Yakup namka'uk pakromo noro mo'onwalla Esau
32
Rahina'aredi, Yakup noro nakar raram rala'a mamani. Ka nalo'ol ne, Makromod Lalap Nin hophopon a'am raram ida woro'o mai pakromo noro ai. 2 Yakup do'onedi hi, polletilu na'ahenia, “Onno eni, namwali Makromod Lalap Nin onno renren warwarne.” Enpenia an waki onno onne Mahanaim.a3 Onne horu, Yakup hopon nin ri ida woro'o rodi lirna noluwedi laa mo'onwalla Esau man aile leke Edom lolo noho Seir. 4 Yakup nou hi na'ahenia, “Rakan enne konohi i mo'onwal'u Esau na'ahenia, ‘Makrom'u nin hophopon wahwahan Yakup nala nin hiyene arore aku mai pape! Nano nonolu rakan lere eniyeni ai noro Laban minwuku mamani. 5 Lere eniyeni ainin pipduma, pipi ketawa, sapi, keledei, noro hophopon wahwahan mo'oni maeke aile. Ai nala lireni makrom'u, la napanak makrom'u kokala mayai noro akin man mou.’ ” Ende hir laa leke roro Esau wakunu.
6 Hir laa pakromo Esau nanumene wali wali'ur mai konohi Yakup na'ahenia, “Ai moro o wallum Esau pakromedi me'e. An mai nodi mo'oni rahu wo'akka leke noro papa pakromo.”
7 Yakup derne wanakunu onne, namka'uk rehi, ai akin tana me'e. Enime'ede an ha'ar nin ri noro nin ha mormori namwali muku woro'o. 8 Ainin panaeku nahenia lo'o Esau mai de ra'ara noro muku ida, muku namehin rir leken aile rahaledi kemen.
9 Horu ne, Yakup hi'i lir napanak na'ahenia, “Makromod man yu up'u Abraham noro ya am'u Isak ra'uli rasa'e, maheriyala O kilinum maya'u. Lere man laa eni, O penia hopon ya'u wali wali'ur mai i walin. Makrom'u nouwedi mala wawa'an rara'e maya'u me'e. 10 Kade ka'u hi'i haida man wa'an walha Num wawa'an maya'u eni, maa O mala rere'e haharu la morle'ule'u morwaliwali num hophopon wahwahan mamani. Nonolu, lere ya amhara ainu'u lekloi deul oir wauwau Yordan ka odi haida-haida, ainu'u au ke'eke'en mehe. Maa lere eniyeni, ya'u wali mai odi muku lapa woro'o eniyeni. 11 Ya amka'uk i mo'onwal'u Esau mai nesne mouwedi mayai na'akeme. Ende ya apanak mahaledi ya'u, i hou'u, noro ya an'uhe nano ai. 12 Makrom'u horhorok Num nou ma namkene noro maya'u. Om nouwedi nahenia mamre'e mamharu ya'u, la mala maya'u up'u an'uhe nammori naisa doslo her rarame penia ri mahaku kan paeku akinale.”
13 A'alam onne ai namkuru lolo onne. Rakan oreki, ai nala nin ha mormori heruwali nodi nararamyaka Esau. 14-15 Raramyaka man ai nala onne heheni: pipi ketawa iri rahu woro'o, dalu werro'o, pipduma iri rahu woro'o, dalu werro'o, unta welikelu noro ananhe man huhuhu makun, sapi iri waku weli'akka noro sapi dalu idaweli, keledei iri waku werro'o noro dalu idaweli. 16 An ha'ar ha mormori onne namwali ukun wo'irha nanumene an hopon man huri onnenihe na'ahenia, “Mi molu here la ya'u kauli'ur. Madiyaka ha mormori ukun enihe leke ida ma nako'uwala ida tarana.”
17 Yakup hopon nin hophopon wahwahan man huri ukun dedesne, “Lo'o mim pakromo noro i mo'onwal'u Esau la ai na'ukani, ‘Mi makrommu inhoi? Mala'a ewi? Inhoi nin ha mormori ukun eniyeni?’ 18 Mim walha ma'aheni, ‘Num hophopon wahwahan Yakup nina. An aku eni mai nala makrom'u, la an kauli'ur.’ ” 19-20 Yakup hopon nin hophopon wahwahan ma nodi ha mormori ukun enihe na'akeme pakromo noro Esau wakunu heheni. An hopon wali'ur na'ahenia, “Yom hamlinu konohi Esau, ai ya'u kili'ur.” Yakup nin panaeku noro Esau pakromo haromo, an nori Esau nodi raramyaka onneni leke nala ampun ai. 21 Ende an hopon hi rodi raramyaka onnenihe rolu, la ai ne, namkuru heuheu alam onne.
Yakup wahi'i noro Makromod Lalap lolo Peniel
22 A'alam onne me'ede Yakup namaka hopon hono woro'enihe, rira hophopon wahwahan maeke woro'enihe, roro ai anan idaweli ida deul oir wauwau Yabok, rala'a. 23 An paku hi laedi oire wali nanumene wali wali'ur hopon ri rala nin hahaa na'akeme rodi laa oir wali haenihi, 24 maa alam onne ai mehen min lolo onneni. Enime'ede mo'oni ida mai wahi'i noro Yakup hehenanumene noho roropo. 25 Maa ri onne nauroin kan rehinala Yakup, de an riuk Yakup pahpaharn lain leke hi'i nadihaledi. 26 Enime'ede mo'oni onne na'aheni, “Huriyedi ya'u here, nohoropo me'e.”
Maa Yakup walha na'ahenia, “Ya'u ka'u huri pape hehenanumene o mamre'e mamharuwedi ya'u.”
27 Ai na'ukani, “O naram inhoi?”
Walha, “Yakup.”
28 Horu ne, mo'oni onne na'aheni, “O kam wawa Yakup me'e, maa nano lere eni me'ede ri napolu o ‘Israel’b ono moro ri mormori, la moro Makromod Lalap wahi'i hehenanumene om rehiyedi.”
29 Yakup na'aheni, “Makrom'u, o naram inhoi?”
Maa mo'oni onne na'aheni, “Alhi'ihepe ma'ukani i naran?” Enime'ede namre'e namharu Yakup.
30 Kame'ede Yakup na'aheni, “Yo oro Makromod Lalap pakromo do'onedi Oi Makan me'e, maa ya'u mormori makun.” Enpenia an waki lolo onne naran Peniel, napa'ahne, ‘Makromod Lalap Oi Makan.’