MAKTUB GE
ESDRAS
NE
Fare pala hageya
Maktub ge Esdras ne ma ne Maktub ge Nehemiya ne zaŋgal ka digi dagre ɗu, a go̰r go gale a ɗage varse nama se no. A wan gwanna ge Yuda ma ne ne mo̰r ge Babilon ne zi ya bama suwal go zaman ge Perse ma ne go pe. Ago Babilon ma pá Yuda ma mbo mo̰r zi del kikis anuwa̰y para wara tiimal para ɓyalar (587) tolla ge Jeso Kris ne ndwara zḛ, swaga ge Perse ma ne ame gan ne Babilon ma tok go, del kikis anuwa̰y para tapolɗu para lamaɗo (539) tolla ge Jeso ne ndwara zḛ, Sirus gan ge perse ma ne ya̰ mo̰r ma gwan mbo bama suwal ma no. A go no, Israyela vya ma ɓo viya̰ ge gwanna ya Yuda go no me.
Maktub ge Esdras ne ma ne Maktub ge Nehemiya ne wan sinna ge zok ge mbegeya ne ma ne gulum ga̰l ne, ne sinna digi ge hir ge Yuda ma ne Dok ndwara se me. Kaŋ ge ataa mbe ma no, a kaŋ ge ne waɗe ga̰l ne nama ta ne.
Zok ge mbegeya a kaŋ ge ne ŋgay ne go Dok ya na naa ma buwal zi, a mbo ya Dok ndwara se ndwara kat ba̰a̰n ne na na zi me. Suwal ga̰l ge Dok ne, ndwara go Ursalima a suwal ge zok ge mbegeya ne na go, na gulum ga̰l ma sinna digi da ne hamba gḛ ge be to. Amma zok ge mbegeya ma ne suwal hamba da ne naa ge ne suwal diŋ ma ta. A go no hir ge Yuda ma ne sinna digi Dok zi a kwaɗa me. A ŋgat nama kwa eya ge Dok ne ma, nama gwan ne nama pala laar ɓyareya ge Dok ne pe se.
Maktub ge Esdras ne jan fare gḛ da ne Esdras, na ge bage tuwaleya, ne bage ne kwa eya ge Dok ne ma tyatyat. Maktub ge Esdras ne e pe da ne wak honna ge Sirus ne ne gwanna ge Yuda ma ne ya Ursalima go ne Zok ge mbegeya sinna pe. Naa gḛ a gwa̰ ya dagre ne Esdras, amma swaga sin zok go a ɓo gageya ma ne bama naa ge ho̰l ma ta, go no puy ɗe swaga hale fare ma pe go, a ɓo viya̰ ge sin zok mbe digi. Bage tuwaleya Esdras e Yuda ma saŋge ya Dok ta me. A go no, a yá̰ bama gwale ge pehir ge ɗogle ma no, a abe ta uzi ne sone kerra ma go no me.
Maktub ge Esdras ne ŋgay hamba ge hon fareba ne, ne katɗa ge ɗeŋger Dok zi me. Ŋgay dulwak wanna, ne hon tene ne temel pe ge Esdras ne ndwara saŋge Yuda ma ya Dok ta. A go mo̰r ge Dok ne ne pool ge ya̰ tene fatɗa ne sone to, kat dosol ne ɗeŋger Dok ndwara se.