28
1-3 Ende Isak napolu Yakup mai, nounaku ai na'ahenia, “Makani wawa'ane! Yon moro maekrara manin Kana'an ho. Mala'a laa Mesopotamia laa upum Betuel nin nakar, leke ho noro yaum Laban anan. Na'amoli Makromod Lalap Ma Nodi Molollo Narehi Nalewen Na'akeme eni namre'e namharu o, la nala o upum anumhe nammori leke orekiha mamwali hair nammori. 4 Na'amoli Makromod namre'e namharu o moro upmu anumhe molmolle Ai namre'e namharu Abraham. Ors eni, o mamwali do'on awan minle noho eni, maa lere man mai om manarna noho eniyeni man Makromod Lalap naledi Abraham me'e.” 5 Ende Isak hopon Yakup nala'a laa yain Laban man minle Mesopotamia. Laban onne Betuel anan manin Aram, la ai onne Ribka narna. Ribka onne Yakup noro Esau inna.Esau ho wali'ur
6 Esau derne nahenia Isak napanak Makromod Lalap namre'e namharu Yakup, la huri nala'a laa Mesopotamia. An derne nahenia Isak kawala Yakup yon ho noro maekrara Kana'an, 7 la Yakup derne nakani inna aman de nala'edi Mesopotamia me'e. 8 Enime'ede eremnala nahenia aman Isak kan suk maeke Kana'an. 9 Enpenia Esau nala'a laa Ismael, Abraham anan, lan ho wali'ur noro Ismael anan maekida naran Mahalat. Maeke onne Nebayot narna.
Min Betel Yakup namarmi
10 Yakup namhara nano Bersyeba nala'a laa Haran. 11 Lere helem an rakan onnida la namkuru lolo onne. Namkuru ai na'iluni waku ida. 12 Namkukuru ai namarmi do'on rokon kukulu ida namriri noho wawan rakan a'am. Makromod Lalap Nin hophopon a'am raram ha'a kopur rokon onne. 13 Lolo namarmi an do'on Makromod namriri rokon hernea la na'aheni, “Ya'u penia Makromod Lalap, man Abraham noro Isak ra'u'uli rasasa'a eni. Na'amoli Ya ala ki o moro upum anumhe noho mamkukuru eniyeni. 14 O upum anumhe lo'o nammori naise elimo'o hapu. Na'amoli hir holi lolo noho eni na'akeme rakan laa wali warak, laa wali kimur, laa wali ra'i, laa wali karanna. Enla nano o moro upum anumhe Ya amre'e amharu hair rahu noho wawan na'akeme. 15 Horhorok! Ya'u lo'o orole'ule'u orowaliwali o laa ewi-ewi. Ler man mai alam man mai Yo odi o wali'ur mai nohorai eniyeni. Ka'u huri o hehenanumene Ya'u hi'i mouwedi ha wo'ira na'akeme man Ya'u nonou eni.”
16 Enime'ede Yakup erem de na'aheni, “Eni nanumene ya auroin Makromod ai lolo eni!” 17 Ai namka'uk rehi me'e de na'aheni, “Heih! Lolo eni hi'i aka'uka'uk rehi! Memen lolo eniyeni Makromod Lalap Nin Rome, la mai eni a'am raram nin nika lape.”
18 Rakan oreki al'alam Yakup namaka nala waku ma nodi hihi'i luni, na'aririe nanumene nala wuru zaitun halle waku leke hoikani Makromod Lalap. 19 An waki onno onne naran Betel (napa'ahne, ‘Makromod Nin Rom’). Onno onne aile leke Lus raram. 20-21 Onne horu, Yakup kikan hopo na'ahenia, “Lo'o Makromod Lalap norle'ule'u norwaliwali ya'u, la ilitolle maya'u nala hanana'an noro nainair hehenanumene norkaru ya'u wali wali'ur mai ainu'u ame nin nakar, ya a'uli ya asa'a Makromod mehe. 22 Waku ya a'ariri eniyeni yo odi tade onno rodi ra'uli rasa'a Makromod Lalap. Enla ya ala Makromod Lalap Nin hana'ar nano ha wo'ira man Ai nala maya'u, lo'o Ai nala ha rahu ida, ya ala Nin hana'ar idaweli.”