Yakup pakromo noro Esau
33
Yakup po'onala Esau mai nodi ri rahu wo'akka ne, an ha'ar anan Lea noro Rahel noro rira hophopon wahwahan woro'enihe. 2 An kakar leke hophopon wahwahan maeke woro'enihe roro ananne min kalari. Horuwedi, Lea noro ananne, la Rahel noro anan Yusup min kili'ur wake'e. 3 Yakup noluwedi hi na'akeme lan wakurani ai walla Esau. An kadi ein korno la rawa rew'ikku, 4 maa Esau lari laa naurukuwala Yakup la masie nanumene woro'ohe rahere wewerre. 5 Esau do'on maeke noro tatana onnenihe, ai na'ukani, “Inhoi man moro ma'alono eniyenihe?”Yakup walhe, “Makromod Lalap nala Nin rere'e haharu maya'u melle tatana eniyenihe.”
6-7 Hophopon wahwahan maeke enihe laa kalari roro ananhe la kadi ein korno la rawa yawa Esau kalarna. Horu ne, Lea noro ananhe mai kadi ein korno la rawa yawa, la kauli'ur Rahel noro anan Yusup wakurani kadi ein korno la rawa yawa haenihi. 8 Esau na'aheni, “Ya'u pakromedi noro ha mormori ukun nammori me'e. Onum panaeku inhawe penia om aku ha mormori onne maya'u?”
Yakup walha, “Ya'u paeku heheni! Ya ala ainu'u hahaa heruwali leke na'amoli om kokala'u noro aki wawa'an.”
9 Maa Esau na'aheni, “Yakup! Ainu'u kanaru narehi nalewen me'e. Yom mala raramyak onne maya'u.”
10 Horu, Yakup walha, “Yono! Ainu'u panaeku hi'i heheni. I wal'u kokale leke namwali tanade nahenia o akim nahuwa'an noro maya'u. Idedi, ya'u po'on mehe malimali o, onneni naise ya'u po'on Makromod Lalap Nin malimali haenihi. 11 Ende ya apanak lapa heheni, kokala hahaa ya ala ki o eni. Makromod Lalap akin wa'an maya'u, de Ai naledi ha wo'ira kukkuku noknokor maya'u.” Yakup nakerne hehenanumene ne'e namhene Esau kokala raramyaka onne.
12 Enime'ede Esau na'aheni, “Mai kala'a here, na'amoli yo orokaru o.”
13 Maa Yakup walha, “Yon me'e, i wal'u! Lo'o o mehen po'on tatana eniyenihe ka raruri rala'a peleke. Enla ainu'u hunuri wana'an man huhuhu makun aile de lo'o ika toku pelekleke, tutusiyanenihe maki mouwedi. 14 Wa'an rehi i wal'u nolu mene am lernohi karkaram, la pakromo wali'ur lolo noho Seir.”
15 Esau na'aheni, “Lo'o hi'i heheni, wa'an rehi ya'u hoikaru ainu'u ri mormori ida woro'o ki o leke hir kukul kalla ki o.”
Maa Yakup walhe na'ahenia, “Yon me'e. Yon hi'i sus i wal'u me'e. Ha ma na'ono, ya auroroin i mo'onwal'u kokaledi ya'u noro wawa'an me'e.”
16 Enpenia lere onne me'ede, Esau wali laa Seir, 17 maa Yakup nala'a noho Sukot. Ai na'ariri nin heuheu, la hi'i nin hunuri wana'an enihe rira ro'e. Eni penia noho onne rin waki naran Sukot (‘heuheu’).
18 Nano Sukot, Yakup nala'a noro wawa'an rakan leke Sikem man aile lolo noho Kana'an. Hi ra'ariri rir heuheu wakuranrani leke onne. 19 Noho onne Yakup weli nano Hemor ananhe pair kupan pere rahu ida. Hemor onne Sikem aman. 20 Lolo onne ai na'ariri panaur ida. Horu, an waki onno onne naran El-Elohe-Israel (napa'ahne, ‘Makromod Lalap, Israel nin Makromod Lalap’).