ईब्री लोकंसला लीखेल चीठी
1
देव तेना पोर्यानी द्वारा आपली संगं बोलय
1 बराज वरीसनी आगुदार देव तेना वचन सांगनारंसनी द्वारा आपला वाडावडीलंसला बोलना. तो बराज दाउ आनं आलंग आलंग प्रकारथीन तेसला बोलना. 2 पन हाई शेवटला दीवसंसमं तेना पोर्यानी द्वारा तो आपली संगं बोलना सय. आनं तोज पोर्याला देव आख्या गोस्टीसना वारीस मनीसनं नीवाडना. आनं तेनीज द्वारा तो जग आनं आकासना आखंकाही बनाडना सय. 3 आनं तो पोर्यानी द्वारा मायती पडय का, देव कीतला मोठा सय. आनं प्रतेक गोस्टीसमं तो पुरा देवबापनाज सारका सय. आनं तेना शक्तीवान वचनघाई जगना आनं आकासना आखंकाही चालाडामं येय. आनं आखा मानुस जातला पाप पईन माफी दीसनं तो पोर्या आखंस पेक्षा मोठा आनं शक्तीवान देवना जेवनी कडं सोरगंमं बसना सय.
देवना पोर्या दुतंसनी पेक्षा बी मोठा सय
4 तेमन तो देवदुतंसनी पेक्षा बी पक्का मोठा व्हयना. कजं का देव तेला जो नाव दीना सय, तो नाव बी ते देव दुतंसनी पेक्षा पक्का मोठा सय. 5 कजं का देव तेना कोनता बी दुतला आशा सांगना ना सय का,
✞"तु मना पोर्या सय आनं आज मी तुना बाप व्हयना सय."
आनं तो कोनता बी देवदुतनी बद्दल आशा सांगना ना सय का,
✞"मी तेना बाप बनसु आनं तो मना पोर्या व्हई."
6 पन जवं देव तेना पयला पोर्याला हाई जगमं ली येवामं व्हताल, तो टाईमनी बद्दल आखु तो सांगय का,
✞"देवनं आखं दुतं तेला नमन करीसनं तेनी भक्ती करालाज पायजे."
7 आनं देवना दुतंसनी बद्दल तो सांगय का,
✞"तो तेनं दुतंसला वारा सारका आनं तेनं सेवकंसला ईस्तुना जाळ सारका बनाडय."
8 पन तेना पोर्यानी बद्दल तो आशा सांगय का,
✞"हे देव तुना राज्य कायम टीकी रही. आनं तु चांगला न्याय करीसनं लोकंसवर राज्य करनार सय. 9 आनं जा नीतीवान सय, ता तुला आवडय, पन जा वाईट सय, ता तुला आवडय ना. तेमन देव, मंजे तुनाज देव तुनं लोकंसमं तुला नीवाडना सय आनं मोठा मान मीळाडाना आनंद तुलाज देयेल सय."
10 आखु देव आशा बी सांगना सय का,
✞"हे परभु, आखंकाही बनाडताना, तु जगला बी बनाडना. आनं आकासना आखा काही बी तु सोताना हातघाई बनाडना. 11 ते आखं नास व्हई जाईत आनं पुरं जुनं कपडं सारकं चोळाई जाईत. पन तु कायम रहनार सय. 12 आनं जुनं कपडं सारका तु तेसला गुंडाळीसनं फेकी दीशी. आनं जशे कपडं बदलत, तशे तु तेसला बदली टाकशी. पन तु कधी बदलनारंज ना सय. आनं तु कायम रहनार सय."
13 पन कोनता बी देवदुतनी बद्दल देव कधीज आशा सांगना ना सय का,
✞"मी तुनं दुशमनंसला तुना पायनी खाल ली येय ताव, तु मनी जेवनी कडं बस."
14 तं मंग ते देवदुत कोन सत? ते फक्त देवना सेवक सत आनं देवना धाडेल आत्मा सत. आनं जे लोकंसला तारन भेटनार सय, तेसला मदत करानी करता देव तेसला धाडेल सय.