mahar kerhu apinha. Dina narna Simeon noro Lewi rala rir rae karkaramedi laa leke raram. Hir lae ne, hir resne mouwedi mo'oni leke raram, Hamor noro Sikem, na'akeme. Mo'oni lolo leke onne kar herre walha haida ono kemen apinha wake'e. Horu ne, rala Dina nano Sikem nin nakar, rore rala'a. 27 Enla Yakup ananhe namehin rala'a laa leke raram rahoro rir hahaa na'akeme. Hi ra'ahan ono rin hi'i dawaredi narna Dina me'e. 28 Hi rala pipduma, sapi, keledei, noro hahaa ma aile leke raram noro ma aile kauhe raram na'akeme. 29 Hi rahoro hahaa man wella aile, la kele mouwedi maeke noro tatana man minle leke raramne.
30 Lere Yakup derne inhawa Simeon noro Lewi hi'iyedi onne, ai na'ahan na'aheni, “Mim hi'i sus ya'u mamani. Ors eniyeni manin Kana'an, manin Peris, noro man holi lolo noho eniyeni lo'o kar suk ika. Hirira ri nammori, maa iknik ri tarana mehe. Ya amka'uk man holi lolo eniyenihe lawuku rohon ara noro maika, de ika maki horu.”
31 Maa hir walhe, “Ende Pape raram nodi am hurinohi hir hi'i ai narum namwali maekyake?”