Yotam, gan ge Yuda ne
27
1 Swaga ge Yotam ne ame gan, ka da ne del wara azi para anuwa̰y. Za gan Ursalima go del wol para myanaŋgal. Na ná a Sadok vya ne, na dḭl Yerucha. 2 Ke kaŋ ge dosol Bage ɗiŋnedin ndwara se dimma ne na bá Ozias ne ka kerra go. Go no puy ɗe, be ka kat zok ge Bage ɗiŋnedin ne zi to, ɓase ma me ɗe, a ka zam zḛ sone kerra zi. 3 Uwale, a Yotam sḭ zok wak ga̰l ge zok ge Bage ɗiŋnedin ne ne, sḭ gulum ga̰l ge ndwala pul ge Ofel ne swaga ma digi no me. 4 Sḭ suwal ma ge njal ge Yuda ne pala digi no, sḭ gulum ga̰l ma ne swaga njole swaga ma ge murum ma zi no me. 5 Yotam ke pore ne Ammon ma gan, há na no. Del mbe go, Ammon ma tyare fool kaal kilo dudubu ataa, ne gḛme suwàl dudubu tapolɗu, ne gḛme ge fogor suwàl dudubu tapolɗu me hon Yotam. Del ge azi, ne ge ataa go, a tyare kaŋ mbe go no hon na me. 6 Yotam pe ɗur se, hat pool, ne da pe ka dosol Bage ɗiŋnedin Dok ge na ne ndwara se.7 Kaŋ ge Yotam ne ke ge may ma, na pore mballa ma, ne na kaŋ ge daage ge ne ke ma, a njaŋge nama ya maktub ge gan ge Israyela ma ne ge Yuda ma ne zi. 8 Swaga ge ne ame gan, ka da ne del wara azi para anuwa̰y, za gan del wol para myanaŋgal Ursalima go. 9 Yotam jyat na bá ma pe ya, a mbul na ge suwal ge Dawda ne go. Na vya Ahaz zam gan na byalam go.