Yakup rakan yain Laban nin nakar
29
Yakup nala'a mamani laa nohorai ma aile Kana'an wali kimur. 2 Ler ida, an do'on oir makan ida aile lolo kauhe ida. Oir makan onne rodi waku lape ad'adue. Wakuranrani lolo onne pipi ukun wokelu ramkukuru lapan man huri nala oir romun. 3 Nadedem pipi ukun enihe maiwukuwedi nanumene man huri enihe poi waku laedi arkan leke rahur oir pipi enihe romun. Romun horuwedi, man huri enihe adu wali'uredi.4 Enine Yakup na'ukani man huri ma ai lolo onnenihe, “Eih, i wal'uhe ramhara nano ewi?”
Hir walha, “Ai mamhara nano leke Haran.”
5 Yakup na'ukani wali'ur, “Mi mauroiroin Laban, Nahor upune?”
Hir walhe, “Ai mauroiroine, pape.”
6 Yakup na'ukani wali'ur, “Hi'ihewiyala, wa'awa'an, ee ka?”
Hir walhe, “Pape wa'awa'an. Po'onala maeke man huri nina pipduma ukun mai me'e, ai onne Laban anan naran Rahel.”
7 Yakup na'aheni, “Papanha makun! Kan rakan ors rodi pipduma laa ro'o makun! Alhi'ihepeni ka mala oir pipi enihe romun la ra'anala penek wali'ure?”
8 Hir walhe na'ahenia, “Pipduma ukun na'akeme maiwukuwedi mene mayai man huri enihe na'akeme poi waku leke mala oir romun.” 9 Yakup noro hi wakunkunu makun, Rahel nodi aman nina pipdum ukun mai me'e. Rahel penia ma nadedem huri aman nin pipdume.
10 Yakup do'on Rahel kawa nin pipduma ukun mai me'e, la nauroin pipdum ukun onne yain Laban nina. Kame'ede ai nala'a oir makane poi wakue man rodi ad'adu onne laa herne, la nahur oir Laban nin pipduma ukun onne romun. An hi'i onne, ono Rahel eni inna narna anan. 11 Horu ne, masiyedi Rahel la nahere ono akin nahuwa'an pakromedi inna narna anan me'e. 12 An konohi Rahel, “Ainu'u mame, Ribka, o ammu narna.”
Enime'ede Rahel lari laa nakar konohi aman. 13 Laban derne nahenia ai narna Ribka anan Yakup maiyedi me'e, an pelek laa noro pakromo. Rakanedi ne, ai naurukuwala Yakup, masiyedi la nore laa nakar. Yakup wakunu mouwedi ha wo'ira na'akeme ma namwali noro ai. 14a Laban na'aheni, “Memen namlolo. Maika eniyenihe ihi rara mahaku.”
Yakup ho Lea noro Rahel
14b Yakup minle nakar onne wollo kekeme ida ne, 15 Laban na'aheni Yakup, “Pa'e, ikroko ihi rara mahaku, maa kan wa'an om howok mamani ma'alehe na'iwe'el nano maya'u. O mapanak na'iwe'el wo'ira?”
16 Lere onne Laban anan maekrara woro'o aile, anulu naran Lea la karuri naran Rahel. 17 Lea makan ma'arurua maa Rahel eni kemen nahuwa'an la oin makan ma'aruru rehi. 18 Yakup akin nala Rahel, de an walhe Laban na'ahenia, “Ya'u howok anna wo'ikku horu, pape nala anan karuri Rahel ya'u hoe.”
19 Laban na'aheni, “Ye e'e! Wa'an rehi ya ala ai ki o, yono ya ala ri namehin, ono o mamwali ya'u ihin rarna, de minala mai eni.”
20 Enpenia Yakup howok anna wo'ikku leke lernala Rahel, maa ai nauroin anna wo'ikku onne naise alam ida woro'o mehe ono ai akin nala maeke onne wake'e.
21 Anna wo'ikku horu ne, Yakup ne'el Laban na'ahenia, “Anna wo'ikkuwedi me'ede, pape nala anan ya'u ho here.”
22 Kame'ede Laban hi'i hohoo polu lariyala leke raram na'akeme. 23-24 Maa lere onne lere helemedi me'e, ai ka nala Rahel noro Yakup ramkuru wuku, maa nala Lea. (Laban nala nin maekida naran Zilpa leke namwali Lea nin hophopon wahwahan.) 25 Noho ropo mene Yakup nauroin nahenia an ho Lea.
Enime'ede Yakup laa noro Laban wakunu na'ahenia, “Hi'ihepenia Pape hi'i heheni ya'ue? O ma'aheni ya'u howok leke lernala Rahel. Hi'ihepenia Pape wukupoho maya'u de mala Lea ya'u hoe?”
26 Laban walha na'ahenia, “Yon ma'ahan, Pa'e! Mai eni ainima noho honolla karuri kan ho lewen anulu. 27 Ende lapanala rakan hohoo alam wo'ikku enihe horu mene ya ala Rahel ki o haenihi, horo o me'e howok anna wo'ikku ikar.”
28 Yakup ne'e, de hohoo horu mene Laban nala Rahel noro Yakup ho haenihi. 29 (Laban nala nin maekida ma naran Bilha namwali Rahel nin hophopon wahwahan.) 30 Yakup noro Rahel ramkuru wuku haenihi la ai naramyaka Rahel narehi Lea. Enla an howok anna wo'ikku wali'ur.
Yakup ananhe
31 Makromod do'on Yakup raram ka nodiyala Lea naisa Rahel, de An hi'i Lea moriyana, maa Rahel kan moriyana. 32 Lea apun de moriyana tatana mo'oniyanida. An waki tatane naran Ruben (napa'ahne, ‘po'onnala, enie mo'oniyana’). Ai na'aheni, “Makromod do'onedi ainu'u suse me'e la lo'o ors eni i hou'u raram nodi ya'u me'e.”
33 Onne horu, Lea apun wali'ur de moriyana tatana mo'oniyanida wali'ur. An waki tatane naran Simeon (napa'ahne, ‘Makromod dernedi me'e’). Ai na'aheni, “Makromod dernedi ainu'u mo'onleher raram ka nodi ya'u, de nala tatanida ya'u ho'o me'e.”
34 Horu, Lea apun wali'ur de mori tatana mo'oniyanida naran Lewi (napa'ahne, ‘du'ul kali’). Ai na'aheni, “Lo'o ainu'u mo'onleher du'ul kaliyedi noro maya'u me'e ono ya aledi tatana mo'oni wokelu ai me'e.” 35 Mai ne, Lea apun wali'ur moriyana tatana mo'oniyanida la waki naran Yehuda (napa'ahne, ‘ra'uli rasa'a Makromod’). Ai na'aheni, “Lere eni ya a'uli ya asa'a Makromod.” Horu ne, Lea kan moriyana me'e.