MAKTUB GE
ZḚ GE
GE
MAANA GE GAN MA NE
Fare pala hageya
Maktub ge maana ge gan ma ne ma jwak, zaŋgal a ka digi dagre ɗu. A wan maana ge gan ge Israyela ne ma pe. Nama fare pe wanna e pe da ne pe dolla ge kaŋ ma ne ya tek det ya gwanna ge Yahud ma ne ne mo̰r ge Babilon ne ya bama suwal go. Bage ne njaŋge nama ŋgay go a Dok ɗu kikit mbya ke muluk Israyela vya ma pal ne, gan ma ge ne ke muluk ne Israyela vya ma pal ma a na goopol ma ne baŋ. Go no Dawda gan ge ɗeŋger ne. Maktub mbe ma wan be maana ge gan ma ne pe se baŋ go yak to, amma zwal haŋgal ma ya Dok pal, ne temel ge Dok ne ma kerra pal. A ŋgay doŋ pe ge giya̰l viya̰ ge dosol ge ne mbya ge nama ba dol pe na pal.
Maktub ge zḛ ge ge maana ge gan ma ne e pe da ne dḭl ma ge naa ge zaŋgal ma ne, ne Adam ya tek mbo ya Dawda go, diŋ mbo ge pehir ge wol para azi ge Israyela vya ma ne zi, ne naa ge tuwaleya ma, ne naa ge ne gwa̰ ne mo̰r zi ya mbo ya Ursalima go ma (1Maa 1—9). A no pet a ŋgay go hir ge ne mbya ke muluk Ursalima go, a pehir ge Yuda ne, naa ge ke tuwaleya ma, a pehir ge Levi ne, ne vwal pe ge Aaron ne.
Ne (1Maa 10—29) wan muluk kerra ge Dawda ne pe. Amma wan fare ge na bool ne, ne ho̰l ge a ne Sawul ne ka kerra ta buwal zi, ne sone ge ne ke, ne yál ge ne ɓo ne na vya ma ta pe, wan kaŋ ge kwaɗa ge Dawda ne ke ma pe ɗeŋgo, ne nṵsiya ge ne nṵsi naa ge ke tuwaleya ma, ne naa ge mbal kaŋ ma, ne naa ge koy zok wak ma, ne kaŋ ge ne nṵsi ne zok ge mbegeya pe sinna ma, etc.
Swaga dwat ne maana ge gan ma ne ma pal, a ŋgay doŋ pe ge ma̰ ma go, naa ge Dok ne ma mbya kat dosol Dok ndwara se, a ka koy na eya ma, ne ke na temel mo̰r ne na viya̰ go.
Varseya ge maktub ge zḛ ge ge maana ge gan ma ne ne
1- Doŋ pe ma (1—9)
2- Maana ge Dawda ne (10—29)