Abraham ho wali'ur
25
Abraham ho wali'ur maekida naranne Ketura. 2 Hono onne moriyana ananhe naran Simran, Yoksan, Medan, Midian, Isbak noro Sua. 3 Yoksan onne na'ori Syeba noro Dedan. Dedan upun anan onneni manin Asyur, manin Letus, noro manin Leum. 4 Midian anan me'enile: Efa, Efer, Henok, Abida, noro Eldaa. Hi na'akeme Ketura upun ananhe.5-6 Abraham mormori makun, ai nala raramyaka Hagar noro Ketura ananhe dohodoho, la hopon na'akeme lar min lolo Kana'an wali kimur leke rako'uwala Isak, maa nin linikir kanaru ma namwali nin pusake ai nala mouwedi anan Isak.
Abraham maki
7-8 Abraham na'ileher wake'edi mene maki, nin anne rahu ida weli'ikku wolima. 9-10 Lere Abraham aran horu, ananne Isak noro Ismael karule ku'il Makpela ma aile nin nohe sidal ida ma na'uranrani Mamre wali kimur. Nonolu Abraham weli kirne onne nano ri Het, Zoar anan Epron. Abraham hono Sara karu lolo onne haenihi. 11 Abraham makiyedi, Makromod Lalap namre'e namharu Isak. Ler onne, Isak minle na'urani oir makan Beer Lahai-Roi.
Ismael upun anan
12 Eniyeni Ismael upun anan nin wanakunu: Ismael onne namwali Abraham noro Hagar ananne, la Hagar onne ri Mesir ma namwali Sara nin hophopon wahwahan. 13-16 Ismael anan idaweli woro'o kanakarne anulu rakan karuri: Nebayot, Kedar, Adbeel, Mibsam, Misma, Duma, Masa, Hadad, Tema, Yetur, Nafis, noro Kedma. Tatan onnenihe ramwali luhu idaweli woro'o upun a'an, la hirira leke waki lernohi dohodoho naranhe. 17 Ismael nin anna rahu welikelu wo'ikku mene maki, 18 maa ai upun ananhe kar holi wawa'an noro Abraham upun anan namehin. Hir holi lolo noho-noho nano Hawila rakan Syur ma aile Mesir wali kimur, lolo kalla man laa Asyur.
Mori Esau noro Yakup
19 Eniyeni Abraham anan Isak nin wanakunu: 20 Lere Isak nin anna weli'akka, an ho Ribka. Ribka eni aman Betuel, la narna Laban. Hi onne manin Aram lolo nohorai Mesopotamia.
21 Ribka kan moriyana de Isak napanak an'anhedi Makromod leke lernala tatana. Makromod kokala nin napanak de Ribka apun. 22 An apunne tatana adodo'e, maa kar mori makun hi rapetil inna konoin raram. Enime'ede ai na'ukani lolo akin, “Ka'u suk tatan enihe rapetil heheni! Hi'ihepeni namwali heheni i kono'ue?” Enla na'ukani Makromod haenihi.
23 Makromod walhale na'aheni,
“Tatana woro'o ma aile o konoum raram ramwali hair woro'o.
Hair woro'o onnenihe,
ida ma na'ara noro ida mamani.
Karuri naruri rehi anulue,
la karuri upun anan hopon wahan anulu upun anan.”
24 Rakan Ribka nin lere alam moriyana, an mori tatana mo'oni adodo'e. 25 Anulu ulikin memere la kemen na'akeme nawuluwulu. Ende waki naran Esau.a 26 Mai mori tatana karuri ne, liman nasalsala Esau ein ki'ilne. Onne penia waki naran Yakup.b Ler onne Isak nin anna welineme me'e.
27 Tatana woro'enihe eren lalapa, Esau namwali man tonoin ha mormori merwui man lewlewen la ai raram nodi minle alhe mamani. Yakup nin morimori ka na'ohonale la ai raram nodi min rir heuheu raram mehe. 28 Isak naramyak rehi Esau, ono Isak raram nodi na'an mahin merwui, maa Ribka naramyaka Yakup narehi Esau.
Yakup paipudi Esau leke nala nin molollo mo'oni anulu eni
29 Lerida Yakup mahan napali laururu lain memere, la Esau waliyedi nano tonoin ha mormori merwui de maha rehi la namlara wake'e. 30 Napoluwedi Yakup na'ahenia, “Adiye! Ya amlara wake'edi me'e. Ya apanak onum laururu lain memere taran yo o'onala ke'e.” (Onne peni nakoko rapolu Edom.)c
31 Yakup walhe, “O mamwali mo'oni anulu, de ya ala laururu lain memere o, horo o mala num molollo mo'oni anulued maya'u.”
32 Esau na'aheni, “Na'ikeki ya'u maki me'e! Molollo mo'oni anulu onne ka nodi molollo paku ya'u harome!”
33 Maa Yakup na'aheni wali'ur, “Mahopedi nanu ma'aheni o maledi num molollo anulu eni maya'u me'e.” Enime'ede Esau kikan hopo nahenia naledi nin molollo anulu Yakup me'e. 34 Onne horu Yakup nala roti noro laururu lain memere hunhuni heruwali Esau na'an. Esau na'an nomun horu, ai namriri nala'a me'e.
Ende Esau kan peinohi nin molollo anulu me'e.