Ahaz, gan ge Yuda ne
28
1 Swaga ge Ahaz ne ame gan, ka da ne del wara azi, za gan Ursalima go del wol para myanaŋgal. Be ke kaŋ ge dosol Bage ɗiŋnedin ndwara se dimma ne na báŋ Dawda ne ke go to. 2 Ka bole kaŋ kerra ge Israyela ma gan ma ne, e na ɗiŋ ɗeere kḭḭm ma ne fool kaal ne sḭḭm Baal pe. 3 Ka mbo tyare dukan tilla ge baal pul ge Ben-Hinnom ne se, mbo ɗiŋ mbo tyare na vya ma tilla uzi hon kaŋ sḭḭm, ka ke kaŋ ge seŋgre kakatak ma ge naa ge Bage ɗiŋnedin ne ya̰ nama uzi Israyela vya ma ndwara zḛ ma ne ka kerra ma. 4 Ka mbo tyare tuwaleya ma, ne til dukan ma swaga sḭḭm ma go, ne njal ma pala digi, ne uwara sḭḭm ma pe zi pet me.5 Bage ɗiŋnedin teme Siriya ma ya, a hal na, a pál naa gḛ ge be to, a mbo ne nama suwal Damas. Gwan e Peka ge Remaliya vya, gan ge Israyela ne ya, a ke nama yál gḛ ge be to. 6 Dam ge ɗu go, Peka hun Yuda ma naa dudubu kis para wara azi, pet naa ge pateya ma, ne da pe, a saŋge Bage ɗiŋnedin Dok ge bama bá ma ne bama go̰r. 7 Zikri, ndu ge pala balme ge ne hir ge Efrayim ne zi, hun Maaseya ge gan vya, ne Azrikam, ndu ge ne dó na ndwara ne gan yàl pal, ne Elkana goopol ge gan ne. 8 Israyela ma pál Yuda ma naa sonmo ne naa zaab, ne naa jabso dudubu kikis azi, a pál kaŋ ma gḛ ge be to, a gene nama mbo Samariya ya.
9 Anabi ge Bage ɗiŋnedin ne a̰me ɗu, na dḭl Oded, ge ne ka Samariya go, ɗage ya asagar ge Israyela ne ma ndwara zi, a ne wat suwal diŋ, jan nama go: «Ndi me gale, Bage ɗiŋnedin Dok ge aŋ bá ma ne laar vḛne Yuda pal, ɓya̰ nama aŋ tok go no. Hunna ge aŋ ne hṵ nama na fare det ya Dok ta digi zi ya. 10 Uwale, ndi ne se no, aŋ abe Yuda mbe ma no ya nama ga aŋ mo̰r ma ne aŋ kale ma. Aŋ dwat go, aŋ ke ya̰l Bage ɗiŋnedin Dok ge aŋ ne ndwara se to’a? 11 Za̰ me mbi gale, ká̰ me aŋ ná vya ma ge aŋ ne wá̰ nama mbe ma digi. Ago ne se no, Bage ɗiŋnedin a ho̰l ne aŋ.» 12 Ga̰l a̰me ma ne pehir ge Efrayim ne ma buwal zi, a ɗage naa ge ne gwa̰ ne pore ya ma pal. A Azariya ge Yohanan vya, Berekiya ge Mechillemot vya, Ezekiyas ge Challum vya, ne Amasa ge Hadlay vya. 13 A jan nama go: «Aŋ ne pool ge gene naa mbe ma ya diŋ to, ago nee ma hat gwan saŋge ya̰l waɗeya Bage ɗiŋnedin ndwara se. Aŋ ɓyare gwan kan ya̰l ma ne sone ma, ge ya̰l ge zaŋgal ma pal ɗaa! Sone ge nee ne ma dṵṵl waɗeya, Bage ɗiŋnedin da laar hotɗa gḛ ne nee ge Israyela ma pal.»
14 Swaga mbe go, asagar ma yá̰ naa ge bama ne wá̰ nama ya ma digi ne nama kaŋ ma, ge naa ga̰l ma ne ɓase ma ndwara go pet. 15 Naa ge a ne tó nama dḭl mbe ma no, a é naa ge a ne pá nama ya ma haŋgal, a abe ba̰r ge a ne pá nama ya ma, a hon naa ge swala ma, a abe tyarko ma, a hon naa ge be tyarko ma, a hon nama kaŋzam ma ne kaŋ njotɗa, naa ge ne jwaŋ ma, a usi nama jwaŋ ma wak, naa ge ne day mbo viya̰ to ma, a é nama kwara ma pala digi, a gwan ne nama mwaɗak mbo Jeriko, suwal ge tumur ne ya, nama kaam ma ta ya. Nama sḛ ma gwan’a Samariya diŋ.
Ahaz mbo hal Asiriya ma gan goŋle
16 Swaga mbe go, gan Ahaz hal Asiriya ma gan goŋle. 17 Ne da pe, Edom ma gwa̰ ya uwale det Yuda ma pore mballa, a pál naa a̰me ma. 18 Uwale, Filistiya ma mbo ya, a det Yuda suwal ma ge ne babur pul go le Negev go ma pore mballa me. A ame suwal Bet-Chemes, ne Ayalon, ne Gederot, ne Soko ma ne na suwal vya ma, ne Timna ma ne na suwal vya ma, ne Gimzo ma ne na suwal vya ma, a ga kat nama go. 19 Ago Bage ɗiŋnedin é Yuda ma pala cwage ya se, ne Ahaz pe. Ne da pe, Ahaz é nama saŋge Bage ɗiŋnedin bama go̰r. Na sḛ me be ke laar ɓyare ge Bage ɗiŋnedin ne to bat. 20 Ge go, Tiglat-Pilneser gan ge Asiriya ma ne mbo ya mbar Ahaz mbar ɗe, gwan det na pore zo, hal na. 21 Ko ne jo̰ Ahaz abe kaŋ ma mbut ne zok ge Bage ɗiŋnedin ne zi, ne gan yadiŋ, ne ga̰l ma tok go hon gan ge Asiriya ma ne puy ɗe, na kaŋ mbe be mbar na to. 22 Na yál mbe ma no zi puy ɗe, gan Ahaz ka dwage ke ho̰l ne Bage ɗiŋnedin. 23 Ɗiŋ mbo tyare tuwaleya hon dok ge Damas ma ne, nama ge ne há na, ne da pe, ka jan tene go: «Ne jo̰ dok ge Siriya ma ne sya nama ko̰r ɗe, a kwaɗa mbi ke tuwaleya hon dok mbe ma, nama sya mbi ko̰r me.» Amma a dok mbe ma sḛ e gan ma ne na naa ma detɗa ne ne.
24 Ahaz abe kaŋ ge ne zok ge Bage ɗiŋnedin ne zi ma, ɓá nama uzi, fet zok ge Bage ɗiŋnedin ne wak digi, sin twal tuwaleya ma ge Ursalima viya̰ kiya̰r ma go. 25 Sin swaga sḭḭm ma ge Yuda suwal ge daage go ne ke tuwaleya hon dok ge ɗogle ma pe. Na kaŋ kerra mbe ma é Bage ɗiŋnedin Dok ge na bá ma ne laar hotɗa.