30
Enimaa Rahel kan moriyana makun. Enpenia ai nakehen we'ekwalla la ne'el Yakup, “Mala tatana maya'u here, kalo'o i maki.”2 Yakup na'aheni Rahel, “Ka amwali Makromod Lalap! Ka'u paekunala hi'i o moriyana! Makromod Lalap mehe hi'i om moriyana!”
3 Horu, Rahel na'aheni, “Wa'an rehi moro ainu'u hophopon wahwahan Bilha mamkuru wuku leke moriyana mala anan maya'u.”
4 Enime'ede nala nin hophopon wahwahan Bilha kani hono leke noro namkuru wuku. 5 Bilha apun de moriyana tatana mo'oniyanida. 6 Rahel na'aheni, “Makromod Lalap dernedi ainu'u lir napanak me'e. Ai nodi nala ainu'u raram nodi la naho'ok nakailedi ya'u noro wawa'an. Enpenia Ai nala tatana mo'oni ida maya'u.” Enla an waki tatane naran Dan (napa'ahne, ‘naho'ok nakail’). 7 Bilha apun wali'ur de moriyana tatana mo'oni ida wali'ur. 8 Rahel na'aheni, “Nalo'oledi me'e, ya ahehe arehiyedi i we'ekwal'u, la lere eniyeni ya'u rehiyedi ai me'e.” Enpenia waki tatana onne naran Naptali (napa'ahne, ‘nahehe mamani’).
9 Lere Lea eremnale nahenia kan moriyana me'e, ai nala nin hophopon wahwahan Zilpa Yakup leke nore ho. 10 Zilpa mori tatana mo'oni ida. 11 Lea na'aheni, “Ainu'u wawa'an.” Ende an waki tatana Gad (napa'ahne, ‘man wawa'an’). 12 Zilpa mori mo'oniyana wali'ur. 13 Lea na'aheni, “Ya'u raram nahuwa'an rehi. Lo'o maeke man do'on ya'u na'akeme rauroin nahenia ya akin nahuwa'an me'e.” Enpenia waki tatana naran Asyer (napa'ahne, ‘akin nahuwa'an’).
14 Lere reku gandum Lea anan Ruben min kirna raram do'on aukawi awa'ar ida man hi'i ri lernala tatana. Enime'ede nodi laa inna Lea. Rahel dodo'onne, napanak Lea na'ahenia, “We'eke, malala aukawi awa'ar onne taran maya'u.”
15 Lea walhe, “Eih! O mahoredi i hou'u me'e, om paeku mahoredi aukawi awa'ar man ya an'u nonodi haenihi?”
Rahel na'aheni, “Lo'o o mala onum aukawi awa'ar taran maya'u, popono ya ala leken moro Yakup mamkuru.”
16 Ler helem Yakup waliyedi nano kirna ne, Lea na'aheni, “Ikroko kamkuru a'alam eniyeni. Ya'u pairedi Rahel noro ya an'u nin aukawi awa'ar me'e, de ikroko kamkuru wuku.” Enime'ede woro'ohe ramkuru wuku a'alam onne. 17 Makromod Lalap nakaniyedi Lea nin napanak me'e, de an apun moriyana mo'oni wolima nine. 18 Lea na'aheni, “Nonolu ya ala Zilpa i hou'u leke noro namkuru, de lere eni Makromod Lalap nala tatana maya'u leke herre walhedi ainu'u hini'i onneni.” Enpenia waki tatana naran Isakar (napa'ahne, ‘herre walhedi’).
19 Onne horu, Lea apun wali'ur la mori tatana rewneme nine. 20 Ai na'aheni, “Makromod Lalap naledi raramyake man ma'aruru maya'u me'e, de i hou'u eni lo'o horhawa ya'u ono ya'u moriyanedi mo'oni woneme me'e.” Penia waki tatana naran Zebulon (napa'ahne, ‘honoor hanawe’). 21 Onne horu Lea mori tatana maekana ida, nala naran Dina.
