Isak namre'e namharu Yakup
27
Rakan Isak na'ileher la makan tokedi me'e, ai napolu anan anulu Esau na'ahenia, “Mai nanu, pa'e.”An walha, “Meneni ya'u, pape.”
2 Isak konohi, “Mauroin na'aheni ya a'ileheredi me'e, la lo'o ka'u mori nalo'ol me'e, 3 de o mala onum rame noro ram ihi enihe mala'a alhe manoinala ha mormori merwui ida. 4 Mapali wawa'anedi molmolle ainu'u raram nodi modi mai. Yo o'on horu mene ya'u ala ainu'u rere'e haharu mememen ki o leke ya amre'e amharuwedi o nanumene ya'u maki.”
5 Isak wakunkunu noro Esau, Ribka mahan nakakani haenihi. Esau namhara lan tonoinedi ha mormori merwui, 6 Ribka ne'el Yakup na'ahenia, “Idedi ya'u derne num pape hopon Esau na'ahenia, 7 ‘Laa manoin ha mormori merwui kem ida mapali wawa'anedi modi mai. Yo o'on horu mene, ya ala ainu'u rere'e haharu ki o lolo Makromod kalarna mene ya'u maki.’ 8 Ende derne makani wawa'an! Lernohi inhawa ya'u kukunohi o eni. 9 Lam loho pipduma waku woro'o man poipoire nano ukune modi mai, leke ya apali namwali hanana'an naise num pape nin raram nodie. 10 Ya apali horu, modi laa na'ane leke nala nin rere'e haharu ki o mene nin lere horu.”
11 Maa Yakup na'ori honorok inna na'ahenia, “Mame nauroiroin Esau kemen nawuluwulu la maya'u ka. 12 Yon hi'i pape hapu ya'u kem'u ne nauroin nahenia ya'u wukupohe, enlo'o ka namre'e namharu ya'u, maa nahopo na'aki ya'u.”
13 Inna walhale, “Yon mamka'uk, pa'e. Na'amoli ya a'uwara hopo aki onne. Om lam hi'i inhawa man ya aheheni onne. Mala'a here, laa mala pipdum enihe modi mai.”
14 Enime'ede Yakup laa nala pipdum onnenihe nodi mai inna leke napali lernohi Isak nin raram nodi eni. 15 Enla Ribka nodi Esau nin nainaire man ma'aruru man aile heuheu raram, nala Yakup naire. 16 Yakup liman noro kelen ka nawulu de Ribka nala pipiyane ulikne pasunedi ai liman noro kelen, 17 la ai nodi hanana'an ma namina onne noro roti an hihi'i eni, nala Yakup.
18 Yakup nodi hanana'an onne laa aman napolu na'ahenia, “Papa, ya'u maiyedi me'e!”
Aman walha, “Heih! Inhoi o, Esau, ee Yakup?”
19 Yakup walhe, “Esau, pap anan anulue. Papa nin napanak eni ya'u hi'iyedi me'e. Mamakedi la mo'on mahin man ya'u laa anonoin eni leke pape nala nin rere'e haharu maya'u.”
20 Isak na'aheni, “Hi'ihehewi om pelek waliyedi me'e?”
Yakup walha, “Papa nin Makromod naramyak ya'u de pelek lernala.”
21 Enime'ede Isak na'aheni ai, “Mai wakurani ya'u leke i hapu o de auroin kokkoo eni Esau, ee ka.” 22 An laa wakuraniyedi, aman hapue la na'aheni, “O lirum naisa Yakup lirna, maa o limmu naisa Esau liman.” 23 Isak ka nauroinnala anan onne Yakup, ono liman nawuluwulu naisa Esau liman. Na'akeki ai namre'e namharu Yakup, ai na'ukani naran wali'ur, 24 “Namlolo kokkoo o eni Esau?”
Yakup walha, “Namlolo, pape.”
25 Enime'ede Isak na'aheni, “Mala mahin onne yo o'on horuwedi mene ya ala rere'e haharu ki o.” Yakup nala mahin na'ane, la nala anggur tarana nomun. Onne horu Isak na'aheni wali'ur, 26 “Pa'e! Mai wakuraniyala ikar, masiyedi ya'u.”
