Naama zon ne na swama kunna go
5
1 Ga̰l ge asagar ge gan Siriya ma ne a̰me ɗu, na dḭl Naama. Ka ndu ge ne hamba gḛ ne na bageyal pe, na laar he na gḛ ge be to. Ne da pe, da ne na ta Bage ɗiŋnedin é Siriya ma hál pore no. Amma ndu ge pateya mbe no, kṵ swama. 2 Ndi dam a̰me ɗu, asagar ge Siriya ma ne ma mbo pore, a pá vya gwale ne suwal Israyela ya no. Na sḛ gá Naama gwale kale no. 3 Dam a̰me ɗu, vya gwale mbe jan na ná ge yàl go: «Te go mbi bageyal mbo ge anabi ge ne suwal Samariya ya ta ya, na sḛ te ya zon na ne na swama no go.»4 Naama mbo ya wan na bageyal fare ge vya gwale ge suwal Israyela ne, ne jya̰ na pe. 5 Gan ge Siriya ne jan na go: «A kwaɗa, mbo, mo mbo ɓol gan ge Israyela ne, ne maktub ge mbi ne hon mo na mbe no.» Naama mbo, abe talent wol ge fool kaal ne, ne dinar dudubu myanaŋgal, ne ba̰r ga̰l ge ne vḛso pe ma wol na tok go. 6 Na sḛ mbo ne maktub mbe mbo hon gan ge Israyela ne. Maktub mbe njaŋge go: «Mbi teme mbi dore Naama ne maktub mbe no mbo mo ta ya, ne da pe, mo zo̰ na ne na swama kunna go.» 7 Swaga ge gan ge Israyela ne ne isi maktub mbe ɗe, taabe na ba̰r ma ne ta uzi, jan go: «Mbi há tene Dok ɗo, mbi ba kat ne pool ge é ndu suya, ko ge é na kat ne ndwara ɗaa? Ndi me gale, gan ge Siriya ma ne teme mbi ndu ya go, mbi zo̰ na ne na swama kunna go. Ne aŋ ne kwa go, ɓyare mbi fare.»
8 Swaga ge Ilisa, ndu ge Dok ne ne za̰ go gan ge Israyela ma ne taabe na ba̰r ma ya ne ta uzi ɗe, teme a jya̰ na go: «Kyaɗa mo ba taabe mo ba̰r ma ne mo ta uzi ɗaa? Ya̰ na, na mbo ya mbi ta, ma kwa go, anabi ya Israyela go.» 9 Naama mbo ne na tisi ma ne na pus pore ya mḛya Ilisa zok wak pala zum. 10 Ilisa teme ndu ya ɗu jan na go: «Mbo dol tene ndwara ɓyalar maŋgaɗam Urdun se, mo ma̰ zon, mo hat harcal.» 11 Naama gwan ne pore juliliya, jan go: «Mbi dwá go anabi ma̰ wat ya mbi ndwara zum, ma̰ kaɗe Bage ɗiŋnedin Dok ge na ne, ma̰ é na tok ge mbi swaga ge moy ma go, mbi ba ɓol zonna ne mbi swama kunna go. 12 Maŋgaɗam ge suwal Damas ne ma, Abana ma ne Parpar, a be waɗe Israyela ma mam mbe ma no to’a? Mbi te ya son tene nama se, mbi hat harcal to’a?» Naama gwan ne pore juliliya. 13 Na dore ma gwan ta ya na ta zi gwa, a jan na go: «Te go anabi ele mo kaŋ a̰me ge haŋle ɗe, mo te ya ke na to ɗaa? A ma fare ge yál ne ɗo, mo ba kuri na ɗaa? Te jya̰ mo ɗo go, mo so̰ tene, mo ba hat harcal ɓaa!» 14 Kan na koo seɗe, wat maŋgaɗam Urdun se, par tene se ndwara ɓyalar ne fare ge ndu ge Dok ne ne jya̰ go. Na sḛ duur saŋge dimma ca ne vya jyale sḛ duur go, orbe uzi yaɗat. 15 Gwan ya ndu ge Dok ne ta, ne naa ge ne na pe go ma mwaɗak. Swaga ge ne ya̰ ya na ndwara se, jan na go: «Se no, mbi kwa ya tyatyat go Dok a̰me ge ɗogle ne suwar pal go to, ɗeŋgo ge Israyela ma ne. Mbi kaɗe mo, vḭ, ame bobo ma ne mbi tok go no nde.» 16 Ilisa gwan ne na janna go: «Ne dḭl ge Bage ɗiŋnedin Bage ndwara na ge mbi ne ke na temel mo̰r ne zi, mbi vin ame mo a̰me to bat.» Naama gwarge tene na ta go na vḭ, amma na sḛ kuri uzi bat.
