Yakup lari nano Laban
31
Ler ida Yakup derne Laban anan enihe ra'aheni, “Yakup nala mouwedi iknik pape nin kanaru me'e. Ainin kanaru na'akeme lernala nano iknik ame nin kanarue.” 2 Yakup po'on paninne oin makan ahan mamani, ka naisa nonolu me'e.3 Enime'ede Makromod kukunohi Yakup, “Wali laa upmu a'um, noro ihum wallumhe rir nohorai here. Yo orole'ule'u Yo orowaliwali o.”
4 Ende Yakup hopon ri laa kukunohi Rahel noro Lea leke hir pakromo kauhe pipi ukun miminlole. 5 Hir pakromo ne, Yakup ne'el hi na'ahenia, “Ya'u do'on mi ammu oin makan kan mou naisa nadedem me'e, maa Makromod Lalap man Ya am'u na'uli nasa'eni, norle'ule'u norwaliwali ya'u mamani. 6 Miro mauroroin ya'u howok mamani mi ammu nineni haenihi. Ka auroin ainu'u mahmaha awenne ihin ennen. 7 Ya'u hi'i heheni, maa an paipudi ya'u la nala kopuredi ainu'u na'iwe'el rewen idaweli me'e. Maa Makromod Lalap kan hurinohi an hi'i ha yakyak maya'u. 8 Lerida mi ammu na'aheni pipi ma nakodkode mamani namwali ainu'u mehe, nano lere onne me'ede pipi ukun mori pipiyana ma nakodkode mamani. Enla lere namehin an herredi honorok panaeku wali'ur na'aheni pipi ma wulla nawa'awa'aha onne namwali ainu'u mehe. Nano lere onne me'ede pipi ukun mori pipduma ma wulla wa'awa'aha mamani. 9 Makromod Lalap hi'i heheni leke naledi mi ammu nina pipi ukun ya'u manarne.
10 Ler ida ha mormori enihe maha ra'ohir, ya amarmi nahenia pipi dalu ma na'ohir na'akeme nakodkodo la wulla nawa'awa'aha mamani. 11 Enla Makromod Lalap Nina hophopon a'am raram noro ya'u wakunu lolo namarmi onne na'ahenia, ‘Yakup!’
Ya'u walha, ‘Ya'u derderne!’
12 Na'aheni wali'ur, ‘Po'on wawa'an! Po'on pipi dalu ma na'ohir onnenihe na'akeme nakodkodo la wulla nawa'awa'ahe. Ya'u do'onedi ha man Laban hihi'i ki o me'e, de Ya'u hi'i ha onne na'akeme namwali o. 13 Ya'u penia Makromod Lalap man hari kemen ki o minle Betel. Min enne o ma'ariri waku la halla wuru zaitun mene kikan hopo ma'uli masa'a Maya'u. Ors eni mamharedi leke eni mala'a here! Wali wali'ur laa onum lekloi here!’ ”
14 Enime'ede Lea noro Rahel walhe, “Wa'ane, pape. Ai ammu ka nala haida mayai nano nin linikir kanaru. 15 Ai ammu na'anedi kanaru man o mala pairedi iknik hohoo me'e, de an do'on maika naisedi do'on awan me'e. 16 Kanaru rahu man Makromod Lalap nanala nano ai ammu, Ai nala wali'uredi ki o. Kanaru onne na'akeme namwali iknika noro idewe ik ananhe rira. Ende inhawa Makromod Lalap hopon om hi'i, lernohi mehe.”
17-18 Kame'ede Yakup na'akene nin hahaa na'akeme. Ai nalha'a hono ananhe laa unte wawan la nodi nin hunuri wana'an na'akeme. Ai nala ha wo'ira na'akeme man lernala lolo Mesopotamia nodi wali wali'ur laa aman Isak nin leke lolo Kana'an.
19 Ler onne Laban aile kauhe raram mahan totori nina pipduma enihe wulla. Hi ka rala'a makun, Rahel namna'a aman nina aukerhe man aile nin nakar. 20 Yakup nala'a nodi kalla ma nasinuwar, de Laban ka nauroin haida wake'e. 21 Ai nala mouwedi nin hahaa na'akeme, peleklek rala'a. An deul oir wauwau Efrat la rala'ala'a laa wo'or Gilead.