27 Yakup wakurani masiyedi ne, Isak warannala Esau nina nainaire rain me'ede nala nin rere'e haharu ai. Ai na'aheni,
“Ya an'u wola'ula'u naisa alha man Makromod namre'e namharuwedi me'e.
28 Na'amoli Makromod Lalap nala warawui nano a'am, leke hi'i onum kirna enihe namnoro nahuwa'an, la ihin ennen ma'aruru, de nala aliwerhe noro anggur woi nammori ki o.
29 Na'amoli hair rahu ramwali num hophopon wahwahan la noho-noho derne rakani ki o. Mi modi molollo ihum wallumhe, la ihum wallumhe kadi ein korno o kalarum.
Na'amoli inhoi nahopo na'aki o, an lernala hop aki haenihi, la inhoi namre'e namharu o, an lernala rere'e haharu haenihi.”
Esau napanak Isak nala rere'e haharu haenihi
30 Isak naledi rere'e haharu Yakup horu nanumene anan Esau wali nano alhe. 31 Ai napali hanana'an man wa'an nodi laa aman haenihi. Ai na'aheni, “Pape, mamakala leke mo'on mahin man yo odi mai eni. Mo'on momun horu mene mamre'e mamharu ya'u.”
32 Isak na'ukani, “Inhoi o?”
“Maya'u Esau! Pape anum anulue.”
33 Isak kemen narururu la ai na'ukani, “Idedi inhoi nodi mahin mai, yo o'on? Idedi nanumene ya a'ak horu, ya aledi ainu'u rere'e haharu ai onne me'e. Ai nodi mouwedi laa ewi-ewi.”
34 Esau dernedi aman nin wanakunu onneni, an hehel rehi la kaisedi na'ahenia, “Aduu! Papee! Mamre'e mamharu ya'u haenihi!”
35 Isak walhe, “Mo'oni wallum mai de wukupohedi ya'u me'e, de ai naledi num rere'e haharu me'e.”
36 Esau na'aheni, “Eni an paipudi ya'u rewro'o me'e. Namlolo ai naran ‘Yakup’a ono an paipudi ya'u naledi ainu'u molollo anulu me'e, la lere eni ai nala wali'uredi rere'e haharu man ra'akekene maya'u eni, maa yon hi'i pape nin rere'e haharu namehin aile haromo, nala maya'u ke'e!”
37 Isak walhe, “Ya'u hi'iyedi ai namwali o makrommu, la ya'u hi'i Yakup walin na'akeme ramwali nin hophopon wahwahan. Ya aledi rere'e haharu nahenia nala aliwerhe noro anggur nammori ai. Ende ya a'alehe rere'e haharu ala ki o, pa'e.”
38 Esau derne ne, na'ukani aman, “Papa nin rere'e haharu ida mehe? Mapanak Makromod namre'e namharu ya'u haenihi.” Enime'ede nahere me'e.
39 Enine Isak ne'el ai na'ahenia,
“A'am lo'o ka nala warawui ki o, la om howok kirna lo'o ka namwali.
40 Om lernala morimori nano onum rae, la o mamwali hophopon wahwahan o mo'onwallum.
Maa rakan lere o mamhene ai nodi molollo o, lo'o mahinuriyedi nano nin molollo.”
Ribka hopon Yakup lari laa nin lekloi Haran
41 Enpenia Esau kan suk Yakup ono nahoredi nin rere'e haharu me'e. Lolo honorok akin ai na'aheni, “Ka nalo'ol lo'o pape maki me'e, iknik sus mak oir horu mene ye esne ai.”
42 Lere Ribka derne nauroin Esau nin panaeku eni, an hopon polu Yakup mai. Mai ne na'aheni, “Pa'e, derne makani wawa'an. O mo'onwallum Esau nahinorok walha nin aki apinhe de paekuwedi me'e nesne o. 43 Ende derne ainu'u wanakunu eni. Peleke lam do'on i nar'u Laban man aile Haran. 44 Lo'o om minle enne hehenanumene o mo'onwallum nin ahan keper, 45 la an hamlinuwedi inhawe man om hihi'i ai eni. Ler li'ur mene ya'u hopon rin ki polu o mai. Ya amhene ya an'u woro'enihe molu alam mahaku.”
46 Enpenia Ribka ne'el Isak, “Esau hono manin Het eni hi'i sus maya'u mamani. Lo'o Yakup ho noro maekrara Het haenihi, wa'an rehi i makiyedi.”