17 Naama jan na go: «Kadɗa go puy ɗe, vḭ mbi abe suwar ge mo suwal ne ndwara yage kwara azi pal, ago mbi vḭ tene go, mbi gwan tyare tuwaleya ge tilla uzi, ko tuwaleya a̰me hon dok ge ɗogle ma to bat, Bage ɗiŋnedin ɗeŋgo. 18 Ne fare no pe, Bage ɗiŋnedin na pore mbi. Swaga ge mbi bageyal, ne wat zok ge sḭḭm Rimmon ne zi, ndwara mbo uware na, mbi me, mbi gur mbi koo se poseya ne na, ne da pe, na sḛ ndal na tok mbi ta. Ago Bage ɗiŋnedin na pore mbi, swaga ge mbi ne mbo katɗa ka mbo gur mbi koo ge zok ge sḭḭm Rimmon ne zi.» 19 Ilisa jan na go: «Mbo kwaɗa.» Na sḛ gwan.
Sone ge Gehazi ne
Swaga ge Naama ne mbo ɓutuk ɗe, 20 Gehazi, dore ge Ilisa, ndu ge Dok ne ne jan tene go: «Ndi, mbi bageyal be ɓyare a̰me ne Naama ndu ge Siriya ne tok go to. Ne jo̰ Bage ɗiŋnedin da ne ndwara, mbi sya na pe ya, mbi ba ame kaŋ ne na tok ya nde.» 21 Gehazi sya Naama pe ya. Swaga ge Naama ne kwa na syaya ne na go̰r ya, yal ne pus pore digi ya seɗe, ɓate ya na ndwara zi, ele na go: «Mo te sya ya kwaɗa ɗer ɓaa?» 22 Gehazi jan na go: «Fare a̰me to. A mbi bageyal teme mbi ya mo pe ne, ndwara jan mo go: Bool ma azi ne naa ge ne swaga hate fare anabi ma buwal zi, a mbo da ne le ge njal Efrayim ne ya, na ma̰ kat ge mo hon nama talent ge fool kaal ne ɗu, ne ba̰r ga̰l ge vḛso ne kap me de.» 23 Naama jan na go: «Vḭ ame talent ge fool kaal ne azi.» Naama gwarge tene na ta, hon na talent ge fool kaal ne azi, par nama galam azi zi hini hini, hon na ba̰r ga̰l ge vḛso ne ma azi me. É kaŋ mbe ma na dore ma azi pal inna ndwara ɗame Gehazi. 24 Swaga ge a ne ya̰ ya swaga ge a ne tol na Ofel go, Gehazi abe kaŋ mbe ma, mbo kan na diŋ ya, ya̰ Naama dore ma gwanna.
25 Go̰r go, Gehazi gwan’a na bageyal ta. Ilisa ele na go: «Gehazi, mo te mbo da ne le da ya ɗaa?» Gehazi jan na go: «Mo dore be mbo swaga to.» 26 Amma Ilisa jan na go: «Mo dwat go mbi o̰yom be kat go, swaga ge ndu mbe ne ka kan na koo ne na pus pore digi ya se ndwara mbo ya mo ndwara zi kun mo to’a? Ago, a be swaga ge mo ame ba̰r ge kwaɗa ma, ne bware ma ndwara yat tene gaaso ge uwara olive ne ma, ne ge oyo̰r ne ma, ne gii ma, ne nday ma, ne dore ma, ne kale ma ne to. 27 Ago swama kunna ge Naama ne mbo gá aŋ ne mo hir ma ta ɗiŋnedin.» Swaga ge Gehazi ne wa ne Ilisa ta zi ya zum, swama kunna son na duur se saal teret.