22 Kame'ede Makromod Lalap horoknala Rahel. Ai nakani nin lir napanak, penia 23 Rahel apun de mori tatana mo'oni ida. Rahel na'aheni, “Makromod Lalap naledi tatana mo'oni ida maya'u, de ya'u ka awawa me'e. 24 Na'amoli Makromod nala ya'u mo'oniyana wali'ur.” Enpenia an waki tatana onne naran Yusup.a
Yakup lernala hunuri wana'an
25 Rahel moriyedi Yusup ne, Yakup na'aheni Laban, “Pape! Yon hi'i papa naramyaka'u haromo, huriyala ya'u laa ainu'u lekloi nanu. 26 Huri yo oro i hou'u woro'enihe noro ya an'uhe na'akeme laa enne. Ya'u howokedi papa nin honowok ma namwerek eni anna nammori me'e, de hi na'akeme ramwali ainu'u ri me'e.”
27 Laban na'aheni, “Pa'e! Makaniyala nanu. Ya'u lernaledi tanada nahenia Makromod namre'e namharu ya'u ono om min mai eni de ya apanak yon mala'a me'e. 28 Konohi ya'u mehe, o mapanak na'iwe'el wo'ira ya ale.”
29 Yakup walhe, “Pape mehe nauroin ya'u howok nalo'oledi me'e, la ya'u tolle pape nin hunuri wana'an wawa'an de eren nammomori. 30 Ka'u mai makun, pape nin nahehe nawo'or ka nammori, maa ors eniyeni pape karuwedi me'e. Makromod namre'e namharu pape lolo ainu'u honowok, de lere eni rakanedi lere ya ahehe ainu'u meheromo kaimehi me'e!”
31 Laban na'ukani, “Ende ya ala inhawa na'iwe'el ki o, pa'e?”
Yakup walhe na'ahenia, “Yon pape nala haida-haida ya'u me'e. Ya amkene huri wa'an papa nin ha mormori horo papa nodi nohi ainu'u panaeku eniyeni. 32 Papa hurinohi ya'u laa nin pipduma ukun raram, leke ya'u nili pipduma momohon noro ma nakodkodo noro pipi ketawa ma nakodkodo haenihi, la onne namwali ainu'u na'iwe'el. Ainu'u napanak onne mehe, 33 leke lere man mai papa pelek nauroinnala nahenia ya'u paipudi papa, ee ka. Ma'anana-ma'anana Pape mai leke na'inau ainu'u pipi ukun, lo'o wawarha aile, onne ya amna'edi me'e, maa nakodkode noro momohon ainu'u.”
34 Laban walhe, “Wa'ane! Yo odinohi num panaeku, pa'e!” 35 Maa lere onne Laban paipudi Yakup hopon nin ri lan heiredi pipi ketawa dalu noro iri ma nakodkodo, noro man momohon man wawarha tarana, noro pipduma momohon na'akeme, leke nadiyaka lolo onno aimehi. 36 Horu an hopon anan enihe na'akeme, “Rodi ha mormori onnenihe rako'uwedi Yakup.” Hi rala'a lere alam wokelu mene rakan onnida, de huri pipi lolo onne, la Yakup tolle nadiyake Laban nine pipi ukun rehin man wawarha mamani eni.
37 Enime'ede Yakup nala auhana mokmoko nano au'onno wokelu, hawar ono, badam ono noro berangan ono, la wisiyedi ulikin heruwali rorrore de po'on nakodkodo. 38 Auhana onnenihe ai nodi loile pipduma nina nonomun onno leke romun oir po'on auhana ma nakodkodo onne, ono nadedem ha mormori onneni ra'ohir na'uranrani oir nomun onno. 39 Ende pipi ukun enihe ra'ohir auhana onnenihe kalarne, penia hir mori ananhe rakodkodo mamani.
40 Enla Yakup nala pipduma ananhe ma nakodkodo onne ramwali nin ukun aimehi, maa nin pipi ma na'ohir enihe, an huri na'urani Laban nin pipi dalu man momohon noro nakodkodo. Hi'i heheni leke an lernala nin ukun aimehi nano Laban nin pipi ukunne.
41 Yakup lapan ha mormori ma naruri na'ohir mene ai nodi auhana wiwisi onnenihe nala loile hi kalarna, lolo ra'uloi raram. 42 Maa auhana onnenihe ka nala loile ha mormori ma ka naruri enihe kalarna. Ende ha mormori ma ka naruri onnenihe ramwali Laban nina, maa ha mormori ma naruri onnenihe Yakup nina. 43 Onne penia nakoko de Yakup namwali ri orkanaru lewlewen. Nina pipi ketawa noro pipduma ukun, unta, keledei, noro hophopon wahwahan nammori rehi.