Laban larnohi Yakup
22 Lere wokeluwedi nanumene rin konohi Laban nahenia Yakup lariyedi me'e. 23 Ideweni Laban ra'ukwuku nin ri enihe de lernohi Yakup alam wo'ikku raram mene dawake wo'or-wo'or ma na'urani wo'or Gilead. 24 A'alam onne Makromod hari kemen lolo Laban nin namarmi na'aheni, “Laban! Horhorok! Moro Yakup wakunu, madiyaka o lirum wawa'an!”
25 Laban dawak hi lolo wo'or-wo'or ma na'urani Gilead. Lolo onne Yakup na'aririyedi nin heuheu, de Laban noro nin ri enihe ra'aririyedi rira heuheue, kan ko'uwala nano hi. 26 Laban laa noro Yakup pakromo na'aheni, “Hi'ihepenia om paipudi ya'u modi kalla suwsuwar modi lari ya an'uhe, naise ri man kekele lolo are rarame? 27 Inhawe nakoko penia om paipudi ya'u de karkaramedi mala'a, kam konohi ya'ue? Lo'o om konohi ya'u wawa'an num panaeku mala'a, ya'u hi'i yapi lapa noro wawa'an rara'e, hanare, kiwal, keki ra'a, noro dadila. 28 Enla o ka mala leken maya'u leke masiyala ya an'uhe noro yu up'uhe. Onum honoli eni mehen naploedi. 29 Ya aruri rehi o, de kan sus ya'u hi'i yakyaka o, maa alam eni Makromod Lalap man o ammu na'uli nasa'eni na'ori honorok ya'u leke yono ya'u wakunu ha ma kan wa'an noro o. 30 Ya auroiroin o mala'a ono om horokedi o wallum me'e, maa hi'ihepenia o mamna'a ainu'u aukerhe ma nadiyaka ainu'u popono orereki?”
31 Enime'ede Yakup walha, “Pape, yon ma'ahan maya'u. Ya'u karkaramedi ya ala'a ono ya amka'uk pape modi rurilai kam huri anum enihe rala'a.” 32 Yakup ka nauroin hono Rahel namna'edi nin aukerhe de na'aheni, “Lariyala Pape na'inau ainima hahaa na'akeme. Lo'o aukerhe onnenihe aile lolo ainima hahaa, ri ma namna'a onne, hukumesnedi. Na'amoli iknik ri enihe ramwali man kuku maka nahenia ya ala wali'uredi papa nin ha onneni.”
33 Enime'ede Laban nanoin aukerhe onnenihe lolo Yakup nin heuheu. Horu ne, nala'a Lea nin heuheu, mene laa hophopon wahwahan maeke woro'enihe rira heuheu, maa kan do'on aukerhe. Horu ne, an laa Rahel nin heuheu eni, maa kan do'on ono 34 Rahel nala aukerhe onne loiledi unta nin pakpak ko'orn nin sak, la ai naikoredi wawan. Laban pita wali hahaa man aile heuheu raram na'akeme, maa kan do'on haida. 35 Enime'ede Rahel napolu aman na'ahenia, “Yon pape na'ahan, kan wa'an ya amriri ala hiyene arore pape ono ya'u mahan lernala wolle.” Laban nanoin mouwedi rir hahaa me'e, maa kan do'on aukerhenihe.
36 Enpenia Yakup raram ha'a la na'aheni, “Ya'u hi'i inhawa ailanna penia pape nodi ahan na'ukani ya'u la larnohi ya'u? 37 Pape mai napita nawali ainu'u hahaa. Lo'o pape do'onedi pape nin hahaa, mala ha onne mai paharne loi lolo eni, leke ainu'u ri enihe noro papa nin ri enihe do'on, la rala kenekrohu nahenia hahaa onneni inhoi nina. 38 Anna werro'o raram ya'u howok papa nina honowok. Pipduma ukun noro pipi ketawa ukun papa nin enihe pe'er wawa'anedi, la ka o'onala pipi dalu waku ida makun nano papa nina ha mormori. 39 Lo'o ha mormori merwui na'an ida woro'o, ka'u konohi pape, maa yo odi ainu'u herredi. Lo'o ri namna'a pipduma wo'ira, ka'u sala maa pap hopon ya'u herredi. 40 Ya'u howok mamani, kade lelere lere daina'u, a'alam ya'u rinna rehi, maa ya adiyaka mamani de ka amkuru. 41 Ya'u howok heheni mamani rakan anna werro'o. Anna idaweli wo'akka ya'u howok pape nine leke ya'u lernala pape nina maekana woro'enihe, la anna woneme wali'ur leke lernala pipi ukune. Enla lere rahu alam rahu onne pape nala kopur ainu'u na'iwe'el rewen idaweli. 42 Hawa'ande Makromod Lalap man Abraham noro Isak ra'uli rasa'enia nadiyaka ya'u. Lo'o Ai ka norle'ule'u norwaliwali ya'u, papa nohi ya'u, ya alalali. Maa Makromod Lalap po'onedi ainu'u suse noro ainu'u honowok na'akeme me'e, de alam eni An mai nalhari kemen dadiyaledi papa me'e.”
Yakup noro Laban hi'i nou ma namkene
43 An derne Yakup nin wanakunu horu, Laban walha na'ahenia, “Maeke woro'o eniyenihe ya an'u, tatana eniyenihe yu uphe haenihi, ha mormori wunui wana'an eniyeni, ainu'u. Ha wo'ira om dodo'on lolo eniyeni na'akeme ainu'u kokkoo, maa kan wa'an ya'u hi'i haida-haida odi ekiyala kairala yu up'u an'uhe na'akeme. 44 Ende wa'an rehi ikroko hi'i lir roro, la ikroko lernohi iknik lir roro onneni.”
45 Ende lere onne Yakup nala waku ida na'aririe namwali tanada rir ronoro kanawar onne. 46 An hopon nin ri enihe, “Modi waku mai here!” Hi ra'uk waku rodi mai rahupue. Horu ne, hi raikoro wakurani waku hupu onne ra'ak wewerre.
47-48 Laban nodi wanakunu Aram waki waku hupu onne naran ‘Yegar Sahaduta’, la Yakup nodi wanakunu Ibrani waki naran ‘Galed’. Naran woro'o eniyenihe napa'ahne, namnenehe, ‘waku hupu namwali man kuku maka ikroko’. Laban na'aheni Yakup, “Waku hupu eniyeni orekiha namwali tanada ikroko hi'iyedi ronoro kanawar mai eni me'e.” 49 Laban waki onno onne naran ‘Mizpa’b haenihi, ono ai na'aheni, “Orekiha Makromod koklolo na'inau ika, leke yon ik larlewenedi ronoro kanawar eni, kade ika ida ma nako'uwedi ida. 50 Lo'o om hi'i ha yakyak ya an'uhe, ee lo'o om ho maeke namehin, onne ka auroin, maa yon hamlinu Makromod Lalap mehen do'odo'on la namwali man kuku maka ikroko. 51-52 Horhoroke! Waku hupu eni noro idewe waku ma namririri eni namwali tanade ma na'ori honorok ikroko nika ronoro kanawar eniyeni. Ka'u larlewen waku eni leke hi'i yakyak o, la yom larlewen waku hupu eni hi'i yakyaka'u. 53 Ya am'u Nahor, o upum Abraham noro idewe upun a'anhe na'akeme ra'uli rasa'a Makromod Lalap. Ende ya apanak Ai namwali man ho'ok kail ikroko.”
Enime'ede Yakup kikan hopo kokkoo Makromod Lalap man aman Isak na'uli nasa'eni na'aheni ai kan larlewen ronoro kanawar onne.
54 Ai nesne ha mormori waku ida nodi hoikani Makromod Lalap lolo wo'or onne tilu. Enla an lariyala ri na'akeme ra'an romun wewerre. Hi ra'ak horu, min lolo onne hehenanumene ropo.
55 Rakan nohoropo, Laban masiyedi upun ananhe, la ai nala rere'e haharu hi horu mene wali laa nin lekloi.