Isak noro rai Abimelek
26
Lolo Isak nin leke onne noho roulara lapa molmolle Abraham nin lere wali'ur, de Isak lan holi rai Abimelek nin noho. Abimelek eni, ri Pilistin man minle noho Gerar. 2 Lolo onne Makromod nalhari kemen Isak na'aheni, “Yon mala'a laa Mesir, maa min lolo noho man Ya'u kukunohi o. 3 Lere eni min mai noho eni ke'e. Yo orole'ule'u orowaliwali la amre'e amharu o. Nohorai eni na'akeme Ya ala ki o moro upmu anumhe. Ka'u hamlinu Ainu'u nou Ya aledi ammu Abraham. 4 Ya'u hi'i upmu anumhe nammori naisa kaliyoro man minle a'am, la nohorai eniyenihe na'akeme Ya ala hi. Lolo o upum anumhe, na'amoli nohorai ma aile noho wawan na'akeme lernala Ainu'u rere'e haharu. 5 Ya amre'e amharu o ono Abraham derne nakani Maya'u mamani. An hi'i inhawa man Ya'u hopon hi'i, la lernohi Ainu'u wanakuku wanayo'o.” 6 Eni penia Isak namkene minle Gerar.7 Isak hono Ribka namwali maeke man herlei wake'e. Ende mo'oni man minle noho onne po'on ai, ra'ukani Isak na'ahenia, “Maeke onne maekrare makun, ee ka?” Maa Isak walha na'ahenia, “Ai onne i nar'u.” Ka na'aheni Ribka namwali hono, ono namka'uk ri onnenihe resne ai leke rala Ribka. 8 Isak holi lolo onne nalo'oledi tarana me'e, la lerida rai Abimelek po'on lolo nin hawollo la paharne do'on Isak noro Ribka maha rauruku ramasi. 9 Abimelek napolu Isak na'ahenia, “Isak! Ya auroin kokkoo ai onne o houm! Hi'ihepe o ma'aheni o narume?”
Isak walhe, “Ya amka'uk lo'o konohi ri ai onne i hou'u lo'o hi resna'u.”
10 Rai na'ukani wali'ur, “Alhi'ihepe om hi'i panaeku onne mayai enie? Lo'o lolo eni ri ida namkuru noro o houm, mala sala mayai. Kan wa'an om hi'i wewhe heheni noro mayai.”
11 Enpenia Abimelek loikaru nin ri mormoriyane na'ahenia, “Horhorok! Yon ri mahaku na'o'o ri eniyeni noro hono, kalo'o ya'u hukumesnedi.”
12 Anna onne Isak howok kirna la pekir ariyono. Makromod namre'e namharu ai, de lernala ihin ennen nala rewen rahu ida nano wini an pekir ariyono onne. 13 Ainina kanaru eren na'uwawali, de ai namwali ri orkanaru wake'e. 14 Ainina pipduma noro pipi ketawa nammori, sapi ukun, noro hophopon nammori me'e, de ri Pilistin enihe rakehen. 15 Enpenia hi rodi elimo'o uinedi nin oir makan na'akeme man aman Abraham nin hophopon enihe ra'iredi nonolu me'e.
16 Kame'ede Abimelek ne'el Isak, “Isak! O modi molollo narehi mayai me'e, de wa'an rehi mamharedi ainim leke here!”
17 Ende Isak nala'a nako'uwala tarana, de lan hi'i nin heuheu min lolo Gerar kauhe. Ai namkene min lolo onne. 18 Nonolu eni Abraham nin hophopon wahwahan ra'iredi oir makan wo'irha lolo onne me'e, maa ri Pilistin enihe rodi elimo'o uinedi me'e, de Isak nin ri ra'ir wali'ur waki naran namnenehe Abraham wawaki eni.
19 Ler ida Isak nin hophopon wahwahan ra'ir oir makan ida minle Gerar kauhe. Hir lernala oir nammori, 20 maa man huri pipduma man minle Gerar enihe rasesi noro Isak nin man huri. Hi ra'aheni, “Oir eni ainima oir.” Ende Isak waki oir makan onne Esek (napa'ahne, ‘rasesi’), ono ri onnenihe rasesi noro Isak lolo onne.
21 Onne horu, nin hophopon wahwahan enihe ra'ir oir makan namehin wali'ur, maa rasesi kuli wali'ur. Enpenia Isak waki oir makan onne naran Sitna (napa'ahne, ‘ra'ara kuli’). 22 Mai ne, Isak namhara lolo onne na'ir oir makan rewkelu nine. Ra'ir onne ho'o ne, ka rasesi me'e. Enpenia Isak waki oir makan onne naran Rehobot (napa'ahne, ‘onno ma naphari’), la ai na'aheni, “Makromod nala leken paharin mai ika holi namlina namkai lolo nohorai eniyeni.”
23 Kame'ede Isak rei kau nano lolo onne laa Bersyeba. 24 An rakanedi lolo onne, a'alam onne Makromod nalhari kemen ai na'aheni,
“Ya'u penia Makrommu Lalap man o ammu Abraham na'uli nasa'a. Yon mamka'uk ono Yo orole'ule'u orowaliwali o. Ya amre'e amharu o, la hi'i o upmu anum nammori lernohi Ainu'u nou noro Abraham.”
25 Enime'ede Isak na'ariri panaur ida lolo onne, la napanak trimkasi Makromod. Hi ra'ariri rir heuheu lolo onneni la nina hophopon wahwahan enihe ra'ir oir makan namehin wali'ur.
Isak noro Abimelek hi'i nou ma namkene
26 Lerida Abimelek noro nin ri ma nala nounaku naran Ahusat, noro nin uluwakun are naran Pikhol, ramhara nano Gerar mai Bersyeba leke roro Isak pakromo. 27 Hir pakromedi, Isak na'ukani na'ahenia, “Papa rai! Nonolu mi kam suk ya'u, de mohi ya'u nano minim noho. Minim panaeku inhawa ho'o penia mai ka'ar ya'ue?”
28 Enime'ede hir walha na'ahenia, “Nadoo eni nanumene ai mauroin nahenia Makromod nodi nala o. Ende ainim panaeku wa'an rehi ikroko hi'i ronoro kanawar. 29 Ai mapanak o mahopedi ma'aheni kam hi'i ha yakyak mayai, naise nonolu eni ai kam hi'i ha yakyaka ki o, maa hi'i ha wawa'an moro mi mamani, la lere am hopon o mamhara ainim lekloi, am hi'i o mala'a wawa'an. Ai mauroin mouropo nahenia Makromod namre'e namharu o.”
30 Kame'ede Isak hi'i ya'ak de ra'an romun wewerre. 31 Oreki werra'ha hir kikan hopo nahenia ida man holi wawa'an noro ida. Enime'ede Isak noro nina peina'a onnenihe rahina'ar, la ai na'aheni hi, “Mala'a wawa'anedi.”
32 Ler onne me'ede Isak nin ri enihe mai kukunohi nahenia oir makan hi rara'ir eni lernaledi makan me'e. 33 Enime'ede Isak waki oir makan onne naran Syeba, (napa'ahne, ‘hope’). Ende nano lere onne rakan lere eniyeni kota onne waki Bersyeba, napa'ahne, ‘oir makan hope.’
Esau ho maeke woro'o nano luhu namehin