Ozias, gan ge Yuda ne
26
1 Ɓase ge Yuda ne ma wan Ozias, a é na gan na bá byalam go. Ozias ka da ne del wol para myanaŋgal swaga ge ne ame gan go. 2 A na sḛ gwa̰ ne suwal Elat ya Yuda go ne, sḭ na digi no go̰r siya ge na bá Amasiya ne go.3 Swaga ge Ozias ne za gan ɗe, ka da ne del wol para myanaŋgal. Za gan Ursalima go go del wara anuwa̰y para azi. Na ná a vya gwale ge Ursalima ne ne, na dḭl Yekoliya. 4 Ago Ozias ke kaŋ ge dosol Bage ɗiŋnedin ndwara se dimma ne na bá Amasiya ne ke go.
5 Swaga ge Zakariya gale ne ndwara go, Ozias ka kare Dok pe, ne da pe Zakariya ka hate na viya̰ ge sya Dok vo. Swaga ge Ozias ne ka kare Bage ɗiŋnedin pe go, Dok ka e na zam zḛ kwaɗa na kaŋ kerra ma zi.
6 Ozias mbo mbal pore ne Filistiya ma, gul gulum ga̰l ge suwal Gat ne, ne Yabne ne, ne ge Asdod ne ma se me. Gwan sin gulum ga̰l ma ge suwal ma ge ne Asdod go ma digi, ne gulum ge suwal ma ge Filistiya ne ma digi me. 7 Dok mbar na hal Filistiya ma, ne Arab ge a ne ka ne Gur-baal go ma, ne Mawoniya ma me. 8 Ammon ma ka tyare kaŋ ma ya hon na. Na dḭl dasare swaga ma go pet diŋ mbo warbe ge suwal Masar ne ya, na gan pe ɗur se. 9 Ozias sin swaga njole swaga ma ge gulum ga̰l ge Ursalima ne ma pala digi, ne viya̰ wak ge ne keŋ ya pala digi, ge viya̰ wak ge baal pul ne pala digi, ge na keŋ ya me. 10 Gwan sin swaga njole swaga ma ful pul ma zi, al tub ma gḛ ge be to, ne da pe ka da ne kavaar ma gḛ ge baal pul ma go, ne babur pul ma go me. Uwale, kat ne naa ge gar kaŋ ma, ne naa ge gar oyo̰r ma ge njal ma pal, ne Karmel go, ago na laar wa̰ kaŋ garra gḛ ge be to.
11 Ozias ka da ne asagar ma ge a ne nṵsi nama nṵsi ne pore mballa pe ma, nama ge Bage njaŋgeya Yeyel ma ne ndu ga̰l ge temel Maaseya ne isi nama varra se. A Hananiya ndu ga̰l ge gak ge gan ne ka ɗame nama temel kerra zi ne. 12 Ga̰l ge asagar mbe ma ka naa dudubu azi ne para kikis myanaŋgal, mwaɗak a ga̰l ge vuwal pe ma ne ma ne. 13 Ga̰l mbe ma ka da ne asagar ge mbyatɗa tap ma bama pe go, nama ge mbya mbal pore ne gan naa ge ho̰l ma, naa dudubu kikis ataa ne para ɓyalar ne para kikis anuwa̰y. 14 Swaga ge a ne ɗage mbo pore, Ozias ka var ndu ge daage ɓiyaar ma, ne ra̰y ma, ne jum walam ma, ne goŋroŋ ma, ne kajamle ma, ne ŋgoo ge fyageya ma. 15 Uwale, Ozias e naa ge suwa ma sol kaŋ a̰me ge mbal kajamle ma ne njal gṵ ge ga̰l ma, e nama Ursalima gulum ga̰l keŋ ma go, ne swaga njole naa ma digi. Dok mbar na gḛ ge be to, na muluk pe diisi, na dḭl dasare swaga ma go pet.
Pala ga̰l ge Ozias ne é na ban uzi
16 Swaga ge na muluk pe ne ɗu se, pala ga̰l wat na zi, e na ban uzi. Gwan gwan ne na pala Bage ɗiŋnedin Dok ge na ne pe se to. Wat mbo zok ge mbegeya ge Bage ɗiŋnedin ne zi ya ndwara tyare dukan twal til dukan pal. 17 Bage tuwaleya Azariya poseya ne naa ge tuwaleya ma wara tiimal na pe go, pet naa ge dulwak deŋgel ma, a wat ya na pe zi, 18 a mḛ́ gan Ozias ndwara zi, a jan na go: «A be mo Ozias til dukan hon Bage ɗiŋnedin ne to, a Aaron vya ma, naa ge ke tuwaleya ma temel ne, ne da pe, a mbege nama mbege ne temel mbe pe. Wá ne zok mbe zi zum. Ago kaŋ ge mo ne ke mbe no, a kaŋ ge sone ne, a be kaŋ ge mo ba ɓol hormo ne na pe Bage ɗiŋnedin Dok ndwara se ne to.» 19 Ozias ne hṵli ɗusi dukan wanna na tok go, saŋge pore naa ge ke tuwaleya ma pal. Swaga julili pore naa ge ke tuwaleya ma pal zok ge Bage ɗiŋnedin ne zi, moy swama kunna dyan na sḭ́ḭ́l go, ge twal til dukan wak go, naa ge ke tuwaleya ma ndwara go. 20 Kep tuwaleya Azariya ma ne naa ge ke tuwaleya ge may ma, a kan bama ndwara, a kwa moy swama kunna ne na ta, a yan na ne zok mbe zi ya zum, swaga ge na sḛ ne kwa no, harge tene wat ya zum, ne da pe, kwa go, na Bage ɗiŋnedin fó na ne moy mbe ne.
21 Gan Ozias ga ne moy swama kunna na ta ɗiŋ siya. A caɗe na ne ɓase ma buwal zi, ga gulum go̰r zum ya, gwan ɓol viya̰ ge gwan’a zok ge Bage ɗiŋnedin ne zi to. Na vya Yotam ge ne dó na ndwara ne gan yál pal, ga ɗame ɓase ma. 22 Kaŋ ma ge Ozias ne ke ge may ma, ge zḛ ge ma ne ge hṵsi ma, anabi Isaya ge Amoz vya njaŋge nama ne. 23 Swaga ge Ozias ne sú, a mbul na ge swaga mbul ta ge gan ma ne go, amma be sḭḭm pala ge na bá ma ne go to, ne da pe a ka jan go, na kṵ swama. Na vya Yotam zam gan na byalam go.