Yoyahaz, gan ge Yuda ne
36
1 Swaga mbe go, naa ge ne suwal Yuda go ma, a tal Yoyahaz ge Yozias vya, a e na gan na bá byalam go, Ursalima diŋ. 2 Yoyahaz ame gan da ne del wara azi para ataa, za gan Ursalima diŋ saba ataa. 3 Neko gan ge suwal Masar ne, mbo ya Ursalima diŋ ndage na ne gan zi uzi, e naa ge ne Yuda go ma tyare na fool kaal kilo dudubu ataa, ne dinar kilo tapolɗu me. 4 Neko wan Eliyakim ge Yoyahaz ná vya, e na gan suwal Yuda pal, Ursalima diŋ, er na dḭl Yoyakim. Neko wan Yoyahaz gene na mbo suwal Masar ya.Yoyakim, gan ge Yuda ne
5 Yoyakim ame gan da ne del wara azi para anuwa̰y. Zá gan Ursalima go del wol para ɗu. Amma ka ke kaŋ ge sone ma Bage ɗiŋnedin na Dok ndwara se. 6 Nebukadnezar, gan ge suwal Babilon ne mbo det na pore mballa, wan na, vwal na ne zúl, gene na mbo Babilon. 7 Nebukadnezar pál kaŋ ge ne zok ge Bage ɗiŋnedin ne zi ma, in nama mbo Babilon, mbo e nama na dok zok zi. 8 Kaŋ ge Yoyakim ne ke ge may ma, na kaŋ ge seŋgre kakatak ge ne ke ma, na fare ge ne dé na pal ma, a njaŋge nama ya Maktub Maana ge Gan ge Israyela ma, ne ge Yuda ma ne zi. Na vya Yoyakin zam gan na byalam go.
Yoyakim, gan ge Yuda ne
9 Yoyakin ame gan da ne del tiimal. Za gan Ursalima diŋ saba ataa ne dam wol. Amma ka ke kaŋ ge sone ma Bage ɗiŋnedin ndwara se. 10 Del wak go, Nebukadnezar kan na asagar ma ya, a wan na, a gene na mbo Babilon poseya ne kaŋ kwaɗa ma ge ne zok ge Bage ɗiŋnedin ne zi ma. A wan Sedekiyas ge ná vya, a e na gan suwal Yuda pal Ursalima diŋ na byalam go.
Sedekiyas, gan ge Yuda ne
11 Swaga ge Sedekiyas ne ame gan, ka da ne del wara azi para ɗu. Zá gan Ursalima diŋ del wol para ɗu. 12 Amma ka ke kaŋ ge sone ma Bage ɗiŋnedin Dok ge na ne ndwara se, be ka gwan ne na pala fare janna ma ge anabi Irmiya ne ka jan ka̰l ge Bage ɗiŋnedin ne ma pe se to. 13 A no ɗeŋgo to, ne jo̰ Nebukadnezar e na guni tene ne dḭl ge Dok ne go, na gwa̰ ne na pala na ge Nebukadnezar pe se puy ɗe, gwan kuri na wak. Uwale, ge na gwa̰ ya Bage ɗiŋnedin Dok ge Israyela ne ta puy ɗe, Sedekiyas kuri uzi bat. 14 Uwale, Ga̰l ge naa ge ke tuwaleya ma ne ma, ne ɓase ma mwaɗak, a ka dwage sone kerra waɗeya, dimma ne kaŋ ge seŋgre kakatak ge pehir ge ɗogle ma ne kerra go, a hat zok ge Bage ɗiŋnedin ne, na ge Bage ɗiŋnedin ne mbege na ne tene pe Ursalima go yaɗat to. 15 Bage ɗiŋnedin, Dok ge nama báŋ ma ne, teme na naa ge temeya ma ya ndwara wowol nama ta mḛre nama, ago ɓyare go, na zur na naa, ne zur zok ge na ne me. 16 Amma Israyela vya ma ka ke naa ge temeya ge Dok ma kalam, a ka sen nama fare janna ma, a ka cot na anabi ma, ɗiŋ Bage ɗiŋnedin laar hot ɓase ma pal ge be to, fare a̰me ge iyal na laar gwan kat to. 17 Dok e gan ge Kaldeya ma ne ya mbal nama pore, a hun nama bool ma ge nama zok ge mbegeya zi, a be ya̰ ndu a̰me uzi to, ko bool ma, ko kale ma, ko naa ga̰l ma, ko naa ge sabar gwagwa ma. 18 Nebukadnezar abe kaŋ ge ne zok ge Dok ne zi ma mwaɗak, ge ga̰l ma ko ge jabso ma, ne kaŋ ge kwaɗa ge gan ne ma, ne kaŋ ge naa ga̰l ge temel ma ne ma, gene nama mbo Babilon. 19 Naa ge Babilon ne ma til zok ge Dok ne uzi, a gul gulum ga̰l ge Ursalima ne se, a til zok ge siŋli ge ne suwal diŋ ma uzi, a til kaŋ kwaɗa ge suwal ne ma uzi pet me. 20 Naa ge a ne hṵ nama to ma, Nebukadnezar pál nama, gene nama mbo Babilon. A gá ke Nebukadnezar ma ne na vya ma mo̰r ɗiŋ mbo zaman ge Perse ma ne ame gan go. 21 A go no, ge fare ge Bage ɗiŋnedin ne jya̰ anabi Irmiya wak zi ne wi, jya̰ go: «Suwal mbo ga suli del wara ɓyalar, ɗiŋ na dam ɗigliya ma mbyat ne ɓya, ndwara go na wi dam ɗigliya ma ge ne ba̰ uzi ma wak.»
Wak honna ge Sirus ne, ne zok ge Dok ne sinna pe
22 Del ge zḛ ge ge Sirus ne ame gan suwal Perse go, ne wi fare ge anabi Irmiya ne waage pe ɗe, Bage ɗiŋnedin vot Sirus gan ge Perse ne pala, Sirus e a oy fare mbe no na suwal go mwaɗak, a njaŋge na njaŋge me go: 23 «Sirus, gan ge Perse ne jan go: Bage ɗiŋnedin Dok ge ne digi zi ya ho̰ mbi suwal ge ne suwar pal ma pet, é mbi go mbi sḭ na zok ge Ursalima ge ne suwal Yuda go. Ne aŋ buwal zi, ndu ge daage pet ge ne kwa tene go na ge na ne ne, na mbo Ursalima, Bage ɗiŋnedin Dok ge na ne na ka ne